Zabur 108 bob
1 Men alg'ıslap ju'rgen Quday, U'nsiz qalma!
2 Jawızlar ha'm o'tirikshiler mag'an qarsı awzın ashıp, Jalg'anshı tilleri menen meni aldaydı.
3 Jerkenishli so'zler menen meni do'gereklep, Sebepsiz mag'an qarsı hu'jim qıladı.
4 Su'yispenshiligime qarsı ayıp tag'adı, Biraq duwa etiwdi dawam etemen.
5 Jaqsılıg'ıma jamanlıq qaytaradı, Su'yispenshiligim ushın meni jek ko'redi.
6 Jawız adamdı olarg'a qarsı qoy, On' jag'ında ayıplawshı birew tursın!
7 Hu'kim etilgende, olar ayıplı bolsın, Olardın' duwası gu'na sanalsın!
8 Olardın' o'miri qısqa bolsın, İsleytug'ın wazıypasın basqa birew alsın!
9 Balaları jetim, Hayalları jesir bolıp qalsın!
10 Balaları gezende bolıp, tilenshilik qılsın, Qarabaqanag'a aylang'an u'ylerinen ketip, nan izlesin!
11 Mal-mu'liklerin su'txorlar iyelesin, Jıynap-tergenlerin jat adamlar tartıp alsın!
12 Hesh kim olarg'a jaqsılıq qılmasın, Jetimlerine hesh kim rehim etpesin!
13 Olardın' a'wladı joq bolsın, Bir a'wladtan son' atları o'ship qalsın!
14 Olardın' ata-babalarının' gu'naların, Jaratqan İye, Sen eske al, Analarının' gu'nası o'shirilmesin!
15 Gu'naları ha'mme waqıtta, Jaratqan İye, Senin' aldın'da tursın, Olardın' atların jer ju'zinen joq et!
16 Sebebi olar jaqsılıq qılıwg'a urınbadı, Biyshara ha'm mu'ta'jlerdi quwdalap, U'mitsizlikke tu'skenlerdi o'ltirdi.
17 Basqalardı na'letlewdi jaqsı ko'rdi, Endi sol na'letler o'z basına tu'ssin! Hesh kimdi jarılqawdı xosh ko'rmedi, Endi jarılqaw olardan uzaq bolsın!
18 Na'letti olar kiyimdey etip kiyip aldı, Na'letler suwday ishine kirsin, Mayday su'yeklerine sin'sin!
19 Kiyim kiygendey, na'letke oranıp alsın, Onı ha'r ku'ni beline qayıs qılıp taqsın!
20 Jaratqan İye usılay etip qaytarsın meni ayıplawshılarg'a, Mag'an qarsı jaman so'z aytıwshılarg'a!
21 Al Quday İye, O'z atın' ushın mag'an ja'rdem ber, Su'yispenshiligin' iygilikli, meni qutqar!
22 Men biyshara ha'm mu'ta'jben, İshimdegi ju'regim jaralang'an.
23 Keshki ko'len'kedey joq bolıp baratırman, Qag'ıp jiberildim shegirtke sıyaqlı.
24 Oraza tutıwdan dizelerimde da'rman qalmadı, Azıp, su'yek bolıp qaldım.
25 Meni ayıplap atırg'anlardın' aldında ju'zim to'men boldı, Meni ko'rgende, olar basın shayqaydı!
26 Mag'an ja'rdem ber, Qudayım, Jaratqan İye, Su'yispenshiligin' haqı qutqar meni!
27 Olar bilsin bul iste Senin' qolın' bar ekenin, Bunı Senin' islegenin'di, Jaratqan İye!
28 Meyli, olar meni na'letlesin, biraq Sen meni jarılqaysan', Mag'an hu'jim qılg'anda, olar shermende bolsın, Qulın' bolg'an men shadlanaman.
29 Meni ayıplawshılar kiyim kiygendey uyatqa bo'lensin, Shapan jamılg'anday, shermendelikti jamılsın!
30 Jaratqan İyeni ko'p ta'riyipleymen, Ja'ma'a't ishinde Onı alg'ıslayman.
31 Ol mu'ta'j adamnın' on' ta'repinde turadı, Onın' janına qarsı hu'kim shıg'aratug'ınlardan qutqaradı.
