3 Patshalar 6 bob
1 zrail xalqının' Mısırdan shıqqanına to'rt ju'z seksen jıl bolg'anda, Sulaymannın' İzrail taxtına otırg'anına to'rt jıl bolg'an edi. Ol sol jıldın' ekinshi ayında, yag'nıy Ziw ayında Jaratqan İyenin' İbadatxanasının' qurılısın basladı.
2 Patsha Sulaymannın' Jaratqan İyege arnap qurg'an İbadatxanasının' uzınlıg'ı alpıs shıg'anaq, eni jigirma shıg'anaq, al biyikligi otız shıg'anaq edi.
3 İbadatxana imaratının' aldıng'ı jag'ındag'ı aywannın' uzınlıg'ı İbadatxana imaratının' enindey, yag'nıy jigirma shıg'anaq, al eni on shıg'anaq boldı.
4 Sulayman İbadatxanag'a sırtqa qarag'an jag'ı tarlaw, ishke qarag'an jag'ı ken'lew bolg'an aynalar isletti.
5 İbadatxananın' sırtın, yag'nıy u'lken bo'lmenin' ha'm En' muxaddes bo'lmenin' diywalların aylandırıp, u'sh qabatlı qosımsha bo'lmeler isletti.
6 En' to'mengi qabattın' eni bes shıg'anaq, ortang'ı qabattın' eni altı shıg'anaq, u'shinshi qabattın' eni jeti shıg'anaq edi. İbadatxananın' diywallarına islew bermew ushın, bo'lmeler tekshege uqsatıp o'rilgen İbadatxananın' diywallarına bo'reneler arqalı biriktirildi.
7 İbadatxananın' qurılısı ushın paydalanılatug'ın taslar ka'nnin' o'zinde jonıp tayarlandı. Sonlıqtan İbadatxana qurılıp atırg'anda, sho'kkishtin' de, baltanın' da, basqa temir a'sbabının' da sesti esitilmedi.
8 Ortadag'ı qosımsha bo'lmenin' esigi İbadatxananın' qubla ta'repinde edi. Aylanba tekshe arqalı ortang'ı qabatqa, onnan u'shinshi qabatqa o'tetug'ın edi.
9 Sulayman İbadatxananı qurıp tamamladı. To'besin kedr bo'reneler ha'm kedr ag'ashınan islengen taxtalar menen bastırdı.
10 Ja'ne de, ol pu'tkil İbadatxananı aylandırıp, ha'r birinin' biyikligi bes shıg'anaq bolg'an qosımsha bo'lmeler saldırdı. Olar İbadatxana diywalına kedr bo'reneler menen bekitildi.
11 Jaratqan İyeden Sulaymang'a mınaday so'z tu'sti:
12 «Mine, sen İbadatxana qurıp atırsan'. Eger sen Menin' qag'ıydalarımdı, nızam ha'm buyrıqlarımdı orınlap ju'rsen', onda Men a'ken' Dawıtqa bergen so'zimdi sen arqalı orınlayman.
13 Men izraillılar arasında jasap, xalqım İzraildı hesh qashan ta'rk etpeymen».
14 Solay etip, Sulayman İbadatxananı qurıp pitkerdi.
15 Ol İbadatxananın' ishki diywalın edennen to'bege shekem kedr ag'ashınan islengen taxtalar menen qapladı, al edenine sa'rwi ag'ashınan islengen taxtalar to'setti.
16 İbadatxananın' arqa ta'repinin' en' to'rin edennen to'besine deyin kedr taxtalar menen bo'ldirip, uzınlıg'ı jigirma shıg'anaq bolg'an bir bo'lme ajırattırdı. Ol jer En' muxaddes bo'lme dep ataldı.
17 En' muxaddes bo'lmenin' aldındag'ı u'lken bo'lmenin' uzınlıg'ı qırıq shıg'anaq edi.
18 Diywaldag'ı taslar ko'rinbewi ushın İbadatxananın' ishin qaplap turg'an kedr taxtalarg'a asqabaqlar ha'm asılıp turg'an gu'ller oyıp salındı.
19 İbadatxananın' ishindegi en' to'rgi bo'lme Jaratqan İyenin' Kelisim sandıg'ın qoyıw ushın tayarlandı.
20 Bul bo'lmenin' uzınlıg'ı jigirma shıg'anaq, eni jigirma shıg'anaq ha'm biyikligi de jigirma shıg'anaq edi. Sulayman usı bo'lmeni de, kedr ag'ashınan islengen tu'tetki tu'tetiletug'ın orındı da sap altın menen qaplattı.
21 Sulayman İbadatxananın' ishin de sap altın menen qaplatıp, altın menen qaplang'an to'rgi bo'lmenin' aldına altın menen qaplang'an shınjırlar tarttırdı.
22 İbadatxananın' ishi bastanayaq ha'm En' muxaddes bo'lmenin' aldındag'ı tu'tetki tu'tetiletug'ın orın altın menen qaplandı.
23 En' muxaddes bo'lmege qoyıw ushın za'ytu'n ag'ashınan islengen, ha'r birinin' biyikligi on shıg'anaq bolg'an eki kerub islendi.
24 Ha'r qanatı bes shıg'anaq bolg'an kerubtın' jayılg'an eki qanatının' uzınlıg'ı on shıg'anaq boldı.
25 Ekinshi kerubtın' da jayılg'an qanatı on shıg'anaq bolıp, eki kerubtın' o'lshemi de, ko'rinisi de birdey edi.
26 Eki kerubtın' da biyikligi on shıg'anaq edi.
27 Sulayman kerublardı İbadatxananın' En' muxaddes bo'lmesinin' ortasına qoydı. Kerublardın' jayılg'an qanatlarının' bir ushı bo'lmenin' diywallarına tiyip, ekinshi ushları bo'lmenin' ortasında bir-birine tiyisip turdı.
28 Sulayman kerublardı da altın menen qaplattı.
29 İbadatxananın' ishki ha'm sırtqı bo'lmelerinin' ha'mme diywallarına aylandırıp kerublardın', palma ag'ashlarının' ha'm ashılıp turg'an gu'llerdin' ko'rinislerin oyıp saldırdı.
30 Usı eki bo'lmenin' edenlerin de altın menen qaplattı.
31 En' muxaddes bo'lmenin' kirer awzına za'ytu'n ag'ashınan jaqlawı bes qırlı bolg'an jarma qapı isletti.
32 Ol za'ytu'n ag'ashınan islengen jarma qapılarg'a kerublardın', palma ag'ashlarının' ha'm ashılıp turg'an gu'llerdin' ko'rinisin oyıp saldırıp, qapılardı altın menen qaplattı. Kerublar menen palma ag'ashlarının' su'wretlerin de altın menen qaplattı.
33 U'lken bo'lmenin' kirer awzına da za'ytu'n ag'ashınan to'rt mu'yeshli jaqlaw isletip,
34 jaqlawg'a jıynalatug'ın eki jarma qapını sa'rwi ag'ashınan isletti.
35 Bularg'a da kerublardın', palma ag'ashlarının' ha'm ashılıp turg'an gu'llerdin' ko'rinislerin oyıp saldırıp, olardı altın menen qaplattı.
36 Ol ishki ha'wli qurdırıp, onın' diywalların u'sh qatar jonılg'an tastan ha'm bir qatar kedr ag'ashınan isletti.
37 Sulayman o'z patshalıg'ının' to'rtinshi jılının' Ziw ayında Jaratqan İyenin' İbadatxanasının' tiykarın qoyg'an edi.
38 Al on birinshi jıldın' segizinshi ayı bolg'an Bul ayında İbadatxana aldın ala belgilengenindey etip, barlıq mayda-shu'ydesine shekem qurıp bolındı. Sulayman İbadatxananı jeti jılda qurıp boldı.
