4 Patshalar 21 bob

Yahuda patshası Menashshe(1-18),Yahuda patshası Amon(19-26).

¹ Menashshe on eki jasında patsha boldı ha'm Erusalimde eliw bes jıl patshalıq etti. Onın' anasının' atı Xefsiba edi.

² Ol Jaratqan İyenin' İzrail xalqının' aldınan quwıp jibergen xalıqlarının' jerkenishli jaman islerine eliklep, Jaratqan İyenin' na'zerinde jaman bolg'an islerdi isledi.

³ A'kesi Xizkiya joq qılg'an sıyınıw orınların qayta tikledi. İzrail patshası Axabqa uqsap, Baalg'a arnap qurbanlıq orınlar qurdı, kiyeli ag'ashın ornattı ha'm pu'tkil aspan denelerine tabınıp, olarg'a xızmet etti.

⁴ Menashshe Jaratqan İyenin' İbadatxanasına, yag'nıy Jaratqan İyenin': «Men Erusalimde O'z atımdı ornataman», – degen İbadatxanasına basqa qudaylarg'a arnap, qurbanlıq orınlar qurdırdı.

⁵ Ol Jaratqan İyenin' İbadatxanasının' eki ha'wlisine de barlıq aspan denelerine arnap qurbanlıq orınlar qurdı.

⁶ Ol o'z ulın otta jandırıp qurbanlıqqa berdi, pal ashtı, belgilerdi jorıdı, a'rwaq ha'm ruwxlardı shaqırıwshılarg'a ma'sla'ha't saldı. Ol Jaratqan İyenin' na'zerinde jaman bolg'an islerdi islep, Onı g'a'zeplendirdi.

⁷ Menashshe o'zi isletken Ashera butın Jaratqan İyenin' İbadatxanasına qoydı. Jaratqan İye Dawıtqa ha'm onın' ulı Sulaymang'a: «Bul İbadatxanada ha'm İzrail urıwları arasınan tan'lap alg'an qalam Erusalimde atımdı ma'n'gige ornataman.

⁸ Eger olar Menin' buyrıqlarıma ha'm qulım Muwsa buyırg'an barlıq Nızamlardı muqıyatlı tu'rde orınlap jasasa, onda İzrail xalqın o'zlerinin' ata-babalarına bergen jerden quwıp shıg'armayman», – degen edi

⁹ Biraq xalıq qulaq aspadı. Menashshenin' xalıqtı joldan azg'ırg'anı sonshelli, Jaratqan İyenin' İzrail xalqının' aldınan joq qılg'an xalıqlarınan da ko'birek jamanlıqlar isledi.

¹⁰ Jaratqan İye O'z qulları bolg'an payg'ambarlar arqalı bılay dedi:

¹¹ «Yahuda patshası Menashshe o'zinen burın sol jerde jasag'an amor xalqınan da jamanıraq jerkenishli islerdi islegeni, o'z butları menen yahudalılardı gu'nag'a baslag'anı ushın,

¹² İzraildın' Qudayı Jaratqan İye bılay deydi: „Men Yahuda elinin' ha'm onın' bas qalası Erusalimnin' basına esitken adamnın' ju'regin suwlalatug'ın bir apatshılıq jawdıraman.

¹³ Samariyag'a qollang'an o'lshew jibin ha'm Axabtın' u'y-ishine qollang'an o'lshemdi Erusalimge de qollanaman. Tabaqtı sıpırıp, to'n'kerip qoyg'anı sıyaqlı, Erusalimdi de solay sıpırıp tazalayman.

¹⁴ Xalqımnın' qalg'anlarınan ju'z buraman, olardı dushpanlarının' qolına tapsıraman. Dushpanları olardı tonap, talan-taraj etedi.

¹⁵ Sebebi olar Menin' na'zerimde jaman islerdi isledi ha'm ata-babaları Mısırdan shıqqan ku'nnen usı ku'nge deyin Menin' g'a'zebimdi keltirdi“».

¹⁶ Menashshe Jaratqan İyenin' na'zerinde jaman bolg'an islerdi islep, yahudalılarg'a isletken gu'nasına qosa, ju'da' ko'p ayıpsız qan to'gip, Erusalimdi basınan ayag'ına shekem qang'a batırdı.

¹⁷ Menashshenin' basqa isleri, ol islegen barlıq isler ha'm ol islegen gu'nalar haqqında Yahuda patshalarının' jılnama kitabında jazılg'an.

¹⁸ Menashshe o'lip, ata-babalarına qosıldı ha'm saraydın' Uzza dep atalatug'ın bag'ına jerlendi. Onın' ornına ulı Amon patsha boldı.

¹⁹ Amon jigirma eki jasında patsha bolıp, Erusalimde eki jıl patshalıq etti. Anasının' atı Meshullemet bolıp, ol iotbalı Xarustın' qızı edi.

²⁰ Amon da a'kesi Menashshege uqsap, Jaratqan İyenin' na'zerinde jaman bolg'an islerdi isledi.

²¹ Ol a'kesinin' jolınan ju'rdi, a'kesi tabıng'an butlarg'a xızmet etip, olarg'a tabındı.

²² Amon ata-babalarının' Qudayı Jaratqan İyeni ta'rk etti, Onın' jolınan ju'rmedi.

²³ Patsha Amonnın' xızmetshileri og'an qarsı til biriktirip, onı o'z sarayında o'ltirdi.

²⁴ Biraq u'lke xalqı Among'a qarsı til biriktirgenlerdin' ha'mmesin o'ltirdi ha'm onın' ornına ulı İoshiyanı patsha etip qoydı.

²⁵ Amon islegen basqa isler Yahuda patshalarının' jılnama kitabında jazılg'an.

²⁶ Amon Uzza bag'ındag'ı o'z qa'birine jerlendi. Onın' ornına ulı İoshiya patsha boldı.