1 Jılnama 15 bob
1 Dawıt o'z atı menen atalg'an qalag'a o'zi ushın u'yler saldırdı. Ol Qudaydın' Kelisim sandıg'ı ushın da bir orın tayarlap, shatır qurdı.
2 Keyin Dawıt: «Qudaydın' Kelisim sandıg'ın tek g'ana lebiyliler ko'terip ju'redi. O'ytkeni Jaratqan İye sandıqtı alıp ju'riw ha'm ma'n'gige O'zine xızmet etiw ushın lebiylilerdi tan'lap aldı», – dedi.
3 Dawıt Jaratqan İyenin' sandıg'ın o'zi tayarlag'an jerge alıp keliw ushın, pu'tkil İzrail xalqın Erusalimge jıynadı.
4 Keyin to'mende atı atalg'an Xaronnın' urpaqların ha'm lebiylilerdi bir jerge topladı:
5 Qohat urpag'ınan: basshı Urieldi ha'm onın' bir ju'z jigirma ag'ayinin;
6 Merariy urpag'ınan: basshı Asayanı ha'm onın' eki ju'z jigirma ag'ayinin;
7 Gershom urpag'ınan: basshı İoeldi ha'm onın' bir ju'z otız ag'ayinin;
8 Elisafan urpag'ınan: basshı Shemayanı ha'm onın' eki ju'z ag'ayinin;
9 Xebron urpag'ınan: basshı Elieldi ha'm onın' seksen ag'ayinin;
10 Uzziel urpag'ınan: basshı Amminadabtı ha'm onın' bir ju'z on eki ag'ayinin.
11 Sonnan keyin, Dawıt ruwxaniyler Sadoq penen Abiyatardı, lebiyliler Uriel, Asaya, İoel, Shemaya, Eliel ha'm Amminadabtı shaqırıp alıp,
12 olarg'a bılay dedi: «Sizler lebiylilerdin' tiyre basshılarısız. Sonlıqtan lebiyli tuwısqanların'ız benen birge tazalanıw ra'siminen o'tin'ler. Keyin İzraildın' Qudayı Jaratqan İyenin' sandıg'ın men tayarlag'an orıng'a alıp kelin'ler.
13 O'tken sapar sandıqtı sizler, lebiyliler ko'terip ju'rmegenin'iz ushın, Qudayımız Jaratqan İye bizlerge g'a'zebin shashqan edi. Sonda bizler onı qag'ıydag'a say, qalay alıp ju'riw kerekligin Qudaydan soramag'an edik».
14 Solay etip, ruwxaniyler menen lebiyliler İzraildın' Qudayı Jaratqan İyenin' sandıg'ın alıp keliw ushın, o'zlerin tazalanıw ra'siminen o'tkerdi.
15 Jaratqan İyenin' Muwsa arqalı bergen buyrıg'ı boyınsha, lebiyliler Qudaydın' sandıg'ının' qadaların iyinlerine qoyıp, ko'terip ju'rdi.
16 Dawıt lebiylilerdin' basshılarına tuwısqanları arasınan arfa, lira ha'm kimbal saz a'sbapları hawazı astında quwanıshlı qosıqlar aytatug'ın qosıqshılardı tayınlawdı tapsırdı.
17 Lebiyliler İoel ulı Hemandı, onın' tuwısqanlarınan Berexiya ulı Asaftı ha'm Merariy urpag'ınan Qushaya ulı Etandı tayınladı.
18 Olardan keyingi ekinshi da'rejege tuwısqanlarınan mınalar tayınlandı: Zexariya, Ben, Yaziel, Shemiramot, Exiel, Unniy, Eliab, Benaya, Maaseya, Mattitiya, Elifelehu, Mikneya, sonday-aq, da'rwaza qarawılları Obed-Edom ha'm Eiel.
19 Sazendeler Heman, Asaf ha'm Etang'a qoladan islengen kimbaldı dan'g'ırlatıw,
20 Zexariya, Aziel, Shemiramot, Exiel, Unniy, Eliab, Maaseya ha'm Benayag'a arfanı joqarg'ı dawısta shertiw,
21 al Mattitiya, Elifelehu, Mikneya, Obed-Edom, Eiel ha'm Azaziyag'a to'mengi dawısta lira shertip, sazda jetekshilik etiw tapsırıldı.
22 Lebiylilerdin' basshısı Kenaniya qosıqshılarg'a juwapker boldı, sebebi ol bul istin' mamanı edi.
23 Berexiya menen Elqana Kelisim sandıg'ına qarawıl etip tayınlandı.
24 Shebaniya, İoshafat, Netanel, Amasay, Zexariya, Benaya, Eliezer atlı ruwxaniyler Qudaydın' Kelisim sandıg'ının' aldında ka'rnay shertip turatug'ın boldı. Obed-Edom menen Exiya da Kelisim sandıg'ın qarawıllap turatug'ın boldı.
25 Solay etip, Dawıt, İzrail aqsaqalları ha'm mın'basılar Jaratqan İyenin' Kelisim sandıg'ın Obed-Edomnın' u'yinen alıp keliw ushın quwanıshlı tu'rde jolg'a shıqtı.
26 Jaratqan İyenin' Kelisim sandıg'ın alıp kiyatırg'an lebiylilerge Qudaydın' O'zi yar bolg'anlıqtan, jeti bug'a menen jeti qoshqar qurbanlıqqa shalındı.
27 Dawıt ha'm sandıqtı ko'terip alıp kiyatırg'an lebiyliler, qosıqshılar ha'm qosıqshılardın' basshısı Kenaniya hasıl zıg'ırdan tigilgen kiyim kiygen edi. Bunın' sırtınan Dawıt zıg'ır efod ta kiyip alg'an edi.
28 Usılayınsha, pu'tkil İzrail xalqı ha'r tu'rli ka'rnaylar, kimbal, arfa ha'm lira naması astında quwanıshlı tu'rde baqırısıp, Jaratqan İyenin' Kelisim sandıg'ın alıp kiyatırg'an edi.
29 Jaratqan İyenin' Kelisim sandıg'ı Dawıttın' qalasına kirip kiyatırg'anda, Shauldın' qızı Mixal terezeden qarap turg'an edi. Ol patsha Dawıttın' sekirip oynap kiyatırg'anın ko'rip, onı o'z kewlinde pa's ko'rip ketti.
