1 Jaratqan İyege alg'ıslar ayt, ha'y janım! Qudayım Jaratqan İye, Sen og'ada ullısan'! Saltanat ha'm ullılıqqa bo'lengensen',
2 Shapanday etip nurg'a orang'ansan', Ko'klerdi shatırday etip jayg'ansan',
3 Sarayın'dı joqarıdag'ı suwlardın' u'stine qurg'ansan', Bultlardı O'zin'e sawash arbası qılg'ansan', Samal qanatlarına minip ketesen'.
4 Samallardı O'zin'e xabarshı, Ot jalınların xızmetker qılasan'.
5 Sen jerdi tiykar u'stine ornattın', Ol ma'n'gi-baqıy ornınan qozg'almas.
6 Og'an tun'g'ıyıqtı kiyim sıyaqlı kiygizdin', Ha'tteki, tawlardın' joqarısın da suw qaplag'an.
7 Senin' keyislerin'nen suwlar qashtı, Gu'rkiregen dawısın'nan olar shegindi.
8 Tawlardan asıp, oypatlıqlarg'a tu'sti, Solar ushın O'zin' belgilegen jerlerge aqtı.
9 Suwlar tasımasın, jer ju'zin ja'ne qaplamasın dep, Olar ushın shegara qoydın'.
10 Bulaqlardı saylarg'a qaray, Tawlar arası menen ag'ızasan'.
11 Olar barlıq jabayı haywanlardı suwg'aradı, Qulanlardın' sho'lin qandıradı.
12 Quslar suw boylarında jasaydı, Putalar arasınan olar sayraydı.
13 Ko'ktegi u'yin'nen tawlardı suwg'arasan', Jer ju'zi islerin'nin' miywesinen toyadı.
14 Mallardı sho'pler menen ta'miyinleysen', Adamlar miynet penen azıg'ın alsın dep, Jerge eginler o'siresen'.
15 Kewillerin ko'teretug'ın sharaptı, Ju'zlerine nur beretug'ın za'ytu'n mayın, Ku'sh-quwat beretug'ın nandı Sen beresen'.
16 Jaratqan İyenin' terekleri, O'zi tikken Lebanondag'ı kedr ag'ashları suwg'a qanadı.
17 Quslar tereklerde uya quradı, La'ylektin' uyası bar sa'rwi ag'ashlarında.
18 Taw eshkileri biyik tawlarda jasaydı, Jartaslarda damanlardın' inleri bar.
19 Waqıttı belgilesin dep, aydı, Batatug'ın waqtın biletug'ın quyashtı jarattın'.
20 Qaran'g'ılıq sho'ktirgenin'de, tu'n boladı, Sonda tog'ay haywanları gezip ju'redi.
21 Arıslanlar aqırıp, olja izleydi, Qudaydan azıg'ın soraydı.
22 Quyash shıqqanda, olar izine qaytadı, O'zlerinin' inlerine barıp jatadı.
23 Adam o'z jumıslarına shıg'adı, Keshke deyin jumısı menen ba'nt boladı.
24 Qanshelli isler qıldın', Jaratqan İye!
25 Mine, ushı-qıyırı joq ten'izler, İshinde qaynag'an sansız janzatlar, U'lkenkishi janıwarlar.
26 Ol jerde kemeler ju'zedi, İshinde oynasın dep, jarattın' Liwyatandı.
27 Waqtında ırısqımızdı bersin, dep, Olardın' ha'mmesi Sag'an ko'z tigedi.
28 Irısqısın bergenin'de, olar jıynap aladı, Qolların'dı ashqanın'da, olar jep toyadı.
29 Ju'zin'di jasırg'anın'da, olar sasqalaqlap qaladı, Janların alsan', olar o'lip, topıraqqa qaytadı.
30 Jan bersen', olar jaratıladı, Jan'adan o'mir beresen' jer ju'zine.
31 Jaratqan İyenin' saltanatı ma'n'gi dawam etsin! Jaratqan İye shadlansın O'z jaratqanlarına!
32 Ol jer betine ko'z taslasa, jer titireydi, Tawlarg'a qol tiygizse, tawlar tu'teydi.
33 O'mirim boyı Jaratqan İyeni jırlayman, Bar ekenmen, saz shertip, Qudayıma alg'ıslar aytaman.
34 Oy-pikirlerim Og'an maqul bolsın, Jaratqan İye sebepli shadlanaman!
35 Jer ju'zinen gu'nakarlar joq bolsın, Bunnan bılay jawızlar bolmasın! Jaratqan İyege alg'ıslar ayt, ha'y janım! Haliluya!
