3 Patshalar 5 bob
1 Tir patshası Xiram Sulaymannın' maylanıp, a'kesi Dawıttın' ornına patsha etip qoyılg'anın esitkende, Sulaymandı qutlıqlaw ushın elshilerin jiberdi. Sebebi Xiram o'mir boyı Dawıtqa dos bolıp kelgen edi.
2 Sulayman da Xiramg'a o'z elshilerin jiberip, bılay dedi:
3 «O'zin'iz bilesiz, a'kem Dawıt a'tirapındag'ı dushpanları menen sawash ju'rgizgenlikten, Qudayı Jaratqan İyenin' atına arnap İbadatxana qura almadı. Jaratqan İye sawashlarda dushpanların onın' ayag'ının' astına taslag'ang'a shekem, ol bul isti qıla almadı.
4 Endi Qudayım Jaratqan İye mag'an ha'r ta'repleme tınıshlıq berdi. Ha'zir birde bir dushpanım da, do'nip turg'an qa'wip te joq.
5 Jaratqan İye a'kem Dawıtqa: „Men senin' taxtın'a otırg'ızatug'ın ulın' Menin' atıma arnap İbadatxana quradı“, – degen edi. Sonlıqtan men Qudayım bolg'an Jaratqan İyenin' atına arnap İbadatxana qurıwdı niyet ettim.
6 Endi men ushın Lebanon tawlarınan kedr ag'ashların kesiw ushın adamların'ızg'a buyrıq bersen'iz. Menin' adamlarım da sizin' adamların'ız benen birge isleydi ha'm men sizin' adamların'ızg'a o'zin'iz belgilegen miynet haqını to'leymen. Bizlerde ag'ash kesiwde sidonlılar sıyaqlı ta'jiriybeli adamlar joq ekenin o'zin'iz bilesiz».
7 Xiram Sulaymannın' bul so'zlerin esitkende, qattı quwanıp: «Bu'gin bul ullı bir xalıqtı basqarıw ushın Dawıtqa dana bir ul bergeni ushın, Jaratqan İyege alg'ıslar bolsın!» – dedi.
8 Son'ınan ol Sulaymang'a mına xabardı jiberdi: «Mag'an jibergen xabarın'ızdı aldım. Kedr ha'm sa'rwi ag'ashlarına baylanıslı barlıq tileklerin'izdi orınlayman.
9 Adamlarım olardı Lebanon tawlarınan ten'izge alıp keledi. Men olardı sal etip buwdırıp, ten'iz arqalı aytqan jerin'izge jetkizip beremen. Adamlarım sol jerde sallardı sheship, jıyıp beredi, sizler alıp ketesizler. Siz de tilegimdi orınlap, menin' u'y-ishimdi azıq-awqat penen ta'miyinlesen'iz».
10 Xiram Sulaymang'a kereginshe kedr ha'm sa'rwi ag'ashların berdi.
11 Sulayman bolsa, Xiramnın' u'y-ishinin' azıq-awqatı ushın ha'r jılı jigirma mın' kor biyday, jigirma kor sapalı za'ytu'n mayın berip turdı.
12 Jaratqan İye wa'de etkenindey, Sulaymang'a danalıq berdi. Sonlıqtan Sulayman menen Xiram arasında tatıwlıq bolıp, olar o'z ara kelisim du'zdi.
13 Patsha Sulayman qara jumıs isletiw ushın pu'tkil İzraildan otız mın' adamdı ma'rdikarg'a aldı
14 Gezek penen ha'r ayda olardan on mın'ın Lebanon tawlarına jiberdi. Olar bir ay Lebanon tawlarında, eki ay u'ylerinde bolatug'ın edi. Bul adamlarg'a Adoniram basshılıq etti.
15 Ja'ne de, Sulaymannın' ju'k tasıytug'ın jetpis mın' adamı ha'm tawlarda tas kesetug'ın seksen mın' adamı bar edi.
16 Bulardan tısqarı, Sulayman istin' barısın baqlap, jumısshılardı qadag'alap turatug'ın u'sh mın' u'sh ju'z qadag'alawshı tayınladı.
17 Patshanın' buyrıg'ı boyınsha, jumısshılar İbadatxananın' tiykarın jonılg'an taslardan qalaw ushın u'lken ha'm sapalı taslardı kesip shıg'ardı.
18 Sulaymannın' ha'm Xiramnın' adamları geballılar menen birge İbadatxananın' qurılısı ushın ag'ashlar menen taslardı jonıp tayarladı.
