1 Jılnama 17 bob
1 Dawıt sarayına jayg'asıp alg'annan keyin, Natan payg'ambarg'a: – Qara, men kedr ag'ashınan qurılg'an sarayda jasap atırman. Al Jaratqan İyenin' Kelisim sandıg'ı bolsa, shatırda tur! – dedi.
2 Natan Dawıtqa: – Kewlin'iz ku'segenin qıla berin'. Sebebi Quday siz benen birge, – dep juwap berdi.
3 Biraq sol ku'ni tu'nde Natang'a Qudaydan mınaday so'z tu'sti:
4 «Barıp, qulım Dawıtqa bılay dep ayt: „Jaratqan İye bılay deydi: Ma'kan basıwım ushın, Mag'an arnap u'ydi sen qurmaysan'.
5 İzrail xalqın Mısırdan alıp shıqqan ku'nnen baslap, bu'ginge deyin Men u'yde jasamadım. Al shatırdan-shatırg'a, ana jerden mına jerge ko'ship ju'rdim.
6 Pu'tkil izraillılar menen birge ko'ship ju'rgen jerlerde xalqımdı basqarıwdı buyırg'an İzrail biylerinin' qaysı birine: Nege Mag'an kedr ag'ashınan u'y qurıp bermedin'iz? – degen edim?“»
7 Endi qulım Dawıtqa bılay dep ayt: «A'lemnin' Jaratqan İyesi bılay deydi: „Men seni jaylawda qoy bag'ıp ju'rgen jerin'nen alıp, xalqım İzrailg'a hu'kimdar etip qoydım.
8 Qay jerge barsan' da, senin' menen birge bolıp, aldın'dag'ı ha'mme dushpanların'dı joq qıldım. Atın'dı du'nyadag'ı ullı adamlardın' atları sıyaqlı ullı qılaman.
9 Xalqım İzrail ushın orın tayarlap, olardı sol jerge ornalastıraman. Olardın' o'z jurtı boladı ha'm hesh kim tınıshın buzbaydı. Zalımlar olarg'a burıng'ıday zorlıq qılmaydı.
10 Xalqım İzrailg'a biyler qoyg'an waqıttan beri, zalımlar olardı ezip kelmekte. Men barlıq dushpanların'ızdı boysındıraman. Jaratqan İyen' bolg'an Men sag'an o'zin' ushın bir shan'araq – patshalar a'wladın jaratatug'ınımdı bildiremen.
11 Sen o'lip, ata-babaların'nın' janına atlang'anın'da, zu'ryadın'nan birin taxtqa otırg'ızıp, onın' patshalıg'ın bekkemleymen.
12 Men ushın u'ydi ol quradı. Al Men bolsam, onın' taxtın ma'n'gilik qılıp ornataman.
13 Men og'an A'ke bolaman, ol Mag'an ul boladı. Sennen aldın bolg'an patshadan miyrimimdi tartıp alg'anım sıyaqlı, onnan O'z miyrimimdi hesh qashan tartıp almayman.
14 Men onı O'z u'yimnin' ha'm patshalıg'ımnın' u'stinen ma'n'gige qoyaman. Onın' taxtı ma'n'gi bekkem boladı“».
15 Solay etip, Natan ayan arqalı berilgen bul so'zlerdin' ha'mmesin Dawıtqa aytıp berdi.
16 Son'ınan Dawıt patsha kelip, Jaratqan İyenin' aldında otırdı da, bılay dedi: «Quday, Jaratqan İye! Sen meni bunshelli ma'rtebeli qılg'anday, men kim bolıppan, menin' shan'arag'ım da ne bolıptı?
17 Quday, Senin' na'zerin'de bul da az bolg'anday, qulın'nın' urpag'ının' keleshegi tuwralı da aytıp berdin'. Quday, Jaratqan İye, Sen mag'an ullı bir adam sıyaqlı qaradın'!
18 Qulın'a izzet-hu'rmet ko'rsetkenin' ushın, men Sag'an basqa ne ayta alaman! O'ytkeni Sen qulın'dı bilesen'.
19 Jaratqan İye! Qulın'nın' iygiligi ushın ha'm ju'regin'e muwapıq bolg'an bul ullı isti islep, ullı wa'delerdi ashıq bildirdin'.
20 Jaratqan İye, o'z qulaqlarımız benen esitken barlıq xabarımız boyınsha, Sag'an ten' keletug'ını joq, Sennen basqa Quday da joq!
21 Du'nyada xalqın' İzrailg'a uqsag'an birde bir xalıq joq. Olardı O'z xalqın' qılıw ushın, azat qılıwg'a bardın'. Sen Mısırdan O'zin' ushın azat qılg'an xalqın'nın' aldınan basqa xalıqlardı quwıp jiberip, ullı ha'm tan' qalarlıq islerin' arqalı O'z atın'dı ullılıqqa eristirdin'.
22 Sen xalqın' İzraildı ma'n'gige O'z xalqın' qıldın' ha'm O'zin', Jaratqan İye olardın' Qudayı boldın'.
23 Endi, Jaratqan İye! Qulın'a ha'm onın' urpag'ına bergen wa'den'di ma'n'gige tastıyıqlap, so'zin'di orınlay go'r.
24 Solay etip, adamlar: „İzraildın' Qudayı bolg'an A'lemnin' Jaratqan İyesi – İzraildın' Qudayı!“ – desin ha'm atın' ma'n'gi turıp, ullılansın. Qulın' Dawıttın' urpag'ı da Senin' aldın'da bekkem tursın.
25 Qudayım! Sen mag'an men ushın bir u'y – patshalıq jaratatug'ının'dı ayan qıldın'. Sonlıqtan qulın' Senin' aldın'da duwa etiwge ju'rek etti.
26 Jaratqan İye, Sen Qudaysan'! Qulın'a usı iygilikli na'rselerdi wa'de ettin'.
27 O'zin'nin' aldın'da ma'n'gige bolıwı ushın, qulın'nın' patshalıg'ın jarılqawdı maqul taptın'. Jaratqan İye, onı jarılqag'anın' ushın, ol ma'n'gige jarılqanatug'ın boladı».
