1 Atqarıwshılardın' jetekshisine. Dawıttın' jırı
2 Jaratqan İye, meni jawızlardan qutqar, Zalımlardan qorg'a.
3 Olar ju'reklerinde jawız joba du'zedi, Ba'rqulla urıs-ja'njel qozg'aydı.
4 O'tkir tilleri jılanday shag'adı, Tillerinde jılan za'ha'ri bar.
5 Jaratqan İye, meni jamannın' qolınan saqla, Zalımnan qorg'a. Olar ayag'ımnan shalıp, meni qulatpaqshı.
6 Menmenler men ushın duzaq qurdı, Jawızlar jolıma tor tasladı, Olar mag'an qaqpan qoydı.
7 Jaratqan İye, Sag'an bılay dep aytaman: «Qudayım – Sensen', Jalbarınıwıma qulaq sal, Jaratqan İye.
8 Quday İye, qu'diretli qutqarıwshım, Sawash ku'ni Sen basımdı aman saqladın'.
9 Jawızlardın' tileklerin orınlama, Jaratqan İye, Du'zgen jobaların tabıslı qılma, Bolmasa, olar ko'kireklerin ko'terip ketedi».
10 Meni qorshap alg'anlardın' awızlarınan shıqqan zulımlıqlar, O'zlerinin' basına tu'ssin.
11 Ko'mir shog'ı jawsın u'stilerine! Olar otqa, tu'psiz shuqırlarg'a ılaqtırılsın, Hasla qaytıp shıqpasın.
12 Jalaxorlarg'a jer ju'zinde hasla orın qalmasın, Apat zalımnın' izine tu'sip, joq qılsın.
13 Bilemen, Jaratqan İye, Sen ezilgennin' huqıqın qorg'aysan', Jarlılarg'a a'dalatlıq qılasan'.
14 Awa, pa'k adamlar atın'a alg'ıs aytadı, Haqlar Senin' da'rgayın'da jasaydı.
