3 Patshalar 9 bob

Jaratqan İyenin' Sulaymang'a ja'ne ko'riniwi(1-9),Sulaymannın' pitim du'ziwi(10-28).

¹ Sulayman Jaratqan İyenin' İbadatxanasın ha'm o'zinin' sarayın salıp, niyetlegen isinin' ha'mmesin tamamlag'annan son',

² Gibonda ko'ringeni sıyaqlı, Jaratqan İye og'an ja'ne ko'rindi.

³ Ol Sulaymang'a bılay dedi: «Men senin' duwaların'dı ha'm jalbarınıwların'dı esittim. Atımnın' ma'n'gige sol jerde bolıwı ushın, sen Mag'an arnap qurg'an mına İbadatxananı muxaddes qıldım. Menin' ko'zlerim ha'm ju'regim ba'rqulla sol jerde boladı.

⁴ Sag'an kelsek, a'ken' Dawıt sıyaqlı Menin' aldımda hadal ju'rek ha'm a'dillik penen ju'rsen', barlıq buyrıqlarımdı orınlap, qag'ıyda ha'm nızamlarıma boysınıp jasasan',

⁵ onda: „İzrail taxtınan senin' urpag'ın'nın' izi u'zilmeydi“ – dep a'ken' Dawıtqa bergen so'zimde turıp, İzrail eli u'stinen senin' patshalıg'ın'dı ma'n'gige turatug'ın qılaman.

⁶ Biraq eger sen ha'm senin' urpaqların' Mennen ju'z burıp, sizlerge bergen buyrıq ha'm qag'ıydalarıma boysınbay, ketip qalsan'ız ha'm basqa qudaylarg'a xızmet etip, olarg'a tabınsan'ız,

⁷ onda Men İzraildı O'zim bergen jerden shıg'arıp taslayman ha'm O'z atım ushın muxaddes qılg'an mına İbadatxananı ta'rk etemen. Sonda İzrail pu'tkil xalıqlar arasında a'psanag'a aylanıp, ku'lkige qaladı.

⁸ Al mına ko'rkem İbadatxana qarabaqanag'a aylanadı. Sonda onın' janınan o'tip baratırg'an ha'r bir adam hayran qalıp, qorqınısh penen: „Jaratqan İye bul eldi ha'm mına İbadatxananı ne ushın bul awhalg'a saldı eken?“ – dep soraytug'ın boladı.

⁹ Keyin olar: „İzrail xalqı ata-babaların Mısırdan alıp shıqqan Qudayı Jaratqan İyeni ta'rk etip, basqa qudaylarg'a jabısıp aldı ha'm olarg'a tabınıp, xızmet etti. Sonlıqtan Jaratqan İye olardı usı apatshılıqqa duwshar etti“, – deydi».

¹⁰ Sulayman eki imarattı: Jaratqan İyenin' İbadatxanası menen o'zinin' sarayın jigirma jılda pitkerdi.

¹¹ Bul isler ushın Tir patshası Xiram Sulaymang'a kereginshe kedr menen sa'rwi ag'ashların ha'm altın jetkerip berdi. Sol sebepli Sulayman Xiramg'a Galila u'lkesindegi jigirma qalanı berdi.

¹² Biraq Xiram Tirden kelip, Sulaymannın' o'zine bergen qalaların ko'rgende, bul qalalar og'an unamadı.

¹³ Sonda Xiram Sulaymang'a: «Tuwısqanım, mag'an bergen qalaların' qanday qalalar o'zi?» – dedi ha'm bul jerdi Kabul dep atadı. Olar ha'zir de solay ataladı.

¹⁴ Xiram patshag'a bir ju'z jigirma talant altın jibergen edi.

¹⁵ Patsha Sulayman Jaratqan İyenin' İbadatxanasın, o'zinin' sarayın, Millonı, Erusalimnin' diywalların, Xasor, Megiddo ha'm Gezer qalaların qurdırıw ushın ma'rdikarg'a adam jıynag'an edi.

¹⁶ Gezer qalasın Mısır faraonı qolg'a alıp, o'rtep jibergen edi. Al sol jerde jasap atırg'an kenaanlılardı bolsa, qırıp taslap, qalanı Sulaymang'a hayallıqqa bergen qızına enshige bergen edi.

¹⁷ Sol sebepli Sulayman Gezer qalasın qayta qurg'an edi. Ol ja'ne to'mengi Beyt-Xorondı,

¹⁸ Baalattı ha'm Yahuda jerindegi sho'ldegi Tamardı,

¹⁹ o'zine tiyisli pu'tkil telekleri bar qalalardı, sawash arbaları menen atları turatug'ın qalalardı qayta qurıp, bekkemledi. Bunnan tısqarı, Sulayman Erusalimde, Lebanon tawlarında ha'm qol astındag'ı ha'mme qalalarda qa'legen na'rselerin qurdı.

²⁰ U'lkede İzrail xalqınan bolmag'an xalıqlar: amor, xett, periz, xiw ha'm ebus xalıqları qalıp ketken edi.

²¹ İzrail xalqı olardı tolıq joq qıla almag'an edi. Sulayman bul xalıqlardın' urpaqların ma'rdikarg'a alıp, qul etti. Bul ha'zir de dawam etpekte.

²² Biraq Sulayman İzrail xalqının' birewin de qara jumısqa salmadı. Olardı a'sker, xızmetker, basshı, a'skerbası, arbalı a'skerlerdin' basshısı etip qoydı.

²³ Sulayman ju'rgizip atırg'an islerdin' basında jumıs islep atırg'an xalıqtı basqarıp turg'an bes ju'z eliw qadag'alawshı basshı bar edi.

²⁴ Faraonnın' qızı Dawıttın' qalasınan Sulaymannın' o'zi ushın qurdırg'an sarayına ko'ship o'tkennen son', Sulayman Millonı saldırdı.

²⁵ Sulayman Jaratqan İye ushın arnap qurdırg'an qurbanlıq orında jılına u'sh ret jandırılatug'ın qurbanlıqlar ha'm tatıwlıq qurbanlıqların beretug'ın ha'm sonın' menen birge Jaratqan İyenin' aldında tu'tetki tu'tetetug'ın edi. Solay etip, ol İbadatxananın' qurılısın tamamladı.

²⁶ Patsha Sulayman Edom jerinde, Qamıs ten'izi jag'asında jaylasqan Elat janındag'ı Esion-Geberde kemeler soqtırdı.

²⁷ Xiram ten'izdi jaqsı biletug'ın kemeshilerin Sulaymannın' adamları menen birge kemede Ofirge jiberdi.

²⁸ Olar Ofirge barıp, patsha Sulaymang'a to'rt ju'z jigirma talant altın a'kelip berdi.