Ayup 18 bob
1 Sonda shuwaxlı Bildad bılay dep juwap berdi:
2 – Bunday so'zlerdi aytıwdı qashan toqtatasızlar? Aqılg'a kelin'ler, son'ınan so'ylesemiz.
3 Ayup, sen ne ushın bizlerdi haywan dep sanap tursan'? Ne ushın ko'zin'e aqmaq bolıp ko'rinip turmız?
4 G'a'zep penen o'z janın'dı jaraqatlap atırsan', Seni dep jer beti qan'ırap qalıp, Jartaslar o'z ornınan qozg'alıwı kerek pe?
5 Durıs, zalımnın' otı so'nedi, Ha'tte, ushqını da qalmaydı.
6 Shatırındag'ı jaqtılıq qaran'g'ılıqqa aylanadı, Joqarısında turg'an shırası da o'ship qaladı.
7 Ken' qa'demleri qısqarıp, O'z jobalarının' qurbanına aylanadı.
8 O'z ayaqları onı torg'a jetelep, O'zi barıp, shuqırg'a tu'sedi.
9 Duzaq onı tabanınan qısıp alıp, Tor onı bekkem uslap aladı.
10 Ol ushın jerge bir duzaq jip qoyılg'an, Jolında onı qaqpan ku'tpekte.
11 Ja'n-jag'ınan qorqınısh onın' za'rresin ushırıp, Ha'r adımında izinen quwıp ju'redi.
12 Onın' ku'shi ashlıqtan tawısılıp, Su'rnikken jerinde apat ta ku'tip turadı.
13 Kesellik onın' terisin kemiredi, Awır qa'stelik onın' mu'shelerin jep taslaydı.
14 Onı qa'wipsiz shatırınan suwırıp alıp, Qorqınısh patshasının' aldına alıp baradı.
15 Zalımnın' shatırın o'rt jalmaydı, Ol jasag'an u'yge ıssı ku'kirt jawadı.
16 Onın' tamırları qurg'ap, kewip, Shaqaları quwrap qaladı.
17 Jer betinde ol eske alınbay, Ko'shelerde onın' atı o'shedi.
18 Ol jarıqtan tu'nekke aydalıp, Bul du'nyadan quwıp jiberiledi.
19 Xalıq arasında onnan ul da, aqlıq ta qalmaydı, Ol jasag'an jerde hesh kimi qalmaydı.
20 Batıstag'ılar onın' ta'g'dirinen qorqınıshqa tu'sedi, Shıg'ıstag'ılardı qorqınısh biylep aladı.
21 Awa, jawızlardın' jasaytug'ın jeri usı awhalg'a tu'sedi, Qudaydı tanımaytug'ınlardın' ma'kanı usınday boladı.
