2 Jılnama 2 bob
1 Sulayman Jaratqan İyege arnap İbadatxana ha'm o'zi ushın bir saray qurıwdı buyırdı.
2 Ol ju'k tasıw ushın jetpis mın', tawlarda tas kesiw ushın seksen mın' ha'm olardı qadag'alaw ushın u'sh mın' altı ju'z adam belgiledi.
3 Sulayman Tir patshası Xiramg'a bılay dep aytıw ushın adamların jiberdi: «A'kem Dawıt o'zi jasaw ushın saray saldırg'anda jibergen kedr bo'renelerinen mag'an da jibersen'iz.
4 Ha'zir men Qudayım Jaratqan İyege arnap İbadatxana qurıp, İbadatxananı Og'an bag'ıshlamaqshıman. Sol jerde Onın' aldında xosh iyisli tu'tetkiler tu'tetilip, ha'rdayım usınılg'an nanlar turıwı kerek. Ja'ne de, ha'r ku'ni azanda ha'm keshte, Shabbat ku'nleri, Jan'a ay bayramlarında ha'm Qudayımız Jaratqan İye belgilegen bayramlarda jandırılatug'ın qurbanlıqlar usınılıwı tiyis. Bul ra'simler İzrail ushın ma'n'gi qag'ıyda boladı.
5 Qudayımız basqa barlıq qudaylardan ullı bolg'anlıg'ı sebepli, Men quratug'ın İbadatxana da asa ullı boladı.
6 Biraq ko'kler, ha'tte, ko'klerdin' ko'kleri Onı sıyg'ıza almag'anda, Og'an arnap İbadatxana qurıwg'a kimnin' shaması jetedi? Og'an arnap u'y quratug'ınday, men kim bolıppan? Tek Onın' aldında qurbanlıqlardı o'rtep usınıw ushın bir orın qurmaqshıman.
7 Sol sebepli mag'an altın, gu'mis, qola ha'm temirden zat islewde, shım qızıl, qırmızı ha'm qızg'ısh ko'k ren'li jiplerden zat toqıwda ha'm oymashılıqta sheber usta bolg'an bir adam jibersen'iz. Ol a'kem Dawıt jetistirgen sheber ustalar menen birge Yahudada ha'm Erusalimde jumıs islesin.
8 Mag'an Lebanon tawlarınan kedr, sa'rwi ha'm sapalı arsha ag'ashların da jibersen'iz. Sebebi adamların'ızdın' Lebanondag'ı ag'ashlardı kesiwge uqıplı ekenin bilemen. Menin' adamlarım sizin' adamların'ız benen birge isleydi.
9 Olar mag'an ju'da' ko'p mug'darda ag'ash kesip bersin. O'ytkeni men quratug'ın İbadatxana za'wlim ha'm saltanatlı bolıwı kerek.
10 Men ag'ashlardı kesetug'ın adamların'ızg'a jigirma mın' kor jenshilgen biyday, jigirma mın' kor arpa, jigirma mın' bat sharap ha'm jigirma mın' bat za'ytu'n mayın jiberemen».
11 Tir patshası Xiram Sulaymang'a xat arqalı bılay dep juwap berdi: «Jaratqan İye O'z xalqın su'ygenlikten, sizdi patsha etip qoydı».
12 Xiram xatın bılay dawam etti: «Aspan ha'm jerdi jaratqan İzraildın' Qudayı Jaratqan İyege alg'ıslar bolsın! Ol patsha Dawıtqa Jaratqan İye ushın İbadatxana, o'zi ushın saray salatug'ın dana, aqıllı ha'm parasatlı ul inam etipti.
13 Sizge Xuram-Abiy degen aqıllı ha'm sheber bir adamdı jiberemen.
14 Onın' anası Dan urıwınan, al a'kesi tirli. Xuram-Abiy altın, gu'mis, qola, temir, tas ha'm ag'ash penen, shım qızıl, qızg'ısh ko'k ha'm qırmızı ren'li jipler, ja'ne hasıl zıg'ır menen jumıs isley aladı. Ol oymashılıqtın' ha'mme tu'rlerine usta bolıp, qa'legen buyırtpan'ızdı orınlay aladı. Ol sizin' sheberlerin'iz ha'm a'ken'iz mırzam Dawıttın' sheberleri menen isleydi.
15 Endi mırzam, o'zin'iz aytqan biyday, arpa, za'ytu'n mayı ha'm sharaptı qulların'ızg'a jibersen'iz.
16 6Bizler de Lebanon tog'aylarınan sizge kerekli ag'ashlardı kesip, bir-birine baylap sal sog'ıp, ten'iz arqalı Yafog'a jetkerip beremiz. Siz ag'ashlardı sol jerden Erusalimge alıp ketersiz».
17 A'kesi Dawıt ju'rgizgen sol sanaqtan keyin, Sulayman da İzrailda jasaytug'ın barlıq shet ellilerdin' esabın aldı. Olardın' sanı bir ju'z eliw u'sh mın' altı ju'z boldı.
18 Olardın' jetpis mın'ın ju'k tasıwshı, seksen mın'ın tawlarda tas kesiwshi, al u'sh mın' altı ju'zin jumısshılar u'stinen qadag'alawshı etip belgiledi.
