4 Patshalar 4 bob
1 Bir ku'ni payg'ambarlar toparınan birinin' hayalı dad salıp kelip, Elishag'a: – Qulın'ız bolg'an ku'yewim o'ldi. Siz onın' Jaratqan İyeden qorqıp jasag'anın bilesiz. Endi bolsa, bizge qarız bergen adam eki ulımdı qul qılıp alıp ketiwge kelip tur, – dedi.
2 Elisha og'an: – Sag'an qanday ja'rdem bersem eken? Aytshı, u'yin'de ne bar? – dedi. Hayal: – Shorın'ızdın' u'yinde kishkene bir gu'ze za'ytu'n mayınan basqa hesh na'rse joq, – dedi.
3 Elisha hayalg'a bılay dedi: – Barıp, ha'mme qon'sıların'nan bos ıdısların sorap al. İlajı bolg'ansha ko'p ıdıs jıyna.
4 Keyin ulların' menen u'yge kir de, qapını ildirip alıp, ıdıslardın' ha'mmesine za'ytu'n mayın quy. Tolg'an ıdıslardı shetke alıp qoya ber.
5 Hayal Elishanın' janınan ketti. Son'ınan ol ulları menen birge u'yge kirip, esikti ildirdi. Ulları ıdıslardı alıp berip turdı, al hayal maydı quyıp turdı.
6 Ha'mme ıdıslar tolg'anda, ol ullarının' birine: – Ja'ne bir ıdıs alıp ber, – dedi. Ulı og'an: – Basqa ıdıs qalmadı, – dep juwap berdi. Sonda maydın' ag'ıwı da toqtadı.
7 Hayal kelip, Qudaydın' adamına bolg'an waqıyanı aytıp berdi. Ol hayalg'a: «Barıp, maydı sat ta, qarızın'dı to'le. Qalg'anın ulların' menen birge ku'n ko'risin' ushın paydalan», – dedi.
8 Bir ku'ni Elisha Shunemge keldi. Ol jerde jasaytug'ın bir abıraylı hayal Elishanı u'yine mira't etip, awqatlanıwg'a ko'ndirdi. Son'ın ala Elisha Shunemnen ha'r o'tkende, awqatlanıw ushın sol u'yge baratug'ın boldı.
9 Aradan biraz waqıt o'tkennen keyin hayal ku'yewine: «Bul jerden tez-tez o'tip turatug'ın sol adamnın' Qudaydın' muxaddes adamı ekenin bildim.
10 Kel, u'yimizdin' u'stine kishkene bir bo'lme salıp, ishine ko'rpe-to'sek, stol, otırg'ısh ha'm shıra qoyayıq. Ol bizlerge kelgende, sol jerde boladı», – dedi.
11 Bir ku'ni Elisha kelip, joqarg'ı bo'lmege shıg'ıp jattı.
12 Ol xızmetshisi Gexaziyge: «Shunemli hayaldı shaqır», – dedi. Ol hayaldı shaqırdı, hayal Elishanın' aldına kelgende,
13 Elisha Gexaziyge bılay dedi: «Hayalg'a bılay dep ayt: „Bizlerge ko'rsetip atırg'an g'amxorlıg'ın'dı sag'an ne menen qaytarayıq? Sen haqqında patsha menen yamasa sa'rka'rda menen so'yleseyin be?“» Hayal og'an: «Yaq, raxmet. Men o'z xalqımnın' arasında kemshiliksiz jasap atırman, ha'mme na'rsem bar», – dedi.
14 Son'ınan Elisha Gexaziyge: – Onda, bul hayal ushın ne islesem eken? – dedi. Gexaziy: – Onın' ulı joq eken, ku'yewi de qartayıp qalıptı, – dedi.
15 Elisha: – Hayaldı shaqır, – dedi. Gexaziy hayaldı shaqırdı. Ol kelip, qapının' awzında turdı.
16 Elisha hayalg'a: – Kelesi jılı usı waqıtta bawırın'da bir ulın' boladı, – dedi. Hayal og'an: – Yaq mırzam, Qudaydın' adamı, shorın'ızdı aldaman', – dedi.
17 Biraq Elishanın' aytqanınday, hayal ha'miledar bolıp, kelesi jılı sonday waqıtta bir ul tuwdı.
18 Bala o'sti. Ol bir ku'ni oraqshılardın' basında bolıp atırg'an a'kesinin' janına bardı.
19 Sol jerde bala birden a'kesine: «Way, basım awırıp tur, way basım!» – dep baqıra basladı. A'kesi xızmetshisine: «Balanı anasına alıp bar», – dedi.
20 Xızmetshi balanı ko'terip, anasına alıp keldi. Bala tu'ske deyin anasının' dizesinde otırıp, keyin qaytıs boldı.
21 Hayal joqarg'ı bo'lmege shıg'ıp, balanı Qudaydın' adamının' to'segine jatqızdı da, esikti jawıp, sırtqa shıqtı.
22 Ol ku'yewin shaqırıp: – İltimas, mag'an bir xızmetshi menen bir eshek jibersen'. Men tez Qudaydın' adamına barıp kelemen, – dedi.
23 Ku'yewi og'an: – Ne ushın og'an bu'gin barg'ın' kelip qaldı? Bu'gin Jan'a ay bayramı da, Shabbat ku'ni de emes g'oy, – dedi. Biraq hayal: – Zıyanı joq, – dedi.
24 Hayal eshekti ertlep, xızmetshisine: «Eshekti ayda, men aytpag'anımsha ju'risti pa'seytpe», – dedi.
25 Hayal ketip, Karmel tawına, Qudaydın' adamının' janına jaqınladı. Qudaydın' adamı hayaldı uzaqtan ko'rgende, xızmetshisi Gexaziyge: «Qara, shunemli hayal kiyatır!
26 Tez aldınan shıg'ıp onnan: „Qalaysan', ku'yewin' ha'm balan' qalay?“ – dep sora», – dedi. Hayal Gexaziyge: «Ha'mmesi jaqsı», – dep juwap berdi.
27 Hayal tawg'a shıg'ıp, Qudaydın' adamının' janına keldi de, onın' ayaqlarına jabıstı. Gexaziy hayaldı shetke shıg'armaqshı bolg'anda, Qudaydın' adamı og'an: «Og'an tiyme, onın' kewli qabarg'an, al Jaratqan İye bunı mennen jasırıp, aytpadı», – dedi.
28 Hayal og'an: «Mırzam, men sizden ul sorap pa edim? „Meni aldaman'ız“, – degen joq pa edim?» – dedi.
29 onda Elisha Gexaziyge: «Belin'di buwıp, menin' tayag'ımdı qolın'a al da, jolg'a shıq. Eger birewdi ushıratsan', sa'lem berme, eger birew sag'an sa'lem berse, sa'lemin alma. Barıp, tayag'ımdı balanın' betine qoy», – dedi.
30 Balanın' anası Elishag'a: «Tiri Jaratqan İye haqı ha'm sizin' tiriligin'iz haqı ant ishemen: sizsiz hesh jaqqa ketpeymen», – dedi. Sonlıqtan Elisha da hayalg'a erip jolg'a shıqtı.
31 Gexaziy olardan aldınıraq barıp, tayaqtı balanın' betine qoydı. Biraq ses te, tirilik belgisi de bolmag'annan son', Gexaziy olardın' aldınan shıg'ıp: «Bala tirilmedi», – dep xabarladı.
32 U'yge kirgende, Elisha o'zinin' to'seginde o'lgen balanın' jatırg'anın ko'rdi.
33 Ol bo'lmege kirip, esikti jawdı ha'm Jaratqan İyege duwa etti.
34 Keyin ol to'sekke shıg'ıp, balanın' u'stine jattı. Awzın balanın' awzına, ko'zlerin ko'zlerine, alaqanların alaqanlarına qoyıp, balanın' u'stine sozılıp jatqanda, balanın' denesi ısıy basladı.
35 Ol turıp, bo'lmenin' ishinde oyaqtan-buyaqqa ju'rdi, son'ınan ja'ne barıp, balanın' u'stine sozılıp jattı. Bala jeti ret tu'shkirdi de, ko'zlerin ashtı.
36 Elisha Gexaziydi shaqırıp og'an: «Shunemli hayaldı shaqır», – dedi. Ol hayaldı shaqırdı. Hayal kelgende, Elisha og'an: «Ulın'dı al», – dedi.
37 Hayal Elishanın' ayaqlarına jıg'ılıp, bası jerge tiygenshe iyilip ta'jim etti. Son'ınan ulın alıp, shıg'ıp ketti.
38 Elisha Gilgalg'a qaytıp keldi. Ol jerdi ashlıq jaylag'an bolıp, payg'ambarlar toparındag'ılar onın' aldında otırg'an edi. Ol xızmetshisine: «U'lken qazandı otqa qoyıp, payg'ambarlar toparındag'ılarg'a sorpa pisirip ber», – dedi.
39 Sonda olardın' biri ko'k sho'p terip keliw ushın atızg'a ketti ha'm iyt tu'ynekti tawıp, onın' jemisine etegin toltırıp keldi. Awqat pisirip atırg'anlar onın' ne ekenin bilmey, maydalap tuwrap qazang'a salıp jiberdi.
40 Awqat ha'mmege quyıp berildi. Biraq adamlar awqattı tatıp ko'riwden: «Ha'y, Qudaydın' adamı! Mına awqat za'ha'r-g'o», – dep baqırısa basladı. Hesh kim onı ishe almadı.
41 Sonda Elisha: «Un alıp kelin'ler», – dedi. Ol undı qazang'a saldı da: «Endi adamlarg'a quyıp berin'ler, ishsin», – dedi. Qazanda zıyanlı hesh na'rse qalmadı.
42 Bir ku'ni Baal-Shalishadan bir adam Qudaydın' adamına o'zinin' arpasının' birinshi zu'ra'a'tinen jabılg'an jigirma nan ha'm taza jıynalg'an biydaydın' masaqlarınan dorbasına salıp alıp keldi. Elisha xızmetshisine: – Adamlarg'a u'lestirip ber, jesin, – dedi.
43 Xızmetshisi og'an: – Bul ju'z adamg'a ne boladı? – dedi. Elisha og'an: – Adamlarg'a u'lestirip ber, jesin. Sebebi Jaratqan İye bılay deydi: „Jep toyadı, awısıp ta qaladı“, – dedi.
44 Sonda xızmetshi olardı adamlardın' aldına qoydı. Jaratqan İyenin' aytqanınday, olar jep toydı ha'm awısıp ta qaldı.
