Ezra 8 bob
1 Artakserkstin' patshalıg'ı da'wirinde menin' menen birge Babilonnan kelgen urpaq basshıları ha'm olardın' shejireleri mınaday:
2 Pinexas urpag'ınan Gershom, İtamar urpag'ınan Daniel, Dawıttın' na'silinen bolg'an
3 Shekaniya urpag'ınan Xattush. Parosh urpaqlarınan Zexariya ha'm onın' menen bir na'silden dizimge alıng'an 150 erkek,
4 Paxat-Moab urpag'ınan Zeraxiya ulı Eliehoenay ha'm onın' menen birge 200 erkek,
5 Zattu urpag'ınan Yaxaziel ulı Shekaniya ha'm onın' menen birge 300 erkek;
6 Adin urpag'ınan İonatan ulı Ebed ha'm onın' menen birge 50 erkek;
7 Elam urpag'ınan Ataliya ulı Eshaya ha'm onın' menen birge 70 erkek;
8 Shefatiya urpag'ınan Mixail ulı Zebadiya ha'm onın' menen birge 80 erkek;
9 İoab urpag'ınan Exiel ulı Obadiya ha'm onın' menen birge 218 erkek;
10 Baniy urpag'ınan İosifiyanın' ulı Shelomit ha'm onın' menen birge 160 erkek;
11 Bebay urpag'ınan Bebay ulı Zexariya ha'm onın' menen birge 28 erkek;
12 Azgad urpag'ınan Haqqatan ulı Yuxanan ha'm onın' menen birge 110 erkek;
13 Adoniqamnın' Elifelet, Eiel, Shemaya degen en' son'g'ı ulları ha'm olar menen birge 60 erkek;
14 Bigway urpag'ınan Utay, Zakkur ha'm olar menen birge 70 erkek.
15 Men olardı Ahawag'a qaray ag'ıp turg'an o'zektin' boyına topladım. Bizler sol jerde u'sh ku'n turdıq. Men xalıq ha'm ruwxaniyler arasınan lebiylilerdi izledim, biraq Lebiy urpag'ınan hesh kimdi taba almadım.
16 Sonlıqtan basshılardan Eliezerdi, Arieldi, Shemayanı, Elnatandı, Yaribti, Elnatandı, Natandı, Zexariyanı, Meshullamdı ha'm alımlardan İoyarib penen Elnatandı shaqırttım.
17 Olardı Kasifiya degen jerdin' basshısı İddo degen adamg'a jiberdim. Olardın' Qudayımızdın' İbadatxanasında xızmet etetug'ın adamlardı jiberiwi ushın, İddog'a ha'm Kasifiya degen jerdegi İbadatxana xızmetshileri bolg'an tuwısqanlarına nelerdi aytıwı kerekligin u'yrettim.
18 Qudayımızdın' miyrimli qolı bizlerdin' u'stimizde bolg'anlıg'ı sebepli, olar İzraildın' ulı Lebiydin' na'silinen, Maxliydin' urpag'ınan Sherebiya degen dana bir adamdı jiberdi. Ol o'zi menen birge ulları ha'm tuwısqanlarınan 18 adamdı a'keldi.
19 Sonday-aq, Xashabiyanı, Merariy urpag'ınan Eshayanı ha'm tuwısqanları menen olardın' ullarınan 20 adamdı,
20 lebiylilerge ja'rdemlesiw ushın Dawıt ha'm onın' xızmetshileri qoyg'an İbadatxana xızmetshilerinen 220 adamdı alıp keldi. Olardın' ha'mmesi atpa-at dizimge alıng'an.
21 Sonda Qudayımızg'a boysınıw, Onnan o'zlerimiz, balalarımız ha'm pu'tkil du'nya malımız ushın, haq jol soraw ushın Ahawa o'zeginin' boyında oraza ja'riya ettim.
22 Bizler patshag'a: «Qudayımız O'zin izlegenlerdin' ha'mmesinin' u'stine miyrimli qolın qoyadı, al O'zinen ju'z burg'anlarg'a ku'shli g'a'zebin shashadı», – degen edik. Sonlıqtan jolda bizlerdi dushpannan qorg'aw ushın a'skerler ha'm atlılar sorawg'a uyaldım.
23 Solay etip, bizler oraza tutıp, Qudayımızg'a jolımız ushın jalbarındıq, Ol da duwamızdı qabıl etti.
24 Son'ınan basshı ruwxaniyler arasınan on ekisin: Sherebiyanı, Xashabiyanı ha'm olardın' tuwısqanlarınan onın tan'lap aldım.
25 Keyin patshanın', onın' ma'sla'ha'tshilerinin', basshılarının' ha'm sol jerdegi pu'tkil izraillılardın' Qudayımızdın' İbadatxanası ushın bergen barlıq sadaqaların: gu'misti, altındı ha'm ıdıslardı ta'rezige tartıp, olarg'a berdim.
26 Men olarg'a bergen zatlardın' o'lshemi mınaday edi: 650 talant gu'mis, 100 talantlıq gu'mis ıdıslar, 100 talant altın.
27 Narqı 1000 darik bolg'an 20 altın tostag'an, altınday qunlı, jıltır mıstan islengen eki ıdıs.
28 Men olarg'a bılay dedim: «Sizler – Jaratqan İyenin' muxaddesisizler, ıdıslar da muxaddes. Gu'mis ha'm altın – sizlerdin' ata-babaların'ızdın' Qudayı Jaratqan İyege berilgen ıqtıyarlı sadaqalar.
29 Ruwxaniylerdin' basshıları, lebiyliler ha'm izraillılardın' urpaq basshıları aldında o'lshep, Jaratqan İyenin' Erusalimdegi İbadatxanasının' qaznasına tapsırg'anın'ızsha sergek bolıp, olardı saqlan'lar».
30 Solay etip, ruwxaniyler ha'm lebiyliler Erusalimge, Qudayımızdın' İbadatxanasına alıp keliw ushın, ta'rezige tartılg'an gu'misti, altındı ha'm ıdıslardı qabıl etip aldı.
31 Bizler birinshi aydın' on ekinshi ku'ni* Erusalimge barıw ushın Ahawa o'zegi boyınan jolg'a shıqtıq. Qudayımızdın' qolı bizlerdin' u'stimizde bolıp, jolımızda Ol bizlerdi dushpanlardın' hu'jiminen ha'm qaraqshılardan qorg'adı.
32 Solay etip, bizler Erusalimge jetip kelip, ol jerde u'sh ku'n dem aldıq.
33 To'rtinshi ku'ni Qudayımızdın' İbadatxanasına barıp, gu'misti, altındı ha'm ıdıslardı ta'rezige tartıp, Uriya ulı ruwxaniy Meremotqa tapsırdıq. Pinexas ulı Elazar onın' qasında boldı. Lebiyli Eshua ulı İozabad ha'm Binnuy ulı Noadiya da olar menen birge edi.
34 Ha'r bir na'rse sanaldı ha'm ta'rezige tartıldı. O'lshengen zatlardın' ha'mmesi sol waqıtta jazıp qoyıldı.
35 Tutqınnan kelgenler, yag'nıy su'rginnen qaytıp kelgenler İzraildın' Qudayına arnap, jandırılatug'ın qurbanlıqlar berdi. Olar pu'tkil izraillılar ushın on eki bug'a, toqsan altı qoshqar, jetpis jeti toqlı shaldı. Al gu'na qurbanlıg'ı ushın on eki tekeni qurbanlıqqa shaldı. Bulardın' ha'mmesi Jaratqan İyege usınılg'an jandırılatug'ın qurbanlıqlar edi.
36 Su'rginnen qaytqanlar patshanın' buyrıqların patshanın' nayıplarına ha'm da'ryanın' arg'ı ta'repindegi wa'layatlarının' ha'kimlerine berdi. Olar da İzrail xalqın ha'm Qudaydın' İbadatxanasın qollap-quwatlaytug'ın boldı.
