Zabur 144 bob
1 Qudayım, Patsha, Seni ullılayman, Atın'dı ma'n'gi-baqıy alg'ıslayman.
2 Seni ha'r ku'ni alg'ıslayman, Atın'dı ma'n'gi-baqıy dan'qqa bo'leymen.
3 Jaratqan İye ullı, Ol maqtawg'a ju'da' ılayıqlı, Onın' ullılıg'ına aqıl jetpes.
4 İslerin'di bir a'wlad ekinshi a'wladqa maqtap jetkizedi, Qu'diretli islerin'di aytıp beredi.
5 Senin' saltanatlı ullılıg'ın', A'jayıp islerin' haqqında oy juwırtaman.
6 Adamlar tan' qalarlıq islerin'nin' qu'direti haqqında aytadı, Men ja'riyalayman ullı islerin'di!
7 Adamlar ullı iygiligin' haqqında bayan etedi, A'dalatlıg'ın'dı ja'riyalap, shadlanıp baqıradı.
8 Jaratqan İye miyrimli ha'm rehimli, Sabır-taqatlı ha'm su'yispenshiligi mol.
9 Jaratqan İye ha'mmege iygilikli, Jaratqanlarının' ha'mmesine rehimli.
10 Barlıq jaratqanların' Seni alg'ıslaydı, Jaratqan İye, Sadıq qulların' Sag'an alg'ıs-maqtawlar aytadı.
11 Olar patshalıg'ın'nın' ullılıg'ı haqqında so'ylep, Ku'sh-qu'diretin' tuwrısında aytıp beredi.
12 Solay etip, ha'mme Senin' ku'sh-qu'diretin'di, Patshalıg'ın'nın' ullı dan'qın biledi.
13 Senin' patshalıg'ın' – ma'n'gi patshalıq bolar, Hu'kimdarlıg'ın' a'wladtan-a'wladqa dawam eter.
14 Jaratqan İye jıg'ılg'anlarg'a su'yenish boladı, Eki bu'gilgenlerdin' qa'ddin tuwrılaydı.
15 Ha'mme u'mit etip, Sag'an qaraydı, O'z waqtında olardın' ırısqısın beresen'.
16 Sen qolın'dı ashıp, Pu'tkil janzatlardı qa'legeninshe toydırasan'.
17 Jaratqan İye barlıq jollarında a'dil, İslegen barlıq islerinde su'yispenshiligin ko'rsetedi.
18 Jaratqan İye O'zin shaqırg'anlarg'a, Shın kewilden shaqırg'anlarg'a jaqın boladı.
19 O'zinen qorqqanlardın' tilegin beredi, Nalasın esitip, olardı qutqaradı.
20 Jaratqan İye O'zin su'ygenlerdin' ha'r birin qorg'aydı, Jawızlardın' ha'mmesin joq etedi.
21 Awzım Jaratqan İyege alg'ıslar aytsın! Pu'tkil janzatlar Onın' muxaddes atına, Ma'n'gi-baqıy alg'ıs-maqtawlar aytsın.
