1 Jılnama 23 bob

Lebiylilerdin' atqaratug'ın xızmetleri(1-32).

¹ Dawıt mazmunlı o'mir su'rdi ha'm qartayg'anda, ulı Sulaymandı İzrailg'a patsha etip qoydı.

² Dawıt İzraildın' barlıq basshıların, ruwxaniylerdi ha'm lebiylilerdi bir jerge topladı.

³ Otız ha'm onnan joqarı jastag'ı lebiyliler sanap shıg'ıldı. Olar barlıg'ı bolıp otız segiz mın' er adam eken.

⁴ Dawıt bılay dedi: «Olardın' jigirma to'rt mın'ı Jaratqan İyenin' U'yindegi islerdi atqarıwg'a, altı mın'ı ha'meldar lawazımlarg'a ha'm qazılıq isine,

⁵ to'rt mın'ı da'rwaza qarawıllıg'ına, to'rt mın'ı o'zi tayarlap bergen saz a'sbapların shertip, Jaratqan İyege alg'ıs-maqtaw aytıw xızmetine qoyılsın».

⁶ Dawıt lebiylilerdi Lebiydin' ulları Gershom, Qohat ha'm Merariydin' urpaqları boyınsha u'sh toparg'a bo'ldi.

⁷ Gershonnın' ulları: Laadan ha'm Shimey.

⁸ Laadannın' u'sh ulı bolıp, tun'g'ıshı Exiel, keyin Zetam ha'm İoel.

⁹ Shimeydin' Shelomit, Xaziel ha'm Haran degen u'sh ulı bar edi. Olar Laadan urıwının' a'wlad basshıları edi.

¹⁰ Shimeydin' basqa ulları: Yaxat, Ziza, Eush ha'm Beria. Bul to'rtewi de Shimeydin' ulları edi.

¹¹ Yaxat tun'g'ıshı, Ziza ekinshi ulı edi. Biraq Eush penen Berianın' ulları ko'p bolmag'anlıqtan, ekewi bir tiyre bolıp esaplandı.

¹² Qohattın' Amram, İshar, Xebron ha'm Uzziel degen to'rt ulı boldı.

¹³ Amramnın' ulları Xaron ha'm Muwsa edi. Xaron en' muxaddes zatlardı bag'ıshlaw isine tayınlandı. Sonlıqtan Xaron ha'm onın' ulları ma'n'gige Jaratqan İyenin' aldında qurbanlıqlar beriwi, Og'an xızmet etiwi ha'm ma'n'gige Onın' atı menen xalıqtı jarılqawı tiyis boldı.

¹⁴ Qudaydın' adamı Muwsanın' ulları da Lebiy urıwına kirgizildi.

¹⁵ Muwsanın' ulları: Gershom ha'm Eliezer.

¹⁶ Gershomnın' tun'g'ısh ulı Shebuel edi.

¹⁷ Eliezerdin' tun'g'ısh ulı Rexabiya edi. Eliezerdin' basqa ulı bolmadı. Al Rexabiyanın' ulları ko'p boldı.

¹⁸ İshardın' tun'g'ısh ulı Shelomit edi.

¹⁹ Xebronnın' ulları: tun'g'ıshı Eriya, ekinshisi Amariya, u'shinshisi Yaxaziel, to'rtinshisi Eqamam.

²⁰ Uzzieldin' ulları: tun'g'ıshı Mixa, ekinshisi İshshiya.

²¹ Merariydin' ulları: Maxliy ha'm Mushiy. Maxliydin' ulları: Elazar ha'm Kish.

²² Elazar ulsız bul du'nyadan ko'z jumdı. Biraq onın' qızları bar edi. Atalas ag'ayinleri bolg'an Kishtin' ulları olarg'a u'ylendi.

²³ Mushiydin' Maxliy, Eder ha'm Eremot degen u'sh ulı boldı.

²⁴ A'wladları boyınsha Lebiy urpag'ı usılar edi. A'wlad basshılarının' ha'r biri shejirege atpa-at kirgizildi. Jigirma ha'm onnan joqarı jastag'ı ha'r bir lebiylige Jaratqan İyenin' U'yinde xızmet etiwge bolatug'ın edi.

²⁵ O'ytkeni Dawıt: «İzraildın' Qudayı Jaratqan İye O'z xalqın tınıshlıqqa eristirip, O'zi de Erusalimdi ma'n'gige ma'kan etiwdi sheshti.

²⁶ Sonlıqtan bunnan bılay, lebiylilerge Jaratqan İyenin' shatırın ha'm sıyınıw xızmetinde qollanılatug'ın zatlardı tasıp ju'riwdin' ha'jeti joq», – dedi.

²⁷ Dawıttın' aqırg'ı buyrıg'ı boyınsha jigirma ha'm onnan joqarı jastag'ı lebiyliler sanaldı.

²⁸ Lebiyliler Jaratqan İyenin' U'yindegi xızmette Xaronnın' urpaqlarına ja'rdem beriwge minnetli edi. Bularg'a ha'wli ha'm bo'lmelerdi gu'zetiw, muxaddes zatlardı pa'klew ra'siminen o'tkeriw ha'm Qudaydın' U'yine tiyisli basqa da wazıypalardı orınlaw isleri kirdi.

²⁹ Olar usınılatug'ın nanlarg'a, g'a'lle sadaqası ushın beriletug'ın sapalı ung'a, pa'tir nanlarg'a, peshte pisirilgen sadaqalarg'a ha'm za'ytu'n mayı aralastırılg'an sadaqalarg'a, sadaqalardın' ko'lem ha'm o'lshemine juwapker boldı.

³⁰ Lebiyliler ha'r ku'ni azanda ha'm keshte Jaratqan İyeni ta'riyiplew ha'm alg'ıs-maqtaw aytıw ushın tayar turatug'ın edi.

³¹ Olar Shabbat ku'nleri de, Jan'a ay bayramlarında da, belgilengen bayram ku'nlerinde Jaratqan İyege jandırılatug'ın qurbanlıqlar berilgende de, solay isledi. Jaratqan İyenin' aldında xızmet etiwshi lebiylilerdin' sanı ba'rqulla aldın ala ko'rsetpede belgilengen sanda bolıwı kerek edi.

³² Solay etip, lebiylilerge Ushırasıw Shatırı menen Muxaddes orındı qorg'aw ha'm o'z tuwısqanları bolg'an Xaron urpaqlarına Jaratqan İyenin' U'yindegi xızmette ja'rdem beriw wazıypası ju'klendi.