1 Jaratqan İyeni ta'riyiplen', Ol iygilikli, Su'yispenshiligi ma'n'gi dawam etedi!
2 İzrail xalqı bılay desin: «Su'yispenshiligi ma'n'gi dawam etedi!»
3 Xaronnın' urpag'ı bılay desin: «Su'yispenshiligi ma'n'gi dawam etedi!»
4 Jaratqan İyeden qorqatug'ınlar bılay desin: «Su'yispenshiligi ma'n'gi dawam etedi!»
5 Qıyın jag'dayımda Jaratqan İyege jalbarındım, Juwap berip, Ol meni ken'islikke shıg'ardı.
6 Jaratqan İye menin' menen birge, qorqpayman, Ne qıla aladı adamlar mag'an?
7 Jaratqan İye menin' menen birge, Ol menin' ma'detkerim, Meni jek ko'rgenlerdin' jen'ilisin ko'remen.
8 Adamnan u'mit etkennen go're, Jaratqan İyeden pana izlegen jaqsı.
9 Aqsu'yeklerden u'mit etkennen go're, Jaratqan İyeden pana izlegen jaqsı.
10 Barlıq milletler meni qorshap aldı, Jaratqan İyenin' atı menen qıyrattım olardı.
11 Qorshap alıp, mag'an hu'jim qıldı, Jaratqan İyenin' atı menen qırdım olardı.
12 Ha'rrelerdey meni qorshap aldı, Biraq jang'an tiken putasınday tez o'ship qaldı, Jaratqan İyenin' atı menen qırdım olardı.
13 Meni qulatıw ushın qattı iyterdi, Biraq Jaratqan İye mag'an ja'rdem berdi.
14 Jaratqan İye ku'sh-qu'diretim, Qutqarıwg'a keldi Ol meni.
15 Shadlıq ha'm jen'is dawısları, Jan'laydı haq adamlardın' shatırlarında: «Jaratqan İyenin' on' qolı qu'diretli isler qıladı!
16 Jaratqan İyenin' on' qolı jen'is beredi, Jaratqan İyenin' on' qolı qu'diretli isler qıladı!»
17 Men o'lmeymen, jasayman, Jaratqan İyenin' islerin ja'riyalayman.
18 Jaratqan İye meni qatan' jazalap, jolg'a saldı, Biraq o'limge tapsırmadı
19 Ashın' mag'an a'dalat da'rwazaların, Kirip, Jaratqan İyeni ta'riyipleyin.
20 Bul Jaratqan İyenin' da'rwazası! Haq adamlar onnan kire aladı.
21 Seni ta'riyipleymen, sebebi mag'an juwap berdin', Meni qutqarıwg'a keldin'.
22 Qurılısshılardın' kereksiz dep taslag'an tası, U'ydin' mu'yeshinin' tiykarg'ı tası boldı.
23 İyemiz qılg'an bul is, Ko'zimizge a'jayıp ko'rindi!
24 Bu'gin Jaratqan İyenin' jaratqan ku'ni, Usı ku'ni quwanıp, shadlanayıq!
25 Jalbarınamız, Jaratqan İye, qutqar bizlerdi, Jalbarınamız, Jaratqan İye, bizlerge a'wmet ber!
26 Jaratqan İyenin' atı menen keletug'ın jarılqansın! Jaratqan İyenin' u'yinen sag'an pa'tiya beremiz.
27 Jaratqan İye – Qudaydur, bizlerge nur beredi, Bayramdı belgilep baslan', Japıraqlı shaqalardı alıp, qurbanlıq orıng'a barın'.
28 Sen menin' Qudayımsan', Seni ta'riyipleymen, Sen menin' Qudayımsan', Seni ullılayman.
29 Jaratqan İyeni ta'riyiplen', Ol iygilikli, Su'yispenshiligi ma'n'gi dawam etedi.
