1 Ezilgen biysharanın' Jaratqan İyege o'z da'rtin aytıp, etken duwası
2 Jaratqan İye, duwamdı esit, Pa'riyadım Sag'an jetip barsın.
3 Qıyın ku'nimde ju'zin'di mennen jasırma, Qulaq sal menin' dawısıma, Seni shaqırg'anımda, tez juwap ber mag'an.
4 O'mirim tu'tindey joq bolıp, Su'yeklerim ottay janıp atır.
5 Ju'regim quwrag'an sho'ptey bolıp qaldı, Awqat jewdi de umıttım.
6 Dad salıp, ahıw-nala shekkenlikten, Etim su'yeklerime jabısqan.
7 Men qula du'zdegi uzaqshag'a uqsayman, Qarabaqanag'a aylang'an jerlerdegi bayıwlı sıyaqlıman.
8 Ko'zime uyqı kelmeydi, Tam basındag'ı jalg'ız bir qus yan'lıman.
9 Ku'ni boyı dushpanlarım meni mazaq qıladı, Meni mazaqlawshılar atımdı na'let aytıw ushın qollanadı.
10 Nan ornına ku'l jep atırman, Ko'z jasımdı ishimligime aralastıraman.
11 Senin' ashıw ha'm qa'ha'rin' sebepli usınday qılıp atırman. Awa, Sen meni ko'terip, ılaqtırdın'.
12 Keshki waqıttag'ı ko'len'kege uqsaydı o'mirim, Sho'p sıyaqlı, sarg'ayıp solıp atırman.
13 Biraq Sen, taxtın'da ma'n'gi otırasan', Jaratqan İye, Senin' dan'qın' a'wladtan-a'wladqa dawam etedi.
14 Ornın'nan turıp, Siong'a rehim et, Og'an miyrim-sha'pa'a't ko'rsetetug'ın waqıt keldi, Belgilengen waqıt-saat jetip keldi.
15 Qulların' onın' tasların da qa'dirleydi, Onın' topırag'ı ushın janları ashıydı.
16 Milletler Jaratqan İyenin' atınan, Jer ju'zindegi patshalar Onın' saltanatınan qorqadı.
17 Jaratqan İye Siondı qayta tikleydi, O'z saltanatı menen payda boladı.
18 Gedeylerdin' duwasına qulaq saladı, Pa'riyadınan bas tartpaydı.
19 Ele tuwılmag'an xalıq Jaratqan İyege alg'ıs-maqtaw aytsın, Mınalar keyingi a'wlad ushın jazılsın:
20 Tutqınlardın' nalasın tın'law ushın, O'limge hu'kim etilgenlerdi qutqarıw ushın, Jaratqan İye joqarıdag'ı muxaddes ma'kanınan qaradı,
21 Ko'klerden jer ju'zine na'zer tasladı.
22 Solay etip, Jaratqan İyenin' atı Sionda, Alg'ıs-maqtaw Erusalimde ja'riyalanadı.
23 Xalıqlar ha'm patshalıqlar, Jaratqan İyege sıyınıw ushın jıynaladı.
24 O'mir jolımda Ol meni ku'shten qaldırdı, O'mir jasımdı qısqarttı.
25 Men bılay dedim: «Qudayım, o'mirimnin' jartısında janımdı alma! Senin' jılların' dawam eter a'wladtan-a'wladqa!
26 A'zelden jer ju'zin ornattın', Ko'kler Senin' qolların'nın' do'retpesi.
27 Olar joq boladı, al Sen dawam etesen', Olardın' ha'mmesi kiyimdey tozıp qaladı, Shapanday etip olardı almastırasan', Olar joq bolıp ketedi.
28 Biraq Sen o'zgermeysen', Hesh tawısılmaydı Senin' jılların'.
29 Qulların'nın' balaları usı jerdi ma'kanlaydı, A'wladları Senin' aldın'da qa'wipsiz jasaydı»
