4 Patshalar 18 bob
1 İzrail patshası Ela ulı Hosheanın' patshalıg'ının' u'shinshi jılında, Axaz ulı Xizkiya Yahudag'a patsha boldı.
2 Xizkiya jigirma bes jasında patsha bolıp, Erusalimde jigirma tog'ız jıl patshalıq etti. Onın' anasının' atı Abiya bolıp, ol Zexariyanın' qızı edi.
3 Ol da atası Dawıtqa uqsap, Jaratqan İyenin' na'zerinde tuwrı bolg'an islerdi isledi.
4 Ol sıyınıw orınların joq qıldı, kiyeli taslardı maydalap, kiyeli ag'ashın kesip tasladı, Muwsa islegen mıs jılandı da bo'lip, maydaladı. Sebebi izraillılar onı Nexushtan dep atap, sol ku'nge deyin og'an arnap tu'tetki tu'tetetug'ın edi.
5 Patsha Xizkiya İzraildın' Qudayı Jaratqan İyege u'mit bayladı. Onnan burın da, onnan keyin de, Yahuda patshaları arasında og'an uqsag'anı bolmadı.
6 Ol Jaratqan İyege sadıq bolıp, Onnan ju'z burmadı ha'm Jaratqan İyenin' Muwsa arqalı bergen buyrıqların orınladı.
7 Sonlıqtan Jaratqan İye onın' menen birge edi. Xizkiya ne islese de, tabısqa eristi. Ol Assiriya patshasına qarsı bas ko'terip, og'an boysınıwdan bas tarttı.
8 Ol Gaza ha'm onın' a'tirapına shekem, awıllardan baslap, qorg'anlı qalalarg'a shekemgi ha'mme jerlerdegi filistlerdi qırıp tasladı.
9 Xizkiyanın' patshalıg'ının' to'rtinshi jılında, İzrail patshası Ela ulı Hosheanın' patshalıg'ının' jetinshi jılında, Assiriya patshası Shalmanasar Samariyag'a hu'jim jasap, qalanı qamal etti.
10 Ol u'sh jıldan son', Samariyanı qolg'a kirgizdi. Solay etip, Xizkiyanın' patshalıg'ının' altınshı, İzrail patshası Hosheanın' patshalıg'ının' tog'ızınshı jılında, Samariya basıp alındı.
11 Assiriya patshası izraillılardı Assiriyag'a su'rgin etip, olardı Xalaxqa, Xabor da'ryasının' boyındag'ı Gozang'a ha'm Midiya qalalarına ornalastırdı.
12 Bul waqıya izraillılardın' Qudayı Jaratqan İyenin' so'zine qulaq aspag'anı, Onın' kelisimin buzg'anı sebepli ju'z berdi. Sebebi izraillılar Qudayı Jaratqan İyenin' qulı Muwsa arqalı bergen buyrıqlarına boysınbadı. Olardı tın'lamadı da, orınlamadı da.
13 Xizkiyanın' patshalıg'ının' on to'rtinshi jılında, Assiriya patshası Sanxerib Yahudanın' barlıq qorg'anlı qalalarına hu'jim jasap, olardı basıp aldı.
14 Sonda Yahuda patshası Xizkiya Laxish qalasındag'ı Assiriya patshasına: «Men ayıplıman, menin' jerimnen ketsen'iz. Ne talap etsen'iz de, to'leymen», – dep xabar jiberdi. So'ytip, Assiriya patshası Yahuda patshası Xizkiyag'a u'sh ju'z talant gu'mis ha'm otız talant altın salıq saldı.
15 Xizkiya Jaratqan İyenin' İbadatxanasınan ha'm saraydın' qaznasınan tabılg'an gu'mistin' ha'mmesin og'an berdi.
16 Sonday-aq Yahuda patshası Xizkiya Jaratqan İyenin' İbadatxanasının' esiklerin ha'm jaqlawların altın menen qaplatqan edi. Ol o'zi qaplatqan usı altınlardı qırshıp alıp, olardı da Assiriya patshasına berdi.
17 Degen menen, Assiriya patshası bas sa'rka'rdasın, a'skeriy wa'kilin ha'm bas wa'zirin u'lken armiya menen Laxishten Erusalimge, patsha Xizkiyag'a jiberdi. Olar Erusalimge kelip, kir juwıwshının' atızına baratug'ın joldag'ı, Joqarg'ı hawızg'a suw quyılatug'ın jerde toqtadı.
18 Olar patshanı shaqırttı. Saray basqarıwshısı Xilkiya ulı Elyakim, xatker Shebna ha'm jılnamashı Asaf ulı İoax assiriyalılarg'a bardı.
19 Sonda Assiriya patshasının' bas wa'ziri olarg'a bılay dedi: – Ullı patsha, Assiriya patshasının' mına so'zlerin Xizkiyag'a jetkizin': «Nen'e u'mit baylap tursan'?
20 Urıs ushın joba ha'm ku'sh bar dep aytasan', biraq sen tek bos so'zlerdi aytıp tursan'. Sen kimge su'yenip, mag'an qarsı bas ko'terip tursan'?
21 Mine, sen o'zine su'yengennin' alaqanın tesetug'ın sınıq qamıs hasag'a uqsag'an Mısırg'a su'yenip tursan'. Mısır patshası faraon o'zine isengenlerdin' ha'mmesine usınday.
22 Ba'lkim mag'an: Bizler Qudayımız Jaratqan İyege u'mit baylaymız, – dersizler. Yahuda ha'm Erusalim xalqına: Tek Erusalimde, mına qurbanlıq orında sıyının'lar, – dep sıyınıw orınların ha'm qurbanlıq orınların joq qılg'an Xizkiya emes pe edi?»
23 Endi sen, menin' mırzam Assiriya patshası menen mawasag'a kel. Eger men sag'an eki mın' bas at bersem, olarg'a minetug'ın sonsha adam taba alar ma edin'?
24 Solay eken, mırzamnın' en' ha'lsiz a'skerbasısın da jen'e almaysan'-g'o. Yamasa Mısırdın' sawash arbaları menen atlılarına isenip tursan' ba?
25 «Qala berse, men bul jerdi wayran etiw ushın Jaratqan İyenin' erkisiz keldim be? Jaratqan İye mag'an: Sol u'lkege hu'jim qılıp, onı wayran et, – dedi».
26 Xilkiya ulı Elyakim, Shebna ha'm İoax bas wa'zirge bılay dep juwap berdi: «Bul qulların'ız benen arameyshe so'ylese berin', tu'sinemiz. Diywal u'stindegi xalıqqa esittirip, bizler menen evrey tilinde so'ylespen'iz».
27 Bas wa'zir olarg'a: «Mırzam meni bul so'zlerdi tek mırzan'a ha'm sag'an aytıw ushın emes, al sizler menen birge o'z da'retin jep, sidigin ishiwge duwshar bolatug'ın diywal u'stinde otırg'an adamlarg'a da jetkeriw ushın jiberdi», – dedi.
28 Son'ınan bas wa'zir ornınan turıp, evrey tilinde bılay dep baqırdı: «Ullı patshanın', Assiriya patshasının' so'zlerine qulaq salın'lar!
29 Patsha bılay deydi: „Xizkiya sizlerdi aldamay-aq qoysın. Ol sizlerdi menin' qolımnan qutqara almaydı.
30 Ol: Jaratqan İye bizlerdi qutqaradı, qala Assiriya patshasının' qolına berilmeydi, – dep sizlerdi Jaratqan İyeden u'mitlendirmesin“.
31 Xizkiyag'a qulaq salman'lar. Sebebi Assiriya patshası bılay deydi: „Menin' menen jarasıp, mag'an kelin'ler. Sonda ha'r bir adam o'z ju'ziminin' ha'm a'njir ag'ashının' miywesinen jep, o'z suw saqlag'ıshınan suw ishedi.
32 on'ınan men kelip, sizlerdi biydayı, sharabı, nanı, ju'zimzarları, za'ytu'n mayı ha'm palı mol bolg'an, o'z u'lken'izge uqsag'an bir u'lkege ko'shiremen. Sonda o'lmey, tiri qalasızlar. Xizkiyanın': Jaratqan İye bizlerdi qutqaradı, – dep aldag'anına qulaq salman'lar.
33 Qaysı xalıqtın' qudayı o'z u'lkesin Assiriya patshasının' qolınan qutqara alg'an?
34 Xamat ha'm Arpadtın' qudayları qayda? Sefarwayım, Hena ha'm İwwanın' qudayları qayda? Samariya qudayları qayda? Olar Samariyanı menin' qolımnan qutqara aldı ma?
35 Usı ellerdin' qudaylarının' qaysı biri o'z jerin menin' qolımnan qutqara aldı? Solay eken, Jaratqan İye Erusalimdi menin' qolımnan qalay qutqaradı?“»
36 Xalıq u'ndemedi, juwap ta qaytarmadı. O'ytkeni patsha Xizkiya xalıqqa og'an juwap bermewdi buyırg'an edi.
37 Saray basqarıwshısı Xilkiya ulı Elyakim, xatker Shebna ha'm jılnamashı Asaf ulı İoax kiyimlerin jırtıp, Xizkiyanın' aldına keldi ha'm Assiriya patshasının' bas wa'zirinin' so'zlerin og'an aytıp berdi.
