3 Patshalar 7 bob

Sulaymannın' sarayı(1-12),Xiramnın' xızmeti(13-51).

¹ Sulayman o'zi ushın da saray qurdırıp, onı on u'sh jılda tolıq tamamladı.

² Ol qurdırg'an Lebanon tog'ayı dep atalatug'ın saraydın' uzınlıg'ı ju'z shıg'anaq, eni eliw shıg'anaq, biyikligi otız shıg'anaq edi. Saray to'rt qatar etip qoyılg'an kedr o'relerden ha'm olardın' u'stine qoyılg'an kedr bo'renelerden ibarat edi.

³ O'relerdin' u'stine, ha'r qatarg'a on bes bo'reneden qoyılg'an bolıp, usı qırıq bes bo'renenin' u'stine kedr taxtalar to'selgen edi.

⁴ marattın' eki ta'repindegi aynaları u'sh qatardan ibarat bolıp, olar bir-birine qarap turg'an edi.

⁵ Barlıq qapılar ha'm olardın' jaqlawları to'rt mu'yeshli edi. Aynalar bolsa, u'sh qatar etip, bir-birine qarama-qarsı qurılg'an edi.

⁶ Sulayman uzınlıg'ı eliw shıg'anaq, eni otız shıg'anaq bolg'an o'reli bir aywan isletti. Aywannın' aldında o'reler qoyılıp, u'sti bastırılg'an shertek bar edi.

⁷ 7 Ja'ne de, taxt turatug'ın, yag'nıy ol jerde o'zi otırıp qazılıq etetug'ın Hu'kim shıg'arıw aywanın qurdırdı. Onı edeninen to'besine shekem kedr taxtalar menen qaplattı.

⁸ Usı aywannın' arqa ta'repindegi Sulayman jasaytug'ın saray da usı taqılette salıng'an edi. Sulayman hayalı, faraonnın' qızı ushın da anıq usınday bir saray qurıp berdi.

⁹ Bul imaratlardın' ha'mmesi ishi ha'm sırtı tiykarınan to'besine deyin ha'm sırtınan u'lken ha'wlige deyin jarg'ılar menen kesilip, eki ta'repi de jonılg'an ha'm belgilengen o'lshem boyınsha tayarlang'an sapalı taslardan salıng'an edi.

¹⁰ Tiykarı on shıg'anaq ha'm segiz shıg'anaq keletug'ın u'lken, sapalı taslardan qalandı.

¹¹ Diywalı da o'lshem boyınsha kesilgen sapalı taslardan o'rilip, diywal ushın kedr ag'ashı da paydalanıldı.

¹² U'lken ha'wlinin' aynalası jonılg'an tastan u'sh qatar ha'm kedr bo'reneden bir qatar etip, aylandırıp o'rilgen edi. Jaratqan İyenin' İbadatxanasının' ishki ha'wlisinin' ha'm aywanının' diywalları da usılay islengen edi.

¹³ Patsha Sulayman xabar jiberip, Tirden Xiramdı aldırdı.

¹⁴ Onın' anası Naftaliy urıwınan bolg'an bir jesir hayal, al a'kesi tirli mısker edi. Xiram qoladan zat islew uqıbın, sheberligin ha'm qa'biletin iyelegen usta edi. Ol patsha Sulaymang'a kelip, onın' barlıq islerin orınladı.

¹⁵ Xiram qoladan eki o're isledi. Olardın' ha'r birinin' biyikligi on segiz shıg'anaq, al ha'r birinin' aynala o'lshemi on eki shıg'anaq keletug'ın edi.

¹⁶ Ja'ne de, o'relerdin' u'stine qoyıw ushın, qoladan eki to'belik quyıp isledi. Olardın' ha'r birinin' biyikligi bes shıg'anaq edi.

¹⁷ O'renin' to'beliginin' ha'r biri torg'a uqsatıp o'rilgen shınjırlar menen bezeldi.

¹⁸ Ol o'relerdin' joqarısındag'ı to'beliklerdi jawıp turıw ushın, ha'r bir tordı eki qatar etip aylandırıp, qola anarlar menen bezedi.

¹⁹ Aywandag'ı o'relerdin' to'belikleri lala gu'llerge uqsatıp islenip, olardın' ha'r birinin' biyikligi to'rt shıg'anaq edi.

²⁰ Ha'r bir o'renin' to'besindegi tordın' janındag'ı kesege uqsag'an bo'leginin' u'stine aylandırıp, eki ju'zden anar salıng'an edi.

²¹ Xiram bul o'relerdi İbadatxananın' aywanına ornatıp, onın' qubladag'ısın Yaxin, arqadag'ısın Boaz dep atadı.

²² O'relerdin' to'belikleri lala gu'l taqılette edi. Solay etip, o'relerge baylanıslı isler tamam boldı.

²³ Xiram qoladan quyma hawız jasadı. Ol domalaq bolıp, onın' bir erneginen ekinshi ernegine shekemgi aralıg'ı on shıg'anaq, teren'ligi bes shıg'anaq, aynala uzınlıg'ı otız shıg'anaq edi.

²⁴ Hawız quyılg'an waqıtta, onın' erneginin' astına eki qatar etip asqabaqqa uqsag'an nag'ıslar qosıp quyılg'an bolıp, olar ha'r bir shıg'anaqqa on-onnan tuwrı keletug'ın edi.

²⁵ Hawız on eki quyma bug'anın' u'stine ornatılg'an bolıp, olardın' u'shewi arqag'a, u'shewi batısqa, u'shewi qublag'a, u'shewi shıg'ısqa qarap turg'an edi. Bug'alardın' artqı jag'ı hawızdın' astında, ishte edi.

²⁶ Hawızdın' qalın'lıg'ı to'rt eli bolıp, ernegi kesenin' ernegine, ashılıp turg'an lala gu'lge uqsaytug'ın edi. Hawızg'a eki mın' bat suw sıyatug'ın edi.

²⁷ Xiram qoladan on tu'beldirik isledi. Ha'r bir tu'beldiriktin' uzınlıg'ı to'rt shıg'anaq, eni to'rt shıg'anaq, biyikligi u'sh shıg'anaq edi.

²⁸ Tu'beldiriklerdin' du'zilisi mınaday edi: tu'beldirikler jaqlawlarg'a bekitilgen to'rt mu'yeshli qola taxtalardan islendi.

²⁹ Taxtalarg'a, sondayaq jaqlawlarg'a da arıslan, bug'a ha'm kerublardın' su'wretleri salındı. Al arıslan ha'm bug'alardın' su'wretlerinin' astı menen u'stine aspa gu'lshen'berleri oyıp islendi.

³⁰ Ha'r bir tu'beldiriktin' qoladan islengen to'rt do'n'gelegi ha'm og'ı bar edi. Tu'beldiriktin' to'rt ta'repine la'gendi uslap turıw ushın quyma tirepberdiler islenip, olardın' ha'r bir ta'repi gu'lshen'berler menen bezetilgen edi.

³¹ Tu'beldiriktin' u'sti betinde la'gen qoyıw ushın arnalg'an do'n'gelek oyıq bar bolıp, la'gen tu'beldirikten joqarı qaray bir shıg'anaq shıg'ıp turg'an edi. Onın' tu'bine deyingi teren'ligi bir yarım shıg'anaq edi. Oyıqtın' aynala do'gereginde oyma nag'ıslar bar edi. Biraq tu'beldiriklerdin' taxtaları do'n'gelek emes, to'rt mu'yeshli edi.

³² Tu'beldiriktin' taxtalarının' astı betinde to'rt do'n'gelek bar bolıp, onın' og'ı tu'beldirikke qatırılg'an edi. Ha'r bir do'n'gelektin' biyikligi bir yarım shıg'anaq edi.

³³ Do'n'gelekler sawash arbalarının' do'n'geleklerine uqsaytug'ın edi. Onın' ha'mme na'rsesi: oqları, tog'ını, kegeyi ha'm gu'pshegi quyma edi.

³⁴ Ha'r bir tu'beldiriktin' to'rt mu'yeshinde tu'beldirikke qatırılg'an to'rt tirepberdi bar edi.

³⁵ Tu'beldiriktin' u'stinde yarım shıg'anaq biyiklikte bir jumalaq halqa bar edi. Tu'beldiriktin' tirepberdileri menen taxtaları tu'beldirikke biriktirip islengen edi.

³⁶ Xiram tirepberdiler menen taxtalarg'a sıyg'anınsha, kerublardın', arıslanlardın', palma ag'ashlarının' su'wretlerin, al aynalasına gu'lshen'berlerdi oyıp saldı.

³⁷ Usılayınsha, ol on tu'beldirik isledi. Olardın' ha'mmesinin' quyılıwı da, o'lshemi de, ko'rinisi de birdey boldı.

³⁸ Xiram on tu'beldiriktin' u'stine qoyıw ushın qoladan on la'gen isledi. Ha'r bir la'gennin' eni to'rt shıg'anaq bolıp, onın' ha'r birine qırıq bat suw ketetug'ın edi.

³⁹ Tu'beldiriktin' besewin İbadatxananın' qubla ta'repine, besewin arqa ta'repine qoydı. Al hawızdı bolsa, İbadatxananın' on' ta'repine, yag'nıy qubla-shıg'ısına qoydı.

⁴⁰ Bunnan son', Xiram ku'l salınatug'ın ıdıslar, ku'l alatug'ın belsheler ha'm qan sebetug'ın tabaqlar soqtı. Solay etip, Xiram patsha Sulaymannın' tapsırması boyınsha Jaratqan İyenin' İbadatxanası ushın islep atırg'an mına islerin tamamladı:

⁴¹ eki o're, o'relerdin' to'besine qoyılatug'ın eki to'belik, o'relerdin' to'belerin orap turg'an eki torlı a'sheko'y,

⁴² o'renin' to'beligin jawıp turıw ushın arnalg'an ha'r bir tordag'ı eki qatar anar, yag'nıy eki tordag'ı to'rt ju'z anar,

⁴³ on tu'beldirik ha'm tu'beldirik u'stine on la'gen,

⁴⁴ hawız ha'm hawızdın' astındag'ı on eki bug'a,

⁴⁵ ku'l salınatug'ın ıdıslar, ku'l alatug'ın belsheler ha'm qan sebetug'ın tabaqlar. Xiramnın' patsha Sulaymang'a Jaratqan İyenin' İbadatxanası ushın islep bergen ha'mme na'rsesi jıltıratılg'an qoladan islendi.

⁴⁶ Patsha bulardı İordan tegisliginde, Sukkot penen Saretan arasındag'ı saz ılaylı jerlerde quydırdı.

⁴⁷ Buyımlar sonshelli ko'p bolg'anlıqtan, Sulayman olar ushın ketken qolanın' o'lshemin anıqlamadı.

⁴⁸ Sulayman Jaratqan İyenin' İbadatxanası ushın to'mendegi zatlardı: altınnan islengen tu'tetki tu'tetiletug'ın orındı, u'stinde usınılg'an nanlar turatug'ın stoldı,

⁴⁹ En' muxaddes bo'lmege kirer awızda, on' ta'repte turatug'ın bes ha'ste menen shep ta'repte turatug'ın bes ha'steni, gu'llerdi, shıralardı ha'm pilik tazalaytug'ın qısqıshlardı,

⁵⁰ qırmalardı, pilik keskishlerdi, qan sebetug'ın tabaqlardı, tu'tetki salatug'ın tostag'anlardı ha'm shoq salınatug'ın ıdıslardı, İbadatxananın' en' to'rgi bo'lmesinin', yag'nıy En' muxaddes bo'lmenin' ha'm u'lken bo'lmenin' qapılarının' topsaların altınnan isletti.

⁵¹ Patsha Sulayman Jaratqan İyenin' İbadatxanasına tiyisli bolg'an islerdi tamamlag'annan son', a'kesi Dawıttın' atag'an gu'mis, altın ha'm basqa zatların a'kelip, İbadatxananın' qaznasına qoydı.