1 Jılnama 16 bob
1 Qudaydın' Kelisim sandıg'ı alıp kelinip, Dawıttın' arnawlı tu'rde qurdırg'an shatırının' ishine qoyıldı. Son'ınan lebiyliler Qudayg'a jandırılatug'ın ha'm tatıwlıq qurbanlıqların berdi.
2 Jandırılatug'ın ha'm tatıwlıq qurbanlıqların berip bolg'annan keyin, Dawıt Jaratqan İyenin' atı menen xalıqqa pa'tiya berdi.
3 Keyin ol pu'tkil izraillılarg'a – ha'r bir erkek ha'm ha'r bir hayalg'a bir sho'rek nan, bir uwıs xurma ha'm bir dana keptirip nıg'ızlang'an kishmishten tarqattı.
4 Dawıt lebiylilerdin' ayırımların Jaratqan İyenin' sandıg'ı aldında xızmet etip, İzraildın' Qudayı Jaratqan İyege jalbarınıw ha'm Onı ta'riyiplep, alg'ıs-maqtaw aytıw ushın tayınladı.
5 Olardın' basshısı Asaf, onın' ja'rdemshisi Zexariya, keyingileri Eiel, Shemiramot, Exiel, Mattitiya, Eliab, Benaya, Obed-Edom ha'm Eiel edi. Olar arfa ha'm lira shertiwi, Asaf bolsa ba'lent dawıslı kimbal,
6 al ruwxaniy Benaya menen Yaxaziel Qudaydın' Kelisim sandıg'ının' aldında ha'r ku'ni belgilengen waqıtta ka'rnay shertiwi tiyis boldı.
7 Sol ku'ni Dawıt birinshi ret Asafqa ha'm onın' tuwısqanlarına Jaratqan İyege arnap, mına alg'ıslaw jırın aytıwdı tapsırdı:
8 «Jaratqan İyeni alg'ıslan', Onın' atın aytıp, shaqırın', Xalıqlar arasında ja'riyalan' Onın' islerin!
9 Onı jırlap, saz shertip alg'ıs aytın', Bayan etin' barlıq ka'ramatların!
10 Onın' muxaddes atı menen maqtanın', Jaratqan İyeni izleytug'ınlardın' ju'rekleri shadlıqqa tolsın!
11 Jaratqan İyeni ha'm Onın' ku'shin izlen', Ba'rqulla Onın' da'rgayında bolıwg'a umtılın'!
12 Ol islegen ka'ramatlardı, A'jayıp isleri menen awzınan shıqqan hu'kimlerin umıtpan'!
13 Ha'y, Onın' qulı bolg'an İzrail urpaqları, Ol tan'lap alg'an Yaqıptın' balaları!
14 Ol – bizlerdin' Qudayımız, Jaratqan İye! Hu'kimleri pu'tkil jer ju'zin qaplag'an.
15 Ol O'z kelisimin ma'n'gige este saqlar, Mın'-mın'lag'an a'wladlarg'a bergen so'zin hasla umıtpas,
16 İbrayım menen du'zgen kelisimin de, Isaqqa bergen antın da hasla umıtpas!
17 Bunı Yaqıp ushın bir qag'ıyda etip tastıyıqladı, İzrail ushın ma'n'gilik kelisim qılıp:
18 „A'wladların'nın' payına tiygen mu'lik etip, Kenaan jerin sag'an beremen“, – dedi.
19 Sol waqıtta olar sanı jag'ınan az edi, Sol jerde az sanlı ha'm kelgindi edi.
20 Olar bir xalıqtan ekinshisine, Bir patshalıqtan ekinshisine ko'ship-qonıp ju'rgen edi.
21 Biraq Jaratqan İye hesh kimnin' olardı eziwine jol qoymadı, Ha'tte, olar ushın patshalarg'a eskertiw berip:
22 „Menin' maylag'anlarıma tiymen'ler, Payg'ambarlarıma jamanlıq qılman'lar!“ – dedi.
23 Ha'y, pu'tkil du'nya, alg'ıslar aytın' Jaratqan İyege! Ha'r ku'ni ja'riyalan' Onın' qutqarıwın!
24 Ja'riyalan' saltanatın milletlerge, Ka'ramatların pu'tkil xalıqlarg'a!
25 O'ytkeni Jaratqan İye ullı, Ol maqtawg'a en' ılayıqlı, Barlıq qudaylardan aybatlısı ha'm qorqınıshlısı Ol.
26 Xalıqlardın' barlıq qudayları jalg'an, Al Jaratqan İye aspandı jaratqan.
27 Saltanat ha'm ullılıq Onın' aldında, Qu'diret ha'm quwanısh Onın' ma'kanında.
28 Ha'y, pu'tkil xalıqlar, Jaratqan İyeni maqtan', Jaratqan İyenin' ullılıg'ın, ku'shin maqtan'!
29 Jaratqan İyenin' ullılıg'ın atına ılayıqlı tu'rde maqtan', Qurbanlıqlar alıp, Onın' aldına kirin'! Muxaddes saltanatına bo'lenip, Jaratqan İyege sıyının'!
30 Ha'y, pu'tkil jer, Onın' aldında qaltıran'! Du'nya bekkem ornatılg'an, ol terbelmeydi.
31 Aspan quwanıp, jer shadlansın, Milletler arasında: „Jaratqan İye patshalıq etip atır!“ – dep aytılsın.
32 Ten'iz ha'm ondag'ılar shuwlassın! Dala ha'm ondag'ılar bayramlasın!
33 Sonda tog'ay ag'ashları shadlanıp, Jaratqan İyenin' aldında qosıq aytar. O'ytkeni Ol jer ju'zin hu'kim etiwge keler.
34 Jaratqan İyeni ta'riyiplen', sebebi Ol iygilikli, Sadıqlıg'ı ma'n'gi dawam etedi.
35 Og'an bılay den'ler: „Qutqarıwshımız Quday, bizlerdi qutqar, Bizlerdi jıynap, basqa xalıqlardan azat et. Muxaddes atın'dı ta'riyiplep, Ullılıg'ın' menen maqtanayıq“.
36 İzraildın' Qudayı Jaratqan İyege, A'wel bastan, ma'n'gige deyin alg'ıslar bolsın!»Pu'tkil xalıq: «Awmiyin!» – dep, Jaratqan İyege alg'ıs-maqtawlar ayttı.
37 Dawıt Asaftı ha'm onın' ag'ayinlerin Jaratqan İyenin' Kelisim sandıg'ının' aldında bolıp, sol jerde ha'r ku'ngi mu'ta'jliklerge qaray ba'rqulla xızmet etiw ushın bekitti.
38 Olar menen birge xızmet etiwi ushın Obed-Edomdı ha'm onın' alpıs segiz lebiyli ag'ayinin de tayınladı. Edutunnın' ulı Obed-Edom menen Xosa da'rwaza qarawılları boldı.
39 Dawıt ruwxaniy Sadoq penen onın' ruwxaniy tuwısqanların Gibondag'ı sıyınıw ornına qurılg'an Jaratqan İyenin' Muxaddes shatırına xızmetke qoydı.
40 Olar Jaratqan İyenin' İzrailg'a bergen Nızamında jazılg'an barlıq qag'ıydalarg'a say, ha'r ku'ni tan'da ha'm keshte jandırılatug'ın qurbanlıqlar beriletug'ın qurbanlıq orında Jaratqan İyege arnap, qurbanlıqlar beretug'ın boldı.
41 Olar menen birge Hemandı, Edutundı ha'm atları atalıp tan'lap alıng'an basqa adamlardı Jaratqan İyenin' sadıqlıg'ının' ma'n'gi dawam etetug'ının ta'riyiplew ushın tayınladı.
42 Heman menen Edutun Qudayg'a alg'ıs-maqtaw aytılg'anda, ka'rnay, kimbal, ja'ne de, basqa saz a'sbaplarının' shertiliwine juwapker edi. Edutunnın' ulları da'rwaza qarawılları etip tayınlandı.
43 Sonnan keyin, pu'tkil xalıq o'z u'ylerine tarqastı. Dawıt ta o'z shan'arag'ındag'ılarg'a pa'tiya beriw ushın, u'yine qayttı.
