1 Jılnama 26 bob
1 Da'rwaza qarawılları mına toparlardan ibarat boldı: Qorax urpaqlarınan: Asaf a'wladınan Qore ulı Meshelemiya.
2 Meshelemiyanın' ulları: tun'g'ısh ulı Zexariya, ekinshisi Ediael, u'shinshisi Zebadiya, to'rtinshisi Yatniel,
3 besinshisi Elam, altınshısı Ehoxanan, jetinshisi Eliehoenay.
4 Obed-Edomnın' ulları: tun'g'ısh ulı Shemaya, ekinshisi Ehozabad, u'shinshisi İoax, to'rtinshisi Sakar, besinshisi Netanel,
5 altınshısı Ammiel, jetinshisi İssaxar, segizinshisi Peulletay. Quday Obed-Edomdı usılay jarılqag'an edi.
6 Obed-Edomnın' ulı Shemayanın' ulları bar edi. Olar ullı qa'bilet iyeleri bolg'anlıqtan, o'z a'wladlarının' basshıları boldı.
7 Shemayanın' ulları: Otniy, Refael, Obid ha'm Elzabad. Shemayanın' tuwısqanları Elihu menen Semaxiya da qa'biletli adamlar edi.
8 Olardın' barlıg'ı Obed-Edomnın' urpaqları edi. Olardın' o'zleri de, ulları menen tuwısqanları da jumısqa intalı, ju'da' uqıplı adamlar boldı. Obed-Edomg'a tiyisliler barlıg'ı bolıp alpıs eki adam edi.
9 Meshelemiyanın' ulları ha'm ag'ayinleri on segiz adamnan ibarat bolıp, olar da qa'biletli adamlar edi.
10 Merariy urpag'ınan Xosanın' ulları: basshısı Shimriy. Shimriy tun'g'ısh ul bolmasa da, a'kesi onı basshı etip tayınladı.
11 Ekinshisi Xilkiya, u'shinshisi Tebaliya, to'rtinshisi Zexariya. Xosanın' ulları menen ag'ayinleri on u'sh adam edi.
12 Da'rwaza qarawıllarının' toparları o'z basshıları boyınsha bo'lindi. Olar da Jaratqan İyenin' U'yinde xızmet etip atırg'an basqa lebiyliler sıyaqlı o'z wazıypalarına iye edi.
13 Ha'r da'rwaza ushın, a'wladları boyınsha u'lken-kishige ten'dey shek taslandı.
14 Shıg'ıs ta'reptegi da'rwazag'a taslang'an shek boyınsha Shelemiyag'a tu'sti. Keyin onın' ulı Zexariya ushın shek taslandı ha'm og'an arqa ta'reptegi da'rwaza tu'sti. Zexariya aqıllı, ken'esgo'y adam edi.
15 Qubladag'ı da'rwaza shek boyınsha Obed-Edomg'a, al g'a'llexana onın' ullarına tu'sti.
16 Batıstag'ı da'rwaza menen joqarg'ı joldag'ı Shallexet da'rwazası shek boyınsha Shuppim menen Xosag'a tu'sti. Qarawıllar u'zliksiz izbe-izlikte o'z wazıypasın orınlaytug'ın edi.
17 Ha'r ku'ni shıg'ıstag'ı da'rwazada altı lebiyli, arqadag'ı da'rwazada to'rt lebiyli, qubladag'ı da'rwazada to'rt lebiyli, eki g'a'llexanada eki adamnan to'rt lebiyli qarawıllıqta turdı.
18 Batıs ta'reptegi ha'wlige baratug'ın jol boyında to'rt qarawıl, ha'wlinin' ishinde eki qarawıl turdı.
19 Qorax ha'm Merariy urpaqlarınan bolg'an da'rwaza qarawılları usılay ornalastırıldı.
20 Olardın' ag'ayinleri bolg'an lebiylilerge Qudaydın' U'yindegi qaznag'a ha'm Qudayg'a arnalg'an sawg'alar turatug'ın qaznag'a qaraw tapsırıldı.
21 Gershonnın' a'wladınan bolg'an Laadannın' urpag'ınan, Laadan tiyresinin' tiyre basshısı Exieliy.
22 Exieliydin' ulları Zetam ha'm onın' tuwısqanı İoel Jaratqan İyenin' U'yinin' qaznasın qarawılladı.
23 Amram, İshar, Xebron ha'm Uzziel urpaqlarınan mına adamlarg'a xızmet berildi:
24 Muwsanın' ulı Gershomnın' urpag'ınan Shebuel qaznalar u'stinen bas baqlawshı boldı.
25 Gershomnın' tuwısqanı Eliezerdin' na'sili mınaday edi: Eliezerden Rexabiya, Rexabiyadan İyshaya, İyshayadan İoram, İoramnan Zixriy, Zixriyden Shelomit tuwılg'an edi.
26 Shelomitke ha'm onın' ag'ayinlerine Dawıt patshanın', tiyre basshılarının', mın'basılardın', ju'zbasılardın' ha'm a'skerbasılardın' bag'ıshlag'an sawg'aları saqlanatug'ın qaznag'a qaraw tapsırıldı.
27 Olar sawashta qolg'a tu'sirgen oljalardan bir bo'legin Jaratqan İyenin' u'yin ta'miyinlew ushın bag'ıshlaytug'ın edi.
28 Ko'zi ashıq Samuel, Kish ulı Shaul, Ner ulı Abner, Seruya ulı İoab bag'ıshlag'an sawg'alardı ha'm Jaratqan İyege arnalg'an basqa sawg'alardı da Shelomit penen onın' ag'ayinleri qarawıllaytug'ın boldı.
29 İshar urpag'ınan Kenaniya ha'm onın' ulları Qudaydın' U'yinin' sırtındag'ı islerge juwapker bolıp, İzrail xalqı ushın biy ha'm qazı etip tayınlandı.
30 Xebron urpag'ınan Xashabiya ha'm onın' bir mın' jeti ju'z qa'biletli ag'ayini İzrailda İordan da'ryasının' batıs bo'legindegi Jaratqan İyenin' ha'm patshanın' xızmetine baylanıslı islerge juwapker boldı.
31 Xebron urpag'ınan bolg'an Eriya o'z urpag'ının' shejiresi boyınsha Xebron urpaqlarının' basshısı boldı. Dawıttın' hu'kimdarlıg'ının' qırqınshı jılında Xebron urpaqlarının' shejiresi izertlengen edi. Sonda Giladtag'ı Yazerde jasag'an Xebron urpaqları arasınan ju'da' qa'biletli adamlar tabıldı.
32 2Eriyanın' ag'ayinleri arasında eki mın' jeti ju'zi ju'da' qa'biletli a'wlad basshıları boldı. Qudaydın' ha'm patshanın' islerine qarawı ushın, Dawıt patsha olardı Ruben ha'm Gad urıwları, ja'ne de, Menashshe urıwının' yarımı u'stinen basshı etip tayınladı.
