1 Atqarıwshılardın' jetekshisine. Dawıttın' jırı
2 Jaratqan İye, qu'diretin'e patsha quwanar, Bergen jen'isin'e sonday shadlanar!
3 Ju'regindegi arzıw-a'rmanın berdin', Awzınan shıqqan tileginen bas tartpadın'.
4 Onı ullı jarılqawlar menen qarsı aldın', Basına sap altınnan taj kiydirdin'.
5 Sennen o'mir sorag'anda, o'mir berdin', Uzaq, ma'n'gi-baqıy o'mir sıyladın'.
6 Jen'is berip, onı ullı dan'qqa bo'ledin', Onı saltanat ha'm ullılıqqa bo'ledin'.
7 Onın' u'stine ma'n'gi bereket jawdırdın', Qasında bolıp, shadlıqqa toltırdın'.
8 Patsha Jaratqan İyege u'mit baylaydı, Quday Taalanın' su'yispenshiligi arqalı su'rnikpeydi.
9 Qolın' barlıq dushpanların'dı, On' qolın' Seni jek ko'retug'ınlardı tabadı.
10 Jaratqan İye, Sen kelgen waqtın'da, Qızg'an tandırg'a aylandırasan' olardı. O'z g'a'zebin' menen olardı jutıp, Jalın menen jandırasan'.
11 Joq etesen' urpaqların jer ju'zinen, Zu'ryadın adamlar arasınan.
12 Dushpanların' jamanlıq jobasın du'zip, Sag'an qarsı jawızlıq oylasa da, Olar hesh na'rsege erise almaydı.
13 Oq jayın'dı kerip, ju'zine go'zlep, Artına qashıwg'a ma'jbu'rleysen'.
14 Ullılıg'ın' menen ko'teril, Jaratqan İye! Qu'diretin'di saz shertip, jırlayıq.
