Zabur 102 bob
1 Jaratqan İyege alg'ıslar ayt, ha'y janım! Onın' muxaddes atına alg'ıslar ayt, ha'y pu'tkil barlıg'ım!
2 Jaratqan İyege alg'ıslar ayt, ha'y janım! Umıtpa Onın' barlıq jaqsılıqların!
3 Barlıq ayıplarımdı keshiretug'ın, Ha'mme keselime shıpa beretug'ın,
4 Janımdı o'lim shuqırınan azat etetug'ın, Su'yispenshilik ha'm rehim tajın kiydiretug'ın,
5 O'mirimdi iygilik penen toltıratug'ın Ol, Meni bu'rkittey etip, jaslıg'ımdı tikleydi.
6 Jaratqan İye barlıq ezilgenlerge, Haqlıq ha'm a'dalatlıq qıladı.
7 O'z jolların Muwsag'a, İslerin izraillılarg'a ko'rsetti.
8 Jaratqan İye rehimli ha'm miyrimli, Ol sabır-taqatlı ha'm su'yispenshiligi sheksiz.
9 Ol ba'rqulla ayıplay bermeydi, Ma'n'gige kek te saqlamaydı.
10 Bizlerge gu'nalarımızg'a qarap qatnas qılmaydı, Jamanlıqlarımızdı o'zimizge qaytarmaydı.
11 Ko'kler jer ju'zinen qanshelli joqarı bolsa, Onın' O'zinen qorqatug'ınlarg'a bolg'an su'yispenshiligi de sonshelli ullı.
12 Shıg'ıs batıstan qanshelli uzaq bolsa, Ol jınayatlarımızdı bizlerden sonshelli uzaqlastırdı.
13 A'ke balalarına qanday rehim qılsa, Jaratqan İye de O'zinen qorqatug'ınlarg'a sonday rehim qıladı.
14 Ol bizlerdin' qanday jaralg'anımızdı biledi, Topıraqtan ekenimizdi umıtpaydı.
15 Adamzattın' o'miri sho'pke uqsaydı, Daladag'ı gu'ldey bolıp gu'lleydi.
16 Samal eskende, joq bolıp ketedi, Bolg'an jeri onı qaytıp tanımaydı.
17 Biraq Jaratqan İye O'zinen qorqatug'ınlardı ma'n'gi su'yedi, Onın' kelisimine a'mel qılg'anlardın',
18 Ha'm pa'rmanlarına muqıyatlı tu'rde boysıng'anlardın', Balalarının' balalarına sadıqlıg'ı dawam etedi.
19 Jaratqan İye O'z taxtın ko'klerge ornattı, Onın' patshalıg'ı ha'mme jerdi o'z ishine aladı.
20 Onın' so'zine qulaq salıp, Aytqanların orınlaytug'ın, Qu'direti ku'shli perishteler, Jaratqan İyege alg'ıslar aytın'!
21 Jaratqan İyenin' ko'ktegi la'shkerleri, Onın' erkin orınlaytug'ın xızmetkerleri, Og'an alg'ıs-maqtawlar aytın'!
22 Jaratqan İyege alg'ıslar aytın', Ha'y, Onın' patshalıg'ındag'ı barlıq jaratılıs! Jaratqan İyege alg'ıslar ayt, ha'y janım!
