4 Patshalar 24 bob
1 Yahuda patshası Ehoyakimnin' patshalıg'ı da'wirinde Babilon patshası Nabuxodonosor Yahudag'a hu'jim jasadı. Ehoyakim u'sh jıl og'an bag'ınıshlı bolıp, son'ınan og'an qarsı bas ko'terdi.
2 Jaratqan İye O'z qulları bolg'an payg'ambarlar arqalı aytqan so'zleri boyınsha, Yahudanı joq etiw ushın Babiloniya, Aram, Moab ha'm Ammon ellerinin' basqınshı toparların Yahudag'a jiberdi.
3 Bulardın' ha'mmesi Jaratqan İyenin' buyrıg'ı boyınsha Yahudanın' basına tu'sti. Menashshe islegen barlıq gu'nalar sebepli, Jaratqan İye onı O'z da'rgayınan quwıp shıg'armaqshı boldı.
4 Sebebi Jaratqan İye Menashshenin' ayıpsız qan to'gip, Erusalimdi ayıpsızlardın' qanına toltırg'anın keshiriwdi qa'lemedi.
5 Ehoyakimnin' basqa isleri ha'm ol islegen barlıq isler Yahuda patshalarının' jılnama kitabında jazılg'an.
6 Ehoyakim o'lip, ata-babalarına qosıldı, ornına ulı Ehoyakin patsha boldı.
7 Mısır patshası endi o'z jerinen sırtqa shıqpadı. Sebebi Babilon patshası Mısır shegarasındag'ı saydan Evfrat da'ryasına shekemgi Mısır patshasına tiyisli barlıq jerlerdi basıp alg'an edi.
8 Ehoyakin on segiz jasında patsha bolıp, Erusalimde u'sh ay patshalıq etti. Onın' anası erusalimli Elnatannın' qızı Nexushta edi.
9 Ehoyakin de a'kesi sıyaqlı Jaratqan İyenin' na'zerinde jaman bolg'an islerdi isledi.
10 Sol waqıtları Babilon patshası Nabuxodonosordın' a'skerleri Erusalimge qarsı ju'ris qılıp, qalanı qamal qıldı.
11 A'skerleri qalanı qamal qılg'anda, Babilon patshası Nabuxodonosordın' o'zi de qalag'a keldi.
12 Sonda Yahuda patshası Ehoyakin anası, wa'zirleri, basshıları ha'm saray xızmetshileri menen birge Babilon patshasına ta'slim boldı. Babilon patshası o'z patshalıg'ının' segizinshi jılında, Ehoyakindi tutqıng'a aldı.
13 Jaratqan İyenin' aldın ala aytqan so'zi boyınsha, Nabuxodonosor Jaratqan İyenin' İbadatxanasındag'ı ha'm patsha sarayındag'ı g'a'ziynelerdi alıp ketti. İzrail patshası Sulaymannın' Jaratqan İyenin' İbadatxanası ushın isletken altın buyımlarının' ha'mmesin sındırdı.
14 Ol ja'ne pu'tkil Erusalim turg'ınların: basshılardın', ma'rt jawıngerlerdin', ustalardın' ha'm temirshilerdin' barlıg'ın, ulıwma on mın' adamdı su'rgin etip alıp ketti. U'lkede jarlı xalıqtan basqa hesh kim qalmadı.
15 Babilon patshası Nabuxodonosor Ehoyakindi Babilong'a su'rgin etti. Onın' anasın, hayalların, saray xızmetshilerin ha'm u'lkenin' elbasshıların da Erusalimnen Babilong'a su'rgin etti.
16 Bunnan tısqarı Babilon patshası jeti mın' saylandı a'skerdi, mın' usta ha'm temirshini Babilong'a su'rgin etti. Olardın' ha'mmesi urısqa jaramlı ha'm ma'rt jawıngerler edi.
17 Babilon patshası Ehoyakinnin' ornına Ehoyakinnin' a'kesinin' inisi Mattaniyanı patsha etip qoydı ha'm atın Sedekiya dep o'zgertti.
18 Sedekiya jigirma bir jasında patsha bolıp, Erusalimde on bir jıl patshalıq etti. Onın' anasının' atı Xamutal bolıp, ol libnalı Eremiyanın' qızı edi.
19 Ehoyakimge uqsap, Sedekiya da Jaratqan İyenin' na'zerinde jaman bolg'an islerdi isledi.
20 Jaratqan İyenin' Erusalim menen Yahudag'a g'a'zebi kelgeni sonshelli, olardı Ol O'z da'rgayınan shıg'arıp tasladı.Sedekiya Babilon patshasına qarsı bas ko'terdi.
