Zabur 16 bob
1 Jaratqan İye, a'dillik ushın duwa etemen, esit meni, Pa'riyadımdı tın'la, Hiylesiz awzımnan shıqqan duwama qulaq sal!
2 O'zin' hu'kim etip, haqlıg'ımdı ko'rset, Ko'zlerin' a'dillikti ko'rsin.
3 Ju'regimdi izertlep, tu'nde sınadın', Meni tolıq teksersen' de, hesh na'rse tappadın'.Awzım gu'na qılmasın, dep qarar qıldım+.
4 Basqa adamlardın' qılmısların qılmadım, Senin' awzın'nan shıqqan so'zge a'mel qılıp, Zorlıq qılıw jolınan awlaq ju'rdim.
5 Qa'demlerim menen Senin' jolın'dı tuttım, Hesh qashan tayıp ketpedi ayaqlarım.
6 Sag'an jalbarınaman, Quday, Sebebi mag'an juwap beresen'. Qulaq sal, tın'la so'zlerimdi!
7 Ko'rset O'z su'yispenshiligin'di, Dushpanlarınan pana izlep, Sag'an kelgenlerdi on' qolın' menen azat et!
8 Ko'zin'nin' qarashıg'ınday etip qorg'a meni, Qanatların'nın' sayasına jasır,
9 Jawızlardın' hu'jiminen, Saqla meni janıma qas bolıp, qorshap alg'anlardan.
10 Olardın' ju'reklerin may basqan, Menmen so'zler shıg'ar awzınan.
11 Olar izime tu'sken, qorshap alg'an, Jerge urıw ushın mag'an ko'zlerin tikken.
12 Olar meni tilkimlemekshi bolg'an arıslan kibi, Buqqıda jatırg'an jırtqısh arıslan sıyaqlı.
13 Kel, Jaratqan İye, olarg'a qarsı tur, Olardı dizerletip, ta'jim qıldır, Qılıshın' menen napa'klerden meni qutqar.
14 O'z qolın' menen aman saqla, Jaratqan İye, Nesiybesi bul du'nyadan bolg'an adamlardan.Qarınları Sen tayarlap qoyg'an jazag'a toysın, Balaları da jep toysın, Awısıp qalg'anı olardın' balalarına da qalsın!
15 Al men, a'dillikte Senin' ju'zin'di ko'reyin, Oyanıp, diydarın'a toyayın.
