Zabur 138 bob
1 O, Jaratqan İye, meni tekserdin' ha'm meni bilesen',
2 Qashan otırıp, qashan turatug'ınımdı bilesen', Niyetimdi uzaqtan tu'sinip turasan'.
3 Ju'rsem de, jatsam da, meni tekseresen', Xabarın' bar barlıq jollarımnan.
4 Awzımnan ele bir so'z de shıqpay turıp, Ne aytajag'ımdı Sen tolıq bilesen', Jaratqan İye.
5 Meni aldı-artımnan orap alg'ansan', Qolın'dı u'stime qoyg'ansan'.
6 Usı danalıg'ın' men ushın ju'da' a'jayıpdur, Dım ba'lent, onı tu'sinip jete almayman.
7 Senin' Ruwxın'nan qayaqqa qasha alaman? Senin' da'rgayın'nan qayaqqa kete alaman?
8 Ko'klerge shıqsam, Sen sol jerde barsan', O'liler ma'kanına tu'ssem, Sen ol jerde de barsan'.
9 Tan'nın' qanatlarına minip ushsam, Ten'izdin' arg'ı jag'asına qonsam,
10 Ol jerde de qolın' meni jeteler, On' qolın' meni uslap turar.
11 Eger: «Qaran'g'ılıq meni qaplasın, A'tirapımdag'ı jaqtılıq tu'nge aylansın», – desem,
12 Qaran'g'ılıq Sen ushın qaran'g'ı emes, Tu'n ku'ndizdey jaqtı, Qaran'g'ılıq ta, jaqtı da, Sen ushın birdey.
13 Sen menin' jan-ta'nimdi jarattın', Anamnın' qursag'ında meni do'rettin'.
14 Sag'an alg'ıs aytaman, Men tan' qalarlıq ha'm a'jayıp etip jaratılg'anman. Senin' islerin' a'jayıp, Bunı ju'da' jaqsı bilemen.
15 Jasırın jerde jaratılg'anımda, Jerdin' tu'binde do'retilgenimde, Su'yeklerim Sennen jasırın emes edi.
16 Jatırg'a tu'sken waqtımnan-aq meni Senin' ko'zlerin' ko'rdi, Mag'an ajıratılg'an ku'nlerdin' ele hesh biri kelmesten burın, Ha'mmesi Senin' kitabın'a jazılg'an edi.
17 Men haqqında niyetlerin' qanshelli sırlı, Quday, Olardın' esap-sanı ju'da' ko'p!
18 Eger sanasam, olar qumnan da ko'p, Oyang'anımda, men ele Senin' menen birgemen.
19 Qa'ne endi, jawızlardı o'ltirsen', Quday! Qanxorlar mennen uzaqlasın'!
20 Olar Sen arqalı ant iship, sum joba du'zedi, Dushpanların' Senin' atın' menen jalg'an ant ishedi.
21 Jaratqan İye, Seni jek ko'rgenlerdi qalay jaman ko'rmeyin? Sag'an qarsı shıqqanlardan qalay jerkenbeyin?
22 Men olardı pu'tkilley jek ko'remen, Olardı o'zimnin' dushpanım dep esaplayman.
23 Quday, meni tekserip, ju'regimdi bil, Meni sınap ko'r ha'm pikirlerimdi bil.
24 Qara, qa'wipli jolda ju'rgen joqpan ba? Meni O'zin' ma'n'gilik jolına jetele!
