Nexemiya 5 bob
1 Sol waqıtları xalıq ishinde, erkekler ha'm olardın' hayalları arasında o'z tuwısqanları bolg'an yahudiylerge degen ku'shli narazılıq ju'zege keldi.
2 Olardın' bazıları: «Bizler ko'pshilikpiz, ul-qızlarımız ko'p. Nan tawıp jep, tirishilik etiwimiz ushın bizlerge biyday kerek», – dedi.
3 Al bazıları bolsa: «Ashlıq waqıtta nanımızdı tabıw ushın, atızlarımızdı, ju'zimzarlarımızdı ha'm u'ylerimizdi girewge berip atırmız», – dedi.
4 Ja'ne basqaları bolsa: «Patshag'a salıq to'lew ushın atızlarımız ha'm ju'zimzarlarımız u'stinen u'steme pul aldıq.
5 Bizlerdin' yahudiy tuwısqanlarımız benen qanımız bir, balalarımızdın' da olardın' balalarınan ayırmashılıg'ı joq. Biraq bizler ul-qızlarımızdı qul etip satıwg'a ma'jbu'r bolıp atırmız, qızlarımızdın' ayırımları a'lle qashan shorılıqqa satıldı. Atız ha'm ju'zimzarlarımız endi basqalardın' qolına o'tkenlikten, bizler sharasız qaldıq», – dedi.
6 Men olardın' narazılıg'ı menen usınday so'zlerin esitkenimde, qattı ashıwlandım.
7 Biraz oylandım, keyin aqsu'yekler menen basshılarg'a keyip: – Sizler o'z tuwısqanların'ızdan u'steme alıp atırsızlar ma? – dedim. Men usı ma'selege baylanıslı u'lken jıyın topladım.
8 Son'ınan jıynalg'anlarg'a: – Bizler basqa xalıqlarg'a satılg'an yahudiy tuwısqanlarımızdı ku'shimiz jetkenshe qaytarıp satıp aldıq. Al sizler bolsan'ız, o'z tuwısqanların'ızdı satıp atırsızlar. Olardı ja'ne satıp alıwımız ushın ba? – dedim. Olar juwap tappay, u'nsiz turdı.
9 Men olarg'a ja'ne bılay dedim: – İslep atırg'anın'ız jaqsı is emes. Bizge dushpan bolg'an xalıqlarg'a masqara bolmaw ushın, Qudaydan qorqıp jasaw kerek emes pe edi?
10 Menin' o'zim, tuwısqanlarım ha'm xızmetkerlerim menen birge xalıqqa qarızg'a pul ha'm biyday berip atırmız. Biraq endigiden bılay ol ushın u'steme alıwdı toqtatayıq!
11 Ha'zirden-aq olarg'a o'zlerin'iz tartıp alg'an atızların, ju'zim ha'm za'ytu'n bag'ların, u'ylerin, u'steme ushın to'legen gu'mislerin, biydayın, sharap ha'm mayların qaytarıp berin'ler.
12 Olar: – Qaytarıp beremiz, olardan hesh na'rse talap etpeymiz. Sizin' aytqanın'ızday qılamız, – dedi. Sonda men ruwxaniylerdi shaqırtıp, ruwxaniylerdin' aldında aqsu'yekler menen basshılarg'a bergen wa'desinde turatug'ını tuwralı olarg'a ant ishtirdim.
13 Son'ınan shapanımnın' belbewligin sheship qag'ıp: – O'z wa'desinde turmag'an adamdı Quday u'y-jayınan ha'm iyeliginen ayırıp, dımsız qaldırsın, – dedim. Pu'tkil jıynalg'anlar: – Awmiyin, – dedi ha'm Jaratqan İyege alg'ıs-maqtawlar ayttı. Xalıq bergen wa'desinde turdı.
14 Ja'ne de, o'zim Yahuda jerine ha'kim bolıp tayınlang'an ku'nnen baslap on eki jıl dawamında, yag'nıy Artakserkstin' patshalıg'ının' jigirmalanshı jılınan otız ekinshi jılına shekem men de, tuwısqanlarım da ha'kimge arnalg'an azıq-awqattan jemedik.
15 Mennen burıng'ı ha'kimler xalıqqa awırmanlıq ju'klep, nan menen sharaptan tısqarı olardan qırıq shekel gu'mis te alg'an eken. Ha'tte, olardın' xızmetshileri de xalıqqa o'z hu'kimin o'tkergen eken. Biraq men Qudaydan qorqqanlıqtan, bulay islemedim.
16 Onın' ornına men bar ku'shimdi diywaldın' qurılısına bag'ıshladım. Xızmetkerlerimnin' ha'mmesi istin' basına jıynaldı. Bizler birde bir atız satıp almadıq.
17 Aylanamızdag'ı basqa xalıqlardan kelgenlerdi esapqa almag'annın' o'zinde, yahudiylerden ha'm lawazımlı adamlardan bir ju'z eliw adam menin' dasturxanımnan awqatlanatug'ın edi.
18 Bir ku'nlik awqat ushın bir o'giz, altı semiz qoy ha'm bir qansha tawıqlar pisiriletug'ın, ja'ne ha'r on ku'nde bir ret mol etip, tu'rli-tu'rli sharaplardan beriletug'ın edi. Degen menen, men u'lke ha'kimine tiyisli awqattı talap etpedim, onısız da xalıqtın' ju'gi awır edi.
19 Qudayım, bul xalıq ushın islegen islerimdi menin' iygiligim ushın eske ala go'r!
