1 Haliluya! Jaratqan İyenin' atına alg'ıs-maqtawlar aytın'! Jaratqan İyenin' qulları, alg'ıs-maqtawlar aytın',
2 Ha'y, sizler, Jaratqan İyenin' U'yinde, Qudayımızdın' U'yinin' ha'wlisinde xızmet qılatug'ınlar!
3 Jaratqan İyege alg'ıs-maqtawlar aytın', Jaratqan İye – iygilikli. Onın' atına arnap, saz shertip, alg'ıs aytın', Onın' atı su'ykimli.
4 Jaratqan İye O'ziniki etip Yaqıp urpag'ın, O'z g'a'ziynesi etip İzraildı tan'ladı.
5 Bilemen, Jaratqan İye ullıdur, İyemiz barlıq qudaylardan ma'rtebelidur.
6 Ko'klerde, jer ju'zinde, Ten'izlerde, pu'tkil tu'psizliklerde, Jaratqan İye neni qa'lese, sonı isleydi.
7 Jer ju'zinin' shetinen bultlardı ko'terer, Jawın ushın shaqmaq shaqtırar, Teleklerinen samal estirer.
8 Mısırda birinshi tuwılg'anlardı, Adamlardan baslap haywanlarg'a deyin o'ltirdi.
9 Faraon ha'm onın' xızmetkerlerine qarsı, Mısırdın' ortasında belgiler ha'm ka'ramatlar ko'rsetti.
10 Ol ko'p milletlerdi qırıp tasladı, Qu'diretli patshalardı o'ltirdi:
11 Amor patshası Sixondı, Bashan patshası Ogtı, Pu'tkil Qanan patshalıqların.
12 Olardın' jerlerin mu'lik etip, Awa, mu'lik etip xalqı İzrailg'a berdi.
13 Jaratqan İye, Senin' atın' ma'n'gi turadı, A'wladtan-a'wladqa Seni shaqıradı.
14 Jaratqan İye xalqın qorg'ap, Qullarına rehim qıladı.
15 Xalıqlardın' butları gu'mis ha'm altındur, İnsan qolının' do'retpesidur.
16 Awızları bar, so'yley almas, Ko'zleri bar, ko're almas,
17 Qulaqları bar, esite almas, Ha'tteki, dem ala almas.
18 Olardı soqqan, olarg'a isengenlerdin' ha'mmesi, Olarg'a uqsap qalar!
19 Ha'y, İzrail xalqı, Jaratqan İyege alg'ıslar aytın'! Ha'y, Xaron urpag'ı, Jaratqan İyege alg'ıslar aytın'!
20 Ha'y, Lebiy urpag'ı, Jaratqan İyege alg'ıslar aytın'! Ha'y, Jaratqan İyeden qorqatug'ınlar, Og'an alg'ıslar aytın'!
21 Erusalimde ornalasqan Jaratqan İyege, Sionda alg'ıslar bolsın! Haliluya!
