1 Qanday baxıtlı minsiz joldan ju'rgenler, Jaratqan İye, Senin' nızamın' boyınsha jasaytug'ınlar!
2 Qanday baxıtlı Senin' sha'rtlerin'e a'mel qılatug'ınlar, Shın ju'regi menen Seni izlegenler!
3 Olar hesh qanday nahaqlıq qılmas, Senin' jolın'da ju'rer.
4 Bergen pa'rmanların'dı, Muqıyatlı tu'rde orınlawımızdı tapsırdın'.
5 Qa'ne endi, turaqlı bolsam, Senin' qag'ıydaların'dı orınlawda!
6 Eger barlıq buyrıqların'nan na'zerimdi ayırmasam, Men shermende bolmayman.
7 Senin' a'dil nızamların'dı u'yrengenimde, Pa'k ju'rek penen Sag'an alg'ısmaqtaw aytaman.
8 Qag'ıydaların'dı orınlayman, Meni pu'tkilley taslap ketpe!
9 Jas jigit qalay pa'k jol menen ju're aladı? Senin' so'zin' boyınsha jasaw arqalı sog'an erisedi.
10 Pu'tkil ju'regim menen Sag'an umtılaman, Buyrıqların'nan awıp ketiwime jol qoyma!
11 Sag'an qarsı gu'na islemewim ushın, Ju'regimde saqladım so'zlerin'di.
12 Alg'ıslar bolsın Sag'an, Jaratqan İye, Mag'an qag'ıydaların'dı u'yret.
13 Awzın'nan shıqqan barlıq qararların'dı, O'z awzım menen ja'riyalayman.
14 Sha'rtlerin' menen jasap, shadlanaman, U'lken baylıq tapqanday bolaman.
15 Pa'rmanların' haqqında teren' oy juwırtaman, Senin' jolların'a dıqqat qılaman.
16 Qag'ıydaların'nan la'zzet alaman, So'zlerin'di umıtpayman.
17 Mag'an, qulın'a iygilik qıl, O'mir su'rip, so'zin'e a'mel qılaman.
18 Ko'zlerimdi ash, Nızamın'dag'ı a'jayıp islerin'di ko'reyin.
19 Men bir kelgindimen bul du'nyada, Buyrıqların'dı mennen jasırma.
20 Ba'rqulla Senin' hu'kimlerin'di, Janım sag'ınıp sarg'ayadı.
21 Buyrıqların'nan awıp ketken, Na'letlengen ta'kabbirlerdi keyiysen'.
22 Masqarashılıq ha'm xorlıqtı mennen uzaqlastır, Sebebi sha'rtlerin'di orınlap kiyatırman.
23 Basshılar jıynalıp, mag'an qarsı o'sek aytsa da, Men, qulın' Senin' qag'ıydaların' haqqında teren' oy juwırtaman.
24 Sha'rtlerin'nen la'zzet alaman, Olar mag'an aqıl beredi.
25 Janım a'jelge jaqınlap qaldı, Wa'den' boyınsha o'mir ber mag'an.
26 Ju'rgen jollarımdı aytıp berdim, mag'an juwap berdin', Qag'ıydaların'dı u'yret mag'an!
27 Pa'rmanların'nın' ma'nisin tu'sindir, Solay etip, a'jayıp islerin' haqqında oy juwırtayın.
28 G'am-qayg'ıdan janım ada boldı, Wa'de qılg'anın'day, meni ayaqqa turg'ız!
29 Jaman joldan uzaqlastır, Miyrimin' menen mag'an nızamın'dı u'yret.
30 Sadıqlıq jolın tan'ladım, A'dalatlı qag'ıydaların'dı ko'z aldıma qoydım.
31 Sha'rtlerin'di bekkem uslayman, Jaratqan İye, uyatqa qaldırma meni!
32 Shın ju'rekten buyrıqların'nın' jolınan ju'remen, Kewlime ken' tu'sinik berdin'.
33 Qag'ıydaların'nın' jolın u'yret mag'an, Jaratqan İye, Men olardı aqırına deyin orınlayman.
34 Tu'sinik ber, nızamın'a a'mel qılaman, Shın ju'regimnen og'an boysınaman.
35 Buyrıqların'nın' jolı menen meni jetele, Men onnan ra'ha't alaman.
36 Ju'regimdi nahaq paydag'a emes, Al O'z sha'rtlerin'e qaray bur.
37 Ko'zlerimdi biyhuda na'rselerden qaytar, O'z jolın'da janımdı saqlay go'r.
38 Adamlar Sennen qorqıwı ushın, Mag'an, O'z qulın'a bergen wa'den'di orınla.
39 Meni o'zim qorqqan shermendelikten uzaq qıl, Senin' qag'ıydaların' iygilikli.
40 Pa'rmanların'a talpınaman, Sen a'dalatlısan', o'mirimdi saqla.
41 Mag'an su'yispenshiligin'di ko'rset, Jaratqan İye, Wa'den' boyınsha qutqar meni!
42 Sonda meni mazaqlag'anlarg'a juwap qaytara alaman, Senin' so'zin'e isenemen.
43 Haqıyqat so'zin'di alıp qoyma awzımnan, Senin' qararların'a u'mit baylayman.
44 Nızamın'a ha'mme waqıtta, Ha'zir ha'm ma'n'gi-baqıy a'mel qılaman.
45 Men erkin ju'remen, Sebebi pa'rmanların'dı orınlawg'a tırısaman.
46 Patshalar aldında sha'rtlerin'di aytaman, Bunnan uyalmayman.
47 Buyrıqların'nan la'zzet alaman, Olardı jaqsı ko'remen.
48 Buyrıqların'dı su'yip, hu'rmet etemen, Qag'ıydaların' haqqında oy juwırtaman.
49 Qulın' bolg'an mag'an bergen wa'den'di esle, Ol arqalı Sen mag'an u'mit berdin'.
50 Senin' wa'den' o'mirimdi saqlaydı, Azap ishinde qalg'anımda usı mag'an jubanısh beredi.
51 Ta'kabbirler meni ha'dden tıs mazaqlaydı, Sonda da Senin' nızamın'nan ju'z burmadım.
52 A'yyemgi qag'ıydaların'dı esleymen, Solar mag'an jubanısh beredi, Jaratqan İye.
53 Nızamın'nan ju'z burg'an jawızlar sebepli, G'a'zepke tolıp ketemen.
54 Qay jerde jasasam da, Senin' qag'ıydaların'dı jırlap ju'remen.
55 Tu'nde atın'dı esleymen, Jaratqan İye, Nızamın'a a'mel qılaman.
56 Bul mag'an a'det bolıp qalg'an, Senin' pa'rmanların'a a'mel qılaman.
57 Mu'ta'jliklerimnin' bulag'ı Sensen', Jaratqan İye, So'zlerin'di orınlayman, dep wa'de berdim.
58 Shın ju'regimnen Senin' miyrimin'di izleymen, Wa'den' boyınsha mag'an rehim et.
59 Tutqan jollarıma dıqqat ettim, Sha'rtlerin' boyınsha adım attım.
60 Buyrıqların'dı orınlawg'a, Asıg'aman ha'm keshiktirmeymen.
61 Jawızlardın' arqanları meni orap bayladı, Al men nızamın'dı umıtpadım.
62 A'dil hu'kimlerin' ushın, Tu'n ortasında turıp, Seni ta'riyipleymen.
63 Sennen qorqatug'ınlardın', Pa'rmanların'a a'mel qılatug'ınlardın' dostıman.
64 Jer ju'zi su'yispenshiligin'e tolı, Jaratqan İye, Qag'ıydaların'dı u'yret mag'an!
65 Jaratqan İye, jaqsılıq qıldın' qulın'a, Bergen wa'den'de turdın'.
66 Mag'an zeyin ha'm tu'sinik ber, Senin' buyrıqların'a isenemen.
67 Azap shegiwden aldın joldan adastım, Biraq endi Senin' so'zin'e a'mel qılaman.
68 Sen iygiliklisen', jaqsılıq qılasan', Mag'an qag'ıydaların'dı u'yret.
69 Ta'kabbirler jalg'an so'ylep, meni qaraladı, Biraq men shın ju'regim menen pa'rmanların'a boysınaman.
70 Olardın' ju'reklerin may basqan, Al men nızamın'nan la'zzet alaman.
71 Jaqsı boldı azap shekkenim, Usı arqalı qag'ıydaların'dı u'yrendim.
72 Awzın'nan shıqqan nızam men ushın, Mın'lag'an altın ha'm gu'misten bahalıdur.
73 Senin' qolların' meni jaratıp, pishim berdi, Tu'sinik berip, buyrıqların'dı u'yret.
74 Sennen qorqatug'ınlar meni ko'rip quwansın, Men Senin' so'zin'e u'mit bayladım.
75 Jaratqan İye, Senin' hu'kimlerin' a'dil ekenin bilemen, Mag'an a'dalatlı tu'rde azap shektirdin'.
76 Qulın' bolg'an mag'an bergen wa'den' boyınsha, Su'yispenshiligin' meni jubatsın.
77 Mag'an rehim qıl, aman jasayın, Nızamın' men ushın la'zzetli.
78 Meni jalg'an ayıplag'anı ushın, Ta'kabbirler shermende bolsın. Al men pa'rmanların' haqqında oy juwırtaman.
79 Sha'rtlerin'di biletug'ınlar, Sennen qorqatug'ınlar, Mag'an bet bursın.
80 Shermende bolmawım ushın, Qag'ıydaların'a bola ju'regim minsiz bolsın.
81 Qutqarıwın'a intizar bolıp, janım ada boldı, Senin' so'zin'e u'mit bayladım.
82 Bergen so'zin'nin' orınlanıwın ku'tip, Ko'zlerimnin' nurı so'ndi, «Qashan meni jubatasan'?» – dep sorayman.
83 Tozg'an shapanday bolıp qalsam da, Umıtpayman Senin' qag'ıydaların'dı.
84 Qulın' bolg'an men ja'ne qansha ku'tiwim kerek? Meni quwg'ın qılıp atırg'anlardı qashan hu'kim qılasan'?
85 Nızamın'a boysınbaytug'ın ta'kabbirler, Shuqır qazdı men ushın.
86 Barlıq buyrıqların' isenimli, Meni nahaq quwdalamaqta, ja'rdem ber!
87 Olar meni jer ju'zinen joq qıla jazladı, Biraq men Senin' pa'rmanların'nan ayırılmadım.
88 Su'yispenshiligin' haqı janımdı qorg'a, Awzın'nan shıqqan sha'rtlerin'e a'mel qılaman.
89 Jaratqan İye, so'zin' ma'n'gi, Ol ko'klerde bekkem turadı.
90 Sadıqlıg'ın' a'wladtan-a'wladqa dawam etedi, Sen ornatqan jer ju'zi bekkem turadı.
91 Qararların' boyınsha olar bu'ginge deyin turıptı, Olardın' ha'mmesi Sag'an xızmet etedi.
92 Eger nızamın' mag'an la'zzet bag'ıshlamag'anda, Shekken azaplarımnan o'lip keter edim.
93 Pa'rmanların'dı hasla umıtpayman, Solar arqalı o'mirimdi saqladın'.
94 Men Sag'an tiyislimen, qutqar meni, Senin' pa'rmanların'a talpınaman.
95 Jawızlar meni joq qılıw ushın an'lıydı, Al men Senin' sha'rtlerin'e dıqqat awdaraman.
96 Senin' buyrıqların'nan basqa, Hesh bir na'rse minsiz emes.
97 Nızamın'dı qanshelli su'yemen! Ku'ni boyı onın' u'stinde oy juwırtaman.
98 Buyrıqların' meni dushpanlarımnan go're dana qıladı, Buyrıqların' ma'n'gi menin' menen birge.
99 Barlıq ustazlarımnan go're, aqıllıraq boldım, Sebebi sha'rtlerin' u'stinde oy juwırttım.
100 Jası u'lkenlerden go're, danaman, O'ytkeni pa'rmanların'a boysındım.
101 Senin' so'zin'e a'mel qılıw ushın, Jaman jolg'a ayaq basıwdan awlaq boldım.
102 Qag'ıydaların'nan shetke shıqpadım, Sen mag'an ta'lim bergensen'.
103 So'zlerin' tan'layıma sonshelli mazalı, Paldan da tatlı menin' awzıma!
104 Pa'rmanların' arqalı danalıqqa iye bolaman, Sonın' ushın, ha'r qanday jalg'an joldan jerkenemen.
105 So'zlerin' qa'demlerim ushın shıra, Jolımdı jarıq qılatug'ın nur.
106 A'dil qag'ıydaların'dı orınlawg'a ant ishtim, So'zimde turıp, antımdı orınlayman.
107 Ko'p azap shektim, Jaratqan İye, Wa'den' boyınsha janımdı qorg'a.
108 Iqtıyarlı sadaqam bolg'an alg'ıslarımdı qabıl et, Mag'an qag'ıydaların'dı u'yret.
109 Janım ha'mme waqıtta qa'wip astında, Sonda da nızamın'dı umıtpayman.
110 Jawızlar duzaq qurdı mag'an, Sonda da pa'rmanların'nan shetke shıqpadım.
111 Sha'rtlerin' ma'n'gi miyrasım, Ju'regimnin' quwanıshı olar.
112 Qag'ıydaların'a aqırına deyin, Ma'n'gige boysınıwdı qarar ettim.
113 Eki ju'zlilerden jerkenemen, Senin' nızamın'dı su'yemen.
114 Panam ha'm qalqanım Sensen', Senin' so'zin'e u'mit bayladım.
115 Ha'y, jawızlar, mennen awlaq ju'rin', Men Qudayımnın' buyrıqların orınlayman.
116 Quday, jasawım ushın, wa'den' boyınsha meni qollap quwatla, U'mitimdi bosqa shıg'arıp, uyaltpa!
117 Qutqarılıwım ushın, meni qollap quwatla, Mudamı dıqqat salaman qag'ıydaların'a.
118 Qag'ıydaların'nan awıp ketkenlerden ju'z burasan', Olardın' hiyleleri biyhudadur.
119 Du'nyadag'ı jawızlardı shıg'ındıday etip taslaysan', Sonlıqtan su'yemen Senin' sha'rtlerin'di.
120 Sennen qorqqanımnan denem titireydi, Hu'kimlerin'nen qorqaman.
121 A'dil ha'm tuwrı isler qıldım, Eziwshilerdin' qolına qaldırma meni!
122 Qulın'nın' baxtına kepillik ber, Ta'kabbirlerdin' meni eziwine jol qoyma.
123 Meni qutqarıwın'dı ku'tip, Ko'zlerimnin' nurı so'ndi. Meni azat etiwdi wa'de qılg'an edin'.
124 Qulın'a su'yispenshiligin'di ko'rset, Mag'an qag'ıydaların'dı u'yret.
125 Men Senin' qulın'man, mag'an aqıl ber, Sha'rtlerin'di bilip alayın.
126 Jaratqan İye, O'z isin'di qılatug'ın waqtın' keldi, Adamlar nızamın'dı buzdı.
127 Senin' buyrıqların'dı, Altınnan, sap altınnan da jaqsı ko'remen.
128 Sen bergen barlıq pa'rmanların' boyınsha qa'dem basaman, Ha'r bir jalg'an joldan jerkenemen.
129 Senin' sha'rtlerin' a'jayıp, Sonlıqtan olarg'a a'mel qılaman.
130 Ma'nisi ashılg'anda, so'zlerin' nur shashadı, Sadalarg'a aqıl beredi.
131 Sho'llep, awzımdı ashaman, Senin' buyrıqların'a qushtarman.
132 Atın'dı su'ygenlerge mudamı qılg'anın'day, Na'zer salıp, mag'an rehim ko'rset.
133 So'zin' menen qa'demlerimdi bekkemle, Hesh bir gu'na menin' u'stimnen hu'kimdarlıq qılmasın.
134 Adamlardın' zulımlıg'ınan azat qıl meni, Solay etip, pa'rmanların'a a'mel qılaman.
135 Senin' ju'zin' qulın' bolg'an mag'an nurın shashsın, Qag'ıydaların'dı u'yret mag'an.
136 Da'rya bolıp, jas to'giler ko'zlerimnen, Nızamın'a a'mel qılmay atır adamlar.
137 Sen a'dilsen', Jaratqan İye, Hu'kimlerin' a'dalatlı.
138 Buyırg'an sha'rtlerin' a'dalatlı, Olar tolıq isenimli.
139 So'zlerin'di umıttı dushpanlarım, Sog'an degen g'a'zebim din'kemdi qurttı.
140 So'zin' sonday pa'k, Qulın' onı su'yedi.
141 Men kereksizben, xorlang'anman, Biraq pa'rmanların'dı umıtpayman.
142 Senin' a'dalatın' ma'n'gidur, Nızamın' haqıyqatdur.
143 Senin' a'dalatın' ma'n'gidur, Nızamın' haqıyqatdur+.
144 Sha'rtlerin' ma'n'gige a'dalatlıdur, Jasawım ushın mag'an aqıl ber.
145 Pu'tkil ju'regim menen jalbarınaman, Juwap ber mag'an, Jaratqan İye! Senin' qag'ıydaların'a a'mel qılaman.
146 Pu'tkil ju'regim menen jalbarınaman, Juwap ber mag'an, Jaratqan İye! Senin' qag'ıydaların'a a'mel qılaman.
147 Ku'n shıqpastan turıp, ja'rdem sorayman, Senin' so'zin'e u'mit baylayman.
148 Bergen wa'den'di tu'sineyin dep, Tu'ni boyı uyqı kelmes ko'zime.
149 Su'yispenshiligin' boyınsha dawısıma qulaq sal, Hu'kimlerin' boyınsha, janımdı aman saqla, Jaratqan İye!
150 Jawız joba du'zetug'ınlar jaqınlap qaldı, Olar nızamın'nan uzaqlasqan.
151 Biraq Jaratqan İye, Sen janımdasan', Barlıq buyrıqların' haqıyqatdur.
152 Sha'rtlerin'di ma'n'gige tayınlag'anın'dı, Burınnan men tu'sindim.
153 Shekken azaplarıma qara, qutqar meni, Nızamın'dı umıtpadım.
154 Sen meni jaqlap, meni qutqar, Wa'den' boyınsha janımdı saqla.
155 Qutqarılıw jawızlardan uzaqdur, Senin' qag'ıydaların'dı olar izlemes.
156 Rehimin' ullıdur, Jaratqan İye, Hu'kimlerin' boyınsha janımdı saqla.
157 Meni quwdalaytug'ın dushpanlarım ko'p, Sonda da sha'rtlerin'nen shetke shıqpadım.
158 Opasızlardı ko'rgenimde jerkenemen, Olar ko'rsetpelerin'e a'mel qılmaydı.
159 Qara, pa'rmanların'dı qanshelli su'yemen, Su'yispenshiligin' menen janımdı saqla.
160 So'zin'nin' negizi haqıyqatdur, A'dil hu'kimlerin'nin' ha'mmesi ma'n'gi dawam etedi.
161 Hu'kimdarlar meni ayıpsız quwdalaydı, Al ju'regim so'zin'nen qorqadı.
162 Ko'p olja tapqan adamday, Senin' so'zlerin'e sonday quwanaman.
163 Jalg'annan tiksinip, jerkenemen, Biraq Senin' nızamın'dı su'yemen.
164 A'dil hu'kimlerin' ushın, Ku'nine jeti ma'rte Sag'an alg'ıslar aytaman.
165 Nızamın'dı su'ygenler ullı abadanshılıqqa jetiser, Olar hesh na'rsege su'rnikpes.
166 Jaratqan İye, qutqarıwın'nan u'mit qılaman, Buyrıqların'dı orınlayman.
167 Jaratqan İye, qutqarıwın'nan u'mit qılaman, Buyrıqların'dı orınlayman+.
168 Pa'rman ha'm sha'rtlerin'e a'mel qılaman, Barlıq jollarımnan xabarın' bar.
169 Pa'riyadım Sag'an jetsin, Jaratqan İye, So'zin' boyınsha danalıq ber mag'an.
170 Jalbarınıwım Sag'an jetip barsın, Wa'den' boyınsha qutqar meni!
171 Awzım alg'ıs-maqtawg'a tolıp tassın, Mag'an qag'ıydaların'dı u'yretesen'.
172 Tilim so'zin'di jırlasın, Barlıq buyrıqların' a'dil.
173 Qolın' mag'an ja'rdem bersin, Pa'rmanların'a boysınıwdı tan'ladım.
174 Qutqarıwın'dı an'sayman, Jaratqan İye, Nızamın'nan la'zzet alaman.
175 Janımdı saqla, Sag'an alg'ıslar aytayın, Hu'kimlerin' mag'an ja'rdem bersin.
176 Joytılg'an qoyday joldan adastım, Qulın'dı izlep tawıp al, Sebebi buyrıqların'dı umıtpadım.
