Ezra 7 bob

Ezranın' Erusalimge keliwi(1-10),Patsha Artakserkstin' Ezrag'a bergen xatı(11-26),Ezranın' Qudaydı alg'ıslawı(27-28).

¹ Bul waqıyalardan keyin, Persiya patshası Artakserkstin' hu'kimdarlıg'ı da'wirinde Ezra degen bir adam jasadı. Ol Seraya ulı edi, Seraya Azariya ulı, Azariya Xilkiya ulı,

² Xilkiya Shallum ulı, Shallum Sadoq ulı, Sadoq Axitub ulı,

³ Axitub Amariya ulı, Amariya Azariya ulı, Azariya Merayot ulı,

⁴ Merayot Zeraxiya ulı, Zeraxiya Uzziy ulı, Uzziy Bukkiy ulı,

⁵ Bukkiy Abishua ulı, Abishua Pinexas ulı, Pinexas Elazar ulı, al Elazar bas ruwxaniy Xaronnın' ulı edi.

⁶ Usı Ezra Babilonnan Erusalimge keldi. Ezra İzraildın' Qudayı Jaratqan İyenin' Muwsag'a bergen Nızamın jetik biletug'ın ulama edi. Qudayı Jaratqan İyenin' qolı onın' u'stinde bolg'anlıg'ı sebepli, patsha og'an sorag'an na'rsesinin' ha'mmesin berdi.

⁷ Patsha Artakserkstin' hu'kimdarlıg'ının' jetinshi jılı İzrail xalqınan ayırım adamlar, sonday-aq ruwxaniylerden, lebiylilerden, qosıqshılardan, da'rwaza qarawıllarınan ha'm İbadatxana xızmetshilerinen ayırımları da onın' menen birge Erusalimge qayttı.

⁸ Ezra Erusalimge kelgende, Artakserkstin' hu'kimdarlıg'ının' jetinshi jılının' besinshi ayı edi.

⁹ Ol birinshi aydın' birinshi ku'ni Babilonnan jolg'a shıg'ıp, o'z Qudayının' miyrimli qolı astında besinshi aydın' birinshi ku'ni Erusalimge jetip keldi.

¹⁰ Sebebi Ezra o'z o'mirin Jaratqan İyenin' Nızamın u'yreniwge, olardı orınlawg'a ha'm İzrailda qag'ıyda ha'm nızamlardı u'yretiwge bag'ıshlag'an edi.

¹¹ Jaratqan İyenin' buyrıqların ha'm Onın' İzrailg'a bergen qag'ıydaların jaqsı biletug'ın ulama ha'm ruwxaniy Ezrag'a patsha Artakserkstin' bergen xatının' mazmunı mınaday edi:

¹² «Patshalar patshası Artakserksten aspannın' Qudayının' Nızamın jetik biletug'ın ulama, ruwxaniy Ezrag'a sa'lem!

¹³ Men mınanı buyıraman: patshalıg'ımda jasaytug'ın İzrail xalqınan bolg'an ha'r bir adamnın', sonday-aq senin' menen birge Erusalimge ketiwdi qa'legen ruwxaniylerdin' ha'm lebiylilerdin' ketiwine ruxsat beremen.

¹⁴ Sen qolın'dag'ı Qudaydın' Nızamına tiykarlanıp, Yahuda menen Erusalimdegi jag'daydı u'yreniw ushın patsha ha'm onın' jeti ma'sla'ha'tshisi ta'repinen jiberilip atırsan'.

¹⁵ Erusalimde ma'kan basqan İzraildın' Qudayına arnap, patsha ha'm onın' jeti ma'sla'ha'tshisi ıqtıyarlı tu'rde bergen gu'mis ha'm altınlardı sol jerge jetkeresen'.

¹⁶ Ja'ne de, Babilon wa'layatınan o'zin' jıynaytug'ın barlıq gu'mis ha'm altındı, o'zlerinin' Qudayının' Erusalimdegi İbadatxanasına arnap xalıq ha'm ruwxaniyler bergen ıqtıyarlı sadaqalardı da alıp ketesen'.

¹⁷ Bul pullarg'a sen bug'alar, qoshqarlar, toqlılar, olardın' g'a'lle sadaqaların ha'm ishimlik sadaqaların satıp al. Olardı Qudayın'nın' Erusalimdegi İbadatxanasının' qurbanlıq ornında qurbanlıqqa ber.

¹⁸ Qalg'an gu'mis ha'm altınlardı tuwısqanların' menen birge Qudaydın' erkine say qa'legenin'she islet.

¹⁹ Qudayın'nın' İbadatxanasındag'ı xızmetke qollanıw ushın berilgen ıdıslardı Erusalimnin' Qudayına tapsır.

²⁰ Qudayın'nın' İbadatxanası ushın ne na'rse talap etilse de, jetkiziwin' kerek bolg'an ha'r bir na'rseni patshanın' qaznasınan alarsan'.

²¹ Endi men, patsha Artakserks da'ryanın' arg'ı ta'repindegi u'lkenin' barlıq qaznashılarına buyıraman: aspannın' Qudayının' Nızamı boyınsha ulama, ruwxaniy Ezranın' sizlerden talap qılg'an na'rsesinin' ha'mmesin so'zsiz berin'ler.

²² Og'an 100 talantqa shekem gu'mis, 100 korg'a shekem biyday, 100 batqa shekem sharap, 100 batqa shekem za'ytu'n mayı ha'm qa'legeninshe duz berin'ler.

²³ Aspannın' Qudayı O'z İbadatxanası ushın neni buyırsa, sonı buljıtpay orınlan'lar. Onın' menin' ha'm ullarımnın' patshalıg'ına qarsı g'a'zebin lawlatıwdın' nege keregi bar?

²⁴ Mınanı da bilip qoyın'lar: ruwxaniylerdin', lebiylilerdin', qosıqshılardın', da'rwaza qarawıllarının', İbadatxana xızmetshilerinin' ha'm Qudaydın' sol İbadatxanasındag'ı basqa xızmetshilerdin' hesh birinen salg'ırt ta, salıq ta, bajı pulı da alınbasın.

²⁵ Sag'an kelsek, Ezra, Qudayın'nın' o'zin'e bergen danalıg'ı menen ha'kimler ha'm qazılar tayınla. Olar da'ryanın' arg'ı ta'repindegi senin' Qudayın'nın' nızamların biletug'ın barlıq xalıqtı hu'kim etsin. Al nızamlardı bilmeytug'ınlarg'a ta'lim ber.

²⁶ Qudayın'nın' nızamlarına ha'm patshanın' buyrıqlarına boysınbag'anlar jazag'a tartılsın: o'limge hu'kim etilsin, su'rginge jiberilsin, mal-mu'lki tartıp alınsın yaki so'zsiz qamaqqa taslansın»

²⁷ «Jaratqan İyenin' Erusalimdegi İbadatxanasına hu'rmet ko'rsetiw ushın patshanın' ju'regine usınday qa'lewdi salg'an ata-babalarımızdın' Qudayı Jaratqan İyege alg'ıslar bolsın!

²⁸ Ol patshada, onın' ma'sla'ha'tshilerinde ha'm barlıq ku'shli basshılarında mag'an degen miyrim oyattı. Qudayım bolg'an Jaratqan İyenin' qolı menin' u'stimde bolg'anlıqtan jigerlendim ha'm o'zim menen alıp ketiw ushın İzraildın' basshıların topladım».