1 Jılnama 18 bob

Dawıttın' jen'isleri (1-13), Dawıttın' xızmetkerleri (14-17).

¹ Aradan biraz waqıt o'tkennen keyin, Dawıt filistlerdi jen'ip, olardı boysındırdı. Gat qalasın ha'm onın' do'geregindegi awıllardı filistlerdin' qolınan tartıp aldı.

² Son'ınan Moab xalqın da jen'iliske ushırattı. Olar Dawıtqa bag'ınıshlı bolıp, salıq to'leytug'ın boldı.

³ Ja'ne de, Soba patshası Hadadezer Evfrat da'ryası boylap o'z patshalıg'ın bekitiwge barg'anda, Dawıt og'an Xamatqa deyin shabıwıl jasap, jen'ip shıqtı.

⁴ Dawıt onın' mın' sawash arbasın, jeti mın' atlı ha'm jigirma mın' piyada a'skerin qolg'a tu'sirdi. Ol sawash arbasına jegiletug'ın barlıq atlardın' tirseklerin kesip mayırıp, onnan tek ju'z attı g'ana alıp qaldı.

⁵ Dawıt Soba patshası Hadadezerge ja'rdemge kelgen Damaskte jasaytug'ın aramlardan jigirma eki mın' adamdı o'ltirdi.

⁶ Son'ınan ol Damasktegi aramlardın' jerine o'zinin' saqshılar toparın jaylastırdı. Olar da Dawıtqa bag'ınıshlı bolıp, salıq to'leytug'ın boldı. Dawıt qay jerge barsa da, Jaratqan İye onı jen'iske eristirdi.

⁷ Dawıt Hadadezerdin' sa'rka'rdaları alıp ju'rgen altın qalqanlardı alıp, Erusalimge a'keldi+.

⁸ Ja'ne de, Hadadezerdin' qol astındag'ı Tibxat ha'm Kun qalalarınan ko'p mug'darda qola aldı. Keyin ala, Sulayman bunı İbadatxana ushın hawız, su'tinler ha'm ha'r qıylı buyımlar isletiw ushın qollandı.

⁹ Xamat patshası Tow Dawıttın' Soba patshası Hadadezerdin' pu'tkil ordasın jen'ip shıqqanınan xabar taptı.

¹⁰ Sonda Tow o'z ulı Hadoramdı* sa'lem beriw ha'm Hadadezer u'stinen erisken jen'isi menen qutlıqlaw ushın Dawıt patshag'a jiberdi. Sebebi Tow Hadadezer menen uzaq waqıt dawamında urısıp kiyatırg'an edi. Hadoram Dawıtqa altın, gu'mis ha'm qoladan islengen ha'r tu'rli sawg'alar alıp keldi.

¹¹ Patsha Dawıt bul sawg'alardı barlıq milletlerden – edom, moab, ammon, filist ha'm amalek xalıqlarınan alıp kelgen gu'mis ha'm altın menen birge Jaratqan İyege bag'ıshladı.

¹² Seruya ulı Abishay Duz oypatlıg'ında edom xalqınan on segiz mın' adamdı qırg'ıng'a ushırattı.

¹³ Dawıt Edomg'a saqshılar toparın ornalastırdı. Pu'tkil edom xalqı og'an bag'ınıshlı boldı. Dawıt qayda barsa da, Jaratqan İye onı jen'iske eristirdi.

¹⁴ Dawıt pu'tkil İzrailda patshalıq etip, xalqına tuwrı ha'm a'dillik penen hu'kimdarlıq etti.

¹⁵ Seruya ulı İoab sa'rka'rda, Axilud ulı Ehoshafat jılnamashı boldı.

¹⁶ Axitub ulı Sadoq penen Abiyatar ulı Aximelex ruwxaniy, al Shawsha* xatker edi.

¹⁷ Ehoyada ulı Benaya keretler menen peletlerden alıng'an ta'n saqshılardın' sa'rka'rdası edi. Dawıttın' ulları da patshanın' bas xızmetkerleri boldı.