Zabur 143 bob
1 Qollarımdı urısqa, Barmaqlarımdı sawashqa u'yretken, Qorg'awshı jartasım bolg'an Jaratqan İyege alg'ıslar bolsın!
2 Ol meni su'yedi, Ol menin' qorg'anım, Bekinisim ha'm qutqarıwshım, Ol menin' qalqanım ha'm panam, Xalıqlardı Ol mag'an boysındıradı.
3 Jaratqan İye, Sen g'amxorlıq qılg'anday, insan kim bolıptı? Sen na'zerin'di salg'anday, adam balası kim bolıptı?
4 nsan bir dem sıyaqlı, Adamzattın' o'miri o'tkinshi bir ko'len'ke yan'lı.
5 Jaratqan İye, ko'klerdi ashıp, to'menge tu's, Tawlarg'a qol tiygiz, olardan tu'tin shıqsın.
6 Shaqmaq shaqtırıp, jawlardı shashıp tasla, Oqların'dı atıp, olardı albırat.
7 Joqarıdan qolın'dı sozıp, qutqar meni, Teren' suwlardan shıg'arıp al meni, Jat jurtlılardın' qolınan azat et.
8 Olardın' awzı jalg'ang'a tolı, On' qolların ko'terip, o'tirik ant ishedi.
9 Quday, Sag'an jan'a qosıq aytaman, On tarlı arfa shertip, Seni alg'ıslayman.
10 Patshalarg'a Sen jen'is sıylaysan', Qulın' Dawıttı qılıshtan qutqarasan'.
11 Jat jerlilerdin' qolınan, Meni qutqarıp, azat qıl. Olardın' awzı jalg'ang'a tolı, On' qolların ko'terip, o'tirik ant ishedi.
12 Ullarımız jaslıg'ında jaqsı o'sken o'simlikke uqsasın, Qızlarımız saraydın' nag'ıslı su'tinleri sıyaqlı bolsın.
13 Teleklerimiz tu'rli azıq-awqatlarg'a tolıp tassın. Qoylarımız mın'lap, on mın'lap ko'beyip, Jaylawlarımızdı toltırsın,
14 O'gizlerimiz semiz bolsın. Qorg'anlarımız hesh qashan tesilmesin, Adamlarımız su'rgin qılınbasın, Ko'shelerimizde zar jılag'an dawıs shıqpasın!
15 Usınday tilekleri a'melge asqan xalıq qanday baxıtlı! Qudayı Jaratqan İye bolg'an xalıq qanday baxıtlı!
