3 Patshalar 8 bob

Kelisim sandıg'ının' İbadatxanag'a alıp keliniwi(1-13),Sulaymannın' xalıqqa aytqan so'zleri(14-21),Sulaymannın' duwası(22-61),İbadatxananın' bag'ıshlanıwı(62-66).

¹ Patsha Sulayman Jaratqan İyenin' Kelisim sandıg'ın Dawıttın' qalası bolg'an Sionnan alıp keliw ushın İzrail xalqının' barlıq aqsaqalların, urıw ha'm a'wlad basshıların Erusalimge shaqırdı.

² Ha'mme jetinshi ay bolg'an Etanim ayındag'ı bayram waqtında* Sulayman patshanın' aldına jıynaldı.

³ İzrail aqsaqallarının' ha'mmesi jıynalg'anda, ruwxaniyler Kelisim sandıg'ın jerden ko'terip aldı.

⁴ Ruwxaniyler menen lebiyliler Jaratqan İyenin' sandıg'ın, Ushırasıw shatırın ha'm shatırdag'ı ha'mme muxaddes buyımlardı İbadatxanag'a tasıdı.

⁵ Patsha Sulayman ha'm onın' janındag'ı pu'tkil İzrail ja'miyeti Kelisim sandıg'ının' aldında, san-sanaqsız qoy ha'm bug'alardı qurbanlıqqa shaldı.

⁶ Ruwxaniyler Jaratqan İyenin' Kelisim sandıg'ın İbadatxananın' en' to'rine, En' muxaddes bo'lmege kirgizip, kerublardın' qanatlarının' astındag'ı o'z ornına qoydı.

⁷ Kerublardın' qanatları sandıqtın' u'sti boylap sozılıp, sandıqtı da, onın' sırıqların da jawıp turdı.

⁸ Sırıqlar ju'da' uzın bolg'anlıqtan, olardın' ushları En' muxaddes bo'lmenin' aldındag'ı Muxaddes bo'lmeden ko'rinip turatug'ın edi. Biraq olar sırttan ko'rinbeytug'ın edi. Olar ha'zir de sol jerde tur.

⁹ Sandıqtın' ishinde Muwsanın' Xoreb tawında qoyg'an eki tas taxtasınan basqa hesh na'rse joq edi. Bular Mısır jerinen shıqqanda Jaratqan İyenin' izraillılar menen du'zgen kelisimi jazılg'an tas taxtalar edi.

¹⁰ Ruwxaniyler Muxaddes bo'lmeden shıqqanda, bir bult Jaratqan İyenin' İbadatxanasın toltırdı.

¹¹ Bul bult sebepli ruwxaniyler xızmetin dawam ettire almadı. Sebebi Jaratqan İyenin' saltanatı İbadatxananı toltırıp turg'an edi.

¹² Sonda Sulayman bılay dedi: «Jaratqan İye! Sen: „Qoyıw bultlar ishinde ma'kan qurıwdı qa'leymen“, – dep aytqan edin'.

¹³ Men Sen ushın saltanatlı bir İbadatxana, ma'n'gige jasaytug'ın bir qonıs qurdım».

¹⁴ Patsha burılıp, tik ayaqta turg'an pu'tkil İzrail ja'miyetine pa'tiya berdi.

¹⁵ Son'ınan patsha bılay dedi: «A'kem Dawıtqa O'z awzı menen aytqan so'zlerin O'z qolları menen orınlag'an İzraildın' Qudayı Jaratqan İyege alg'ıslar bolsın! Ol bılay degen edi:

¹⁶ „Xalqım İzraildı Mısırdan alıp shıqqan ku'nnen beri O'zimnin' atıma arnap bir İbadatxana qurıw ushın, İzrail urıwlarına tiyisli qalalardın' hesh birin tan'lamadım. Al xalqım İzraildı basqarıw ushın Dawıttı tan'ladım“.

¹⁷ A'kem Dawıttın' ju'reginde İzraildın' Qudayı Jaratqan İyenin' atına arnap İbadatxana qurıw qa'lewi bar edi.

¹⁸ Biraq Jaratqan İye a'kem Dawıtqa: „Menin' atıma arnap İbadatxana qurıwdı niyet etipsen'. Bul jaqsı niyet.

¹⁹ Degen menen, Menin' atıma arnap bul İbadatxananı sen emes, al senin' bel balan' quradı“, – dedi.

²⁰ Jaratqan İye bergen so'zin orınladı. Jaratqan İyenin' aytqanınday, a'kem Dawıttan son' İzrail taxtına men otırdım ha'm İzraildın' Qudayı Jaratqan İyenin' atına arnap İbadatxana qurdım.

²¹ Usı İbadatxananın' ishinde men Jaratqan İyenin' Kelisim sandıg'ın qoyatug'ın bir orın tayarladım. Ata-babalarımızdı Mısırdan alıp shıqqanda, Jaratqan İyenin' olar menen du'zgen kelisimi usı sandıqtın' ishinde tur».

²² Sulayman Jaratqan İyege arnalg'an qurbanlıq orınnın' aldında, pu'tkil İzrail ja'miyetinin' qarsısında turıp, qolların ko'klerge jayıp bılay dedi:

²³ «İzraildın' Qudayı Jaratqan İye! Ko'kte de, jerde de Sag'an ten' keletug'ın quday joq. Sen O'zin'e shın ju'rekten boysınıp ju'rgen qulların' menen du'zgen kelisimin'e sadıq qalıp, olarg'a miyrimin'di ko'rsetesen'.

²⁴ Sen O'z qulın'a, a'kem Dawıtqa O'z awzın' menen aytqan so'zlerin'di bu'gin O'z qolların' menen iske asırdın'.

²⁵ Jaratqan İye, İzraildın' Qudayı! Endi a'kem Dawıtqa bergen mına so'zin'nin' de orınlanıwın qa'leymen. Sen og'an: „Eger urpaqların' da sag'an uqsap, Menin' aldımda o'z jollarınan adaspay ju'rse, senin' urpag'ın'nan İzrail taxtında otıratug'ın er adamnın' izi u'zilmeydi“, – degen edin'.

²⁶ İzraildın' Qudayı, endi O'z qulın', a'kem Dawıtqa bergen so'zin'di orınlay go'r!

²⁷ Rasında da, Quday jer betinde jasar ma edi? Sen ko'klerge, ko'klerdin' ko'klerine de sıymaysan'. Onın' aldında men qurg'an mına İbadatxana ne bolıptı?!

²⁸ Solay bolsa da, Qudayım Jaratqan İye, qulın'nın' duwaların ha'm o'tinishlerin esitip, bu'gin onın' jalbarınıwlarına ha'm duwasına qulaq sal.

²⁹ Ko'zlerin' ku'ni-tu'ni: „Menin' atım sol jerde boladı“, – dep O'zin' aytqan İbadatxanada bolsın ha'm qulın'nın' sol jerge qarap etken duwasın esit.

³⁰ Usı jerge qarap duwa etkeninde, qulın'nın' ha'm xalqın' İzraildın' jalbarınıwların esite go'r. Ko'klerdegi O'z ma'kanın'nan olarg'a qulaq tutıp, olardı keshire go'r.

³¹ Eger birew o'z jaqınına qarsı gu'na islewde ayıplansa ha'm onnan ant ishiw talap etilse, ol kelip, usı İbadatxanadag'ı Senin' qurbanlıq ornın' aldında ant ishse,

³² Sen olarg'a ko'klerden qulaq salıp, qulların'dı O'zin' hu'kim ete go'r. Jazıqlını isine say jazalap, jazıqsızdı a'dilligine say aqlay go'r.

³³ Eger xalqın' İzrail Senin' aldın'da gu'na islegeni ushın dushpanlarınan jen'ilse ha'm qaytadan Sag'an ju'z burıp, atın'dı ta'n alsa ha'm usı İbadatxanada duwa etip, Sag'an jalbarınsa,

³⁴ onda Sen olarg'a ko'klerden qulaq salıp, O'z xalqın' İzraildın' gu'naların keshir ha'm olardı ata-babalarına O'zin' bergen jerge qaytara go'r.

³⁵ Olar Sag'an qarsı gu'na islegeni ushın aspan jabılıp, jawın jawmag'anda, olar usı jerge qarap duwa etse, atın'dı ta'n alsa ha'm Sen olardı jazalag'anın'da, gu'nalarınan ju'z bursa,

³⁶ onda Sen olarg'a ko'klerden qulaq salıp, qulların'nın' ha'm xalqın' İzraildın' gu'naların keshire go'r, olarg'a ju'riwi tiyis bolg'an tuwrı joldı ko'rset ha'm xalqın'a mu'lik etip bergen jerin'e jawın jawdıra go'r.

³⁷ Eger elde ashlıq bolsa, oba payda bolsa, eginler quwrasa, kesellense, shegirtke ha'm qurt qaplasa, dushpanlar kelip, o'z qalalarının' birinde qamal qılsa, qanday da bir illet tarqasa yamasa apatshılıq basına tu'sse,

³⁸ sonda bir adam yamasa pu'tkil xalqın' İzrail duwa etip, jalbarınsa, ha'r bir adam o'zinin' basına tu'sken apatshılıqtı sezip, usı İbadatxanag'a qaray qolların jaysa,

³⁹ Sen ko'klerdegi O'z ma'kanın'nan olarg'a qulaq sala go'r ha'm olardı keshirip, islegen islerine qaray juwap bere go'r. Sebebi adam balasının' ju'reginde ne barın tek Sen g'ana bilesen'.

⁴⁰ Olar O'zin' atababalarımızg'a bergen bul jerde o'mir boyı Sennen qorqıp jasasın.

⁴¹ Eger xalqın' İzraildan bolmag'an jat jerli adam Senin' atın' sebepli uzaq elden kelse,

⁴² Senin' ullı atın', ku'shli qolın' ha'm O'z xalqın'a qol sozg'anın' haqqında esitip, usı İbadatxanag'a kelip duwa etse,

⁴³ ko'klerdegi O'z ma'kanın'nan og'an qulaq salıp, sorag'anların bere go'r. Solay etip, du'nyadag'ı barlıq xalıqlar xalqın' İzrail sıyaqlı Senin' atın'dı bilip, Sennen qorqsın ha'm men qurdırg'an usı İbadatxananın' Sag'an sıyınatug'ın orın ekenin bilsin.

⁴⁴ Eger xalqın' Sen jibergen jol boyınsha dushpanlarına qarsı sawashqa shıqsa ha'm Sen tan'lap alg'an qala menen Senin' atın'a arnap men qurg'an usı İbadatxanag'a qarap Sag'an, yag'nıy Jaratqan İyege duwa etse,

⁴⁵ o'klerden olardın' duwalarına ha'm jalbarınıwlarına qulaq sala go'r ha'm olarg'a ja'rdem bere go'r.

⁴⁶ Eger olar Sag'an qarsı gu'na islese, sebebi gu'na islemegen birde bir adam joq, Sen g'a'zeplenip, olardı dushpang'a ta'slim etsen' ha'm dushpan olardı tutqın etip, o'zinin' jaqın yamasa uzaq bir eline alıp ketse,

⁴⁷ olar da tutqın bolg'an elde ju'rip, esin jıyıp alg'annan keyin ta'wbege kelip: „Gu'na isledik, nızamsızlıq qıldıq, ayıpdarmız“, – dep jalbarınsa,

⁴⁸ olar o'zlerin tutqın qılg'an dushpan elinde ju'rip, shın ju'rekten ha'm jan-ta'ni menen Sag'an ju'z bursa, o'zlerinin' ata-babalarına bergen jerine, Sen tan'lap alg'an qalag'a ha'm Senin' atın'a arnap men qurg'an İbadatxanag'a qarap duwa etse,

⁴⁹ ko'klerdegi O'z ma'kanın'nan olardın' duwa ha'm jalbarınıwlarına qulaq sala go'r ha'm olardı qutqara go'r.

⁵⁰ Senin' ko'z aldın'da gu'na islegen xalqın'dı, olardın' Sag'an qarsı islegen barlıq gu'naların keshire go'r. Olardı tutqın etkenlerdin' olarg'a rehimli bolıwı ushın, olardı tutqın etkenlerge insap bere go'r.

⁵¹ Sebebi olar Mısırdan, temir oshaq ishinen O'zin' alıp shıqqan O'z xalqın' ha'm O'z miyrasın'.

⁵² Ko'zlerin' menin' ha'm xalqın' İzraildın' jalbarınıwlarında bolsın. Sag'an jalbarıng'anda ba'rqulla olardı esitip, juwap bere go'r.

⁵³ Sebebi, Quday İye! Sen ata-babalarımızdı Mısırdan alıp shıqqanın'da qulın' Muwsag'a aytqanın'day, pu'tkil du'nya xalıqları arasınan olardı O'zin'e miyras etip ajıratıp aldın'».

⁵⁴ Sulayman Jaratqan İyege duwa etiwin ha'm jalbarınıwların tamamlag'annan son', Jaratqan İyenin' qurbanlıq ornı janınan, qolların ko'klerge jayıwı menen diz sho'kken jerden turdı.

⁵⁵ Ol tik turıp, qattı dawıs penen pu'tkil İzrail ja'miyetine bılay dep pa'tiya berdi:

⁵⁶ «O'z so'zinde turıp, xalqı İzrailg'a tınıshlıq bergen Jaratqan İyege alg'ıslar bolsın! Onın' qulı Muwsa arqalı aytqan iygilikli so'zlerinin' hesh biri orınlanbay qalmadı.

⁵⁷ Qudayımız Jaratqan İye ata-babalarımız benen birge bolg'anı sıyaqlı, bizler menen de birge bolsın, bizlerdi ta'rk etpesin ha'm taslap ketpesin.

⁵⁸ O'zinin' jollarınan ju'riwimiz, ata-babalarımızg'a bergen buyrıqlarına, qag'ıydalarına ha'm nızamlarına boysınıp jasawımız ushın, bizlerdin' ju'reklerimizdi O'zine qaratsın.

⁵⁹ Awa, Jaratqan İye aldında jalbarınıp aytqan bul so'zlerim ku'ni-tu'ni Qudayımız Jaratqan İyenin' yadında bolıp, bul qulının' ha'm xalqı İzraildın' ku'ndelikli mu'ta'jliklerin berip tursın.

⁶⁰ Solay etip, barlıq xalıqlar Jaratqan İyenin' Quday ekenin ha'm Onnan basqa quday joq ekenin bilip qoysın.

⁶¹ Bu'gingidey, Onın' qag'ıydaları boyınsha jasaw ha'm buyrıqların orınlaw ushın, pu'tkil ju'regin'izdi Qudayımız Jaratqan İyege arnan'lar».

⁶² Son'ınan patsha ha'm pu'tkil İzrail xalqı Jaratqan İyege arnap qurbanlıq shaldı.

⁶³ Sulayman jigirma eki mın' bas bug'a ha'm bir ju'z jigirma mın' bas qoydı Jaratqan İyege arnap, tatıwlıq qurbanlıg'ı ushın shaldı. Solay etip, patsha ha'm pu'tkil İzrail xalqı Jaratqan İyenin' İbadatxanasın bag'ıshladı.

⁶⁴ Usı ku'ni patsha Jaratqan İyenin' İbadatxanasının' aldındag'ı ha'wlinin' ortang'ı bo'legin de muxaddes qılıp ayırıp, jandırılatug'ın qurbanlıqlardı, g'a'lle sadaqaların ha'm tatıwlıq qurbanlıqlarının' mayların sol jerde berdi. O'ytkeni Jaratqan İyenin' aldındag'ı qoladan islengen qurbanlıq ornına jag'ılatug'ın qurbanlıqlar, g'a'lle sadaqaları ha'm tatıwlıq qurbanlıqlarının' mayları sıymay ketti.

⁶⁵ Sonda Sulayman ha'm u'lken ja'miyet – Lebo-Xamattan Mısır shegarasındag'ı sayg'a deyingi jerlerden kelgen pu'tkil İzrail xalqı Qudayımız Jaratqan İyenin' aldında eki ha'pte, ulıwma on to'rt ku'n bayramladı.

⁶⁶ Jeti ku'nlik bayram tamam bolg'annan keyin, segizinshi ku'ni Sulayman xalıqqa ruxsat berdi. Olar da patshag'a pa'tiya berip, Jaratqan İyenin' qulı Dawıtqa ha'm xalqı İzrailg'a islegen jaqsılıqları ushın kewli tolıp, quwanısh penen u'ylerine qayttı.