1 Jılnama 12 bob

Dawıttın' Siklagtag'ı ja'rdemshileri (1-22), Dawıttın' Xebrondag'ı ordası (23-40).

¹ Dawıt Kish ulı Shauldan qashıp, Siklagta jasap ju'rgen waqıtları, ayırım a'skerler kelip, og'an qosıldı. Urıslarda Dawıtqa ja'rdem bergen bul jawıngerler

² Benyamin urıwınan, Shauldın' ag'ayinlerinen edi. Bul sadaqshılar oq jay menen qurallang'an bolıp, on' qolı menen de, shep qolı menen de oq jay tartıp, saqpanda tas atatug'ın edi.

³ Olardın' basshısı gibalı Shemanın' ulı Axiezer bolıp, inisi İoash onın' ja'rdemshisi edi. Basqa jawıngerler: Azmawettin' ulları Eziel ha'm Pelet, sonday-aq, Beraxa ha'm anatotlı Ehu,

⁴ otız batırdın' birewi, yag'nıy olardın' basshısı gibonlı İshmaya, sonday-aq, Eremiya, Yaxaziel, Yuxanan, gederalı İozabad,

⁵ Eluzay, Erimot, Bealiya, Shemariya, xaruflı Shefatiya,

⁶ Qoraxtın' urpag'ınan bolg'an Elqana, İshshiya, Azarel, İoezer, Yashobam,

⁷ gedorlı Eroxamnın' ulları İoela ha'm Zebadiya.

⁸ Dawıt sho'ldegi qorg'anda bolg'anda, gadlılardın' birazı og'an qosıldı. Olar urısqa tayar ma'rt jawıngerler bolıp, qalqan ha'm nayzanı islete alatug'ın edi. Olardın' ju'zleri arıslanday aybatlı, o'zleri tawlardag'ı kiyik kibi shaqqan edi.

⁹ Olardın' basshısı Ezer edi. Ekinshisi Obadiya, u'shinshisi Eliab,

¹⁰ to'rtinshisi Mishmanna, besinshisi Eremiya,

¹¹ altınshısı Attay, jetinshisi Eliel,

¹² segizinshisi Yuxanan, tog'ızınshısı Elzabad,

¹³ onınshısı Eremiya, on birinshisi Maxbannay edi.

¹⁴ Usı gadlılar orda a'skerbasıları edi. Olardın' en' ha'lsizleri ju'z adamg'a, en' ku'shlileri mın' adamg'a bas keletug'ın edi.

¹⁵ Birinshi ayda, İordan tolıp tasıp turg'an waqıtta, olar arg'ı jag'ag'a kesip o'tip, oypatlıqtın' shıg'ıs ha'm batıs ta'repinde jasap atırg'anlardın' ha'mmesin bas sawg'alap qashıwg'a ma'jbu'r etti.

¹⁶ Benyamin ha'm Yahuda urıwlarındag'ı bazı adamlar da Dawıttın' janına, qorg'ang'a keldi.

¹⁷ Dawıt olardı ku'tip alıwg'a shıqtı ha'm olarg'a bılay dedi: «Eger mag'an ja'rdem beriw ushın jaqsı niyet penen kelgen bolsan'ız, qatarımızg'a qosılıwın'ızg'a ırazıman. Al eger hesh kimge zorlıq islemegen bolsam da, meni dushpanlarıma uslap beriwge kelgen bolsan'ız, onda ata-babalarımızdın' Qudayı bunı ko'rip, hu'kim etsin».

¹⁸ Sonda keyinirek otız batırdın' sa'rdarı bolg'an Amasaydın' u'stine Qudaydın' Ruwxı tu'sip, ol bılay dedi: «Dawıt, bizler sizikimiz! İshay ulı, siz benen birgemiz! Tınıshlıq ha'm amanlıq sizge yar bolsın! Sizge ja'rdem berip atırg'anlarg'a da amanlıq bolsın! Sebebi sizdi qollap turg'an – Qudayın'ızdın' O'zi». Dawıt olardı jaqsı qabıl etti ha'm o'zinin' basqınshılar toparlarına basshılar etip qoydı.

¹⁹ Dawıt filistler menen birge Shaulg'a qarsı urısıw ushın barg'anda, Menashshe urıwının' bazı adamları Dawıttın' ta'repine o'tken edi. Degen menen, sol urısta Dawıt ha'm onın' adamları filistlerge ja'rdem bermedi. O'ytkeni filist hu'kimdarları ken'esip: «Dawıt mırzası Shaul ta'repke o'tip ketip, basımızdan ayırılarmız», – dep, onı keyin qaytarg'an edi.

²⁰ Dawıt Siklagqa qaytıp ketip baratırg'anda, Menashshe urıwınan onın' ta'repine o'tkenler mınalar edi: Adnax, İozabad, Ediael, Mixail, İozabad, Elihu ha'm Silletay. Bulardın' barlıg'ı menashshelilerdin' mın'basıları edi.

²¹ Olar ma'rt jawıngerler bolıp, Dawıttın' ordasında la'shkerbasılıq xızmetin atqardı ha'm qaraqshılar toparına qarsı gu'resiwde Dawıtqa ja'rdem berdi.

²² Dawıtqa ja'rdem beriw ushın ha'r ku'ni adamlar kelip qosılatug'ın edi. Na'tiyjede, Dawıt Qudaydın' la'shkerleri sıyaqlı u'lken ha'm ku'shli ordag'a iye boldı.

²³ Jaratqan İyenin' bergen wa'desi boyınsha, Shauldın' patshalıg'ın Dawıtqa beriw ushın Xebrong'a, Dawıttın' janına kelgen la'shkerler sanı mınaday edi:

²⁴ Yahuda urıwınan: urısqa tayar, qalqan ha'm nayza menen qurallang'an altı mın' segiz ju'z adam.

²⁵ Shimon urıwınan: urısqa tayar, jeti mın' bir ju'z ma'rt jawınger.

²⁶ Lebiy urıwınan: to'rt mın' altı ju'z adam.

²⁷ Xaron na'silinin' basshısı Ehoyada ha'm onın' menen birge bolg'anlar u'sh mın' jeti ju'z adam.

²⁸ Jas ha'm ma'rt jawınger Sadoq ha'm onın' tiyresinen jigirma eki a'skerbası.

²⁹ Shauldın' urıwlasları bolg'an Benyamin urıwınan: u'sh mın' adam. Benyaminlilerdin' ko'pshiligi sol waqıtqa deyin Shauldın' shan'arag'ına sadıq bolıp qaldı.

³⁰ Efrayım urıwınan: o'z a'wladı arasında atag'ı shıqqan jigirma mın' segiz ju'z ma'rt jawınger.

³¹ Dawıttı patsha etip qoyıw ushın, Menashshe urıwının' yarımınan arnawlı tu'rde shaqırılg'anlar on segiz mın' adam.

³² İssaxar urıwınan: da'wir talabın tu'sinetug'ın, İzraildın' ne islew kerekligin biletug'ın eki ju'z la'shkerbası ha'm olardın' qol astındag'ı adamlar.

³³ Zebulon urıwınan: eliw mın' adam. Olar urıs qurallarının' ha'mme tu'ri menen qurallang'an bolıp, Dawıtqa shın ju'rekten ja'rdem beriw ushın keldi.

³⁴ Naftaliy urıwınan: mın' a'skerbası ha'm olar menen birge qalqan ha'm nayza menen qurallang'an otız jeti mın' adam.

³⁵ Dan urıwınan: urısqa tayar jigirma segiz mın' altı ju'z adam.

³⁶ Asher urıwınan: urısqa tayar, ta'jiriybeli qırıq mın' a'sker.

³⁷ İordan da'ryasının' shıg'ısında jasaytug'ın Ruben ha'm Gad urıwları menen Menashshe urıwının' yarımınan: urıs qurallarının' ha'mme tu'ri menen qurallang'an bir ju'z jigirma mın' adam.

³⁸ Bulardın' ha'mmesi sap tartıp, urısqa shıg'ıwg'a tayar a'skerler edi. Olar qattı qa'lew menen, Dawıttı pu'tkil İzrail u'stinen patsha etip qoyıw ushın Xebrong'a keldi. Qalg'an izraillılar da Dawıttı patsha etiw niyetinde edi.

³⁹ Xebrong'a kelgenler Dawıttın' janında u'sh ku'n qaldı ha'm tuwısqanları tayarlap bergen azıq-awqatlardı iship-jedi.

⁴⁰ Sonday-aq, İssaxar, Zebulon ha'm Naftaliy urıwlarının' alıs aymaqlarınan da adamlar eshek, tu'ye, g'ashır ha'm o'gizlerge azıq-awqat tiyep keldi. Olar mol etip un, keptirip nıg'ızlang'an a'njir menen kishmish, sharap, za'ytu'n mayın, iri ha'm mayda mallardı ko'p etip alıp keldi. Sebebi İzrailda shadlıq hu'kim su'rgen edi.