Zabur 131 bob
1 Jaratqan İye, esle Dawıttı, Onın' ko'rgen barlıq qıyınshılıqların.
2 Ol Sag'an ant ishken edi, Yaqıptın' Ku'shli Qudayı, Ol Sag'an wa'de bergen edi:
3 «Men kirmeymen u'yime, Jatpayman to'segime+
4 Ko'zlerime uyqı bermeymen, Qabaqlarımnın' jumılıwına jol qoymayman,
5 Jaratqan İyege bir orın, Yaqıptın' Ku'shli Qudayına bir ma'kan salmag'ansha!»
6 Kelisim sandıg'ının' Efratada ekenin esittik, Bizler onı Yaar dalalarınan taptıq.
7 «Jaratqan İyenin' ma'kanına barayıq, Onın' ayaq qoyg'ıshının' aldında sıyınayıq», – dedik.
8 Ko'teril, Jaratqan İye, O'z ma'kanın'a, Qu'diretin'nin' belgisi bolg'an sandıg'ın' menen birge.
9 Ruwxaniylerin' a'dillikke bu'rkenip alsın, Sadıq qulların' shadlanıp baqırıssın.
10 Qulın' Dawıt ushın, Maylag'an patshan'nan ju'z burma.
11 Jaratqan İye, Sen Dawıtqa ant ishken edin', Sen usı antın'nan hasla qaytpaysan': «Urpag'ın'nan, ulların'nan birin, Senin' taxtın'a otırg'ızaman+.
12 Eger ulların' kelisimime a'mel qılsa, Olarg'a u'yretken qag'ıydalarımdı orınlasa, Olardın' balaları da ma'n'gige, Senin' taxtın'a otıradı».
13 Jaratqan İye Siondı tan'ladı, Onda O'zi jasawdı qa'ledi.
14 Ol bılay dedi: «Menin' ma'n'gi ma'kanım usı, Usı jerge ornalasaman, bunı O'zim qa'ledim.
15 Ol jerdin' azıq-awqatın bereketleymen, Ondag'ı jarlılardı toydıraman.
16 Qutqarılıwg'a bo'leymen ruwxaniylerdi, Mag'an sadıqlar shadlanıp baqıradı.
17 Ol jerde Dawıt urpag'ınan bir ku'shli patsha shıg'araman, O'zim maylag'an patshanın' shırag'ın so'ndirmeymen.
18 Dushpanların shermendelikke bu'rkeymen, Al onın' basındag'ı taj jarqırap tura beredi».
