Nexemiya 13 bob

Nexemiyanın' son'g'ı kirgizgen jan'alıg'ı(1-31).

¹ Sol ku'ni Muwsanın' kitabı xalıqqa oqıp berildi. Kitapta bılay dep jazılg'an edi: «Ammonlar menen moablılar hesh qashan Qudaydın' ja'miyetine kire almaydı.

² Sebebi olar İzrail xalqı Mısırdan shıqqanda, olardı suw ha'm nan menen qarsı alıwdın' ornına, izraillılardı g'arg'aw ushın Bilamdı jallap aldı. Biraq Qudayımız g'arg'ıstı jarılqawg'a aylandırdı».

³ Bul Nızamdı esitkennen son', İzrail xalqı barlıq o'zge millet adamların o'zlerinen bo'lekledi.

⁴ Bunnan aldın Qudayımızdın' İbadatxanasındag'ı zatlar saqlanatug'ın bo'lmege ruwxaniy Elyashib qadag'alawshı etip tayınlang'an edi. Ol Tobiya menen jaqın baylanısta bolıp,

⁵ Tobiyag'a u'lken bir bo'lme ajıratıp bergen edi. Burın bul bo'lmege g'a'lle sadaqaları, xosh iyisli tu'tetki, İbadatxana buyımları, sonday-aq nızam boyınsha lebiylilerge, qosıqshılarg'a ha'm da'rwaza qarawıllarına tiyisli bolg'an da'n, sharap ha'm za'ytu'n mayınan alıng'an u'sirler, ruwxaniylerge berilgen sadaqalar qoyılatug'ın edi.

⁶ Biraq bul isler bolıp atırg'an waqıtta men Erusalimde emes edim. Sebebi Babilon patshası Artakserkstin' patshalıg'ının' otız ekinshi jılı men patshag'a ketken edim. Bir neshe waqıt o'tkennen keyin, men patshadan ruxsat alıp,

⁷ Erusalimge qayttım. Sonda Elyashib islegen jaman is, yag'nıy Elyashibtin' Tobiyag'a Qudaydın' İbadatxanasının' ha'wlisinen bir bo'lme ajıratıp bergenin bildim.

⁸ Bug'an qattı g'a'zebim kelip, Tobiyag'a tiyisli ha'mme zatlardı bo'lmeden shıg'arıp, ılaqtırdım.

⁹ Keyin bo'lmelerdi pa'klewdi buyırdım. Son'ınan Qudaydın' İbadatxanasına tiyisli buyımlardı, g'a'lle sadaqaların ha'm xosh iyisli tu'tetkini ol jerge qaytadan qoydırdım.

¹¹ Sonda el basshılarına keyip, olarg'a: «Qudaydın' İbadatxanası nege qarawsız qaldı?» – dedim. Son'ınan ketip qalg'anlardın' ha'mmesin qayta jıynap, o'z orınlarına xızmetke qoydım.

¹² Sonda pu'tkil Yahuda xalqı da'nnen, sharaptan ha'm za'ytu'n mayınan beretug'ın u'sirlerin zatlar saqlanatug'ın bo'lmelerge alıp kele basladı.

¹³ Men ruwxaniy Shelemiyanı, ulama Sadoqtı ha'm lebiylilerden Pedayanı zatlar saqlanatug'ın bo'lmelerge juwapker etip, al Mattaniyanın' aqlıg'ı, Zakkurdın' ulı Xanandı olarg'a ja'rdemshi etip qoydım. Bular sadıq adamlar edi. Olardın' wazıypası Lebiy urıwınan bolg'an tuwısqanlarına u'leslerin bo'lip beriwden ibarat edi.

¹⁴ Qudayım, meni yadqa ala go'r. Qudayımnın' İbadatxanası ushın ha'm ondag'ı xızmetler ushın islegen jaqsı islerimdi hesh qashan umıtpag'aysan'!

¹⁵ Sol ku'nleri Yahudada bazı adamlardın' Shabbat ku'ni iskenjede ju'zim sıg'ıp atırg'anın ko'rdim. Bazılardın' qap-qap da'ndi esheklerine ju'klep, ja'ne de sharap, ju'zim, a'njir ha'm basqa da ju'klerdi artıp, Shabbat ku'ni Erusalimge alıp kiyatırg'anın ko'rdim. Sol ku'ni, men olardı azıq-awqat satıp atırg'anı ushın qattı eskerttim.

¹⁶ Sonın' menen birge Erusalimde jasaytug'ın tirliler balıq ha'm ha'r tu'rli zatlar alıp kelip, Shabbat ku'ni Erusalimde jasaytug'ın yahudiylerge satıp ju'rdi.

¹⁷ Men Yahuda aqsu'yeklerine keyip, olarg'a bılay dedim: «Nege bunday jawız islerdi islep, Shabbat ku'nin xorlap atırsız?

¹⁸ Ata-babaların'ız da usılay islegenlikten Qudayımız basımızg'a ha'm bul qalag'a apatshılıq jawdırmadı ma? Sizler Shabbat ku'nin xorlaw arqalı Qudaydın' İzrailg'a degen g'a'zebin lawlatıp atırsızlar».

¹⁹ Ja'ne de, lebiylilerge o'z u'lesleri berilmegenin, sol sebepli İbadatxanada xızmet etip ju'rgen lebiyliler menen qosıqshılar o'z atızlarına ketip qalg'anın bildim.