Dawıttın' jırı
Zabur 26 bob
1 Jaratqan İye menin' nurım ha'm qutqarıwshım, Men kimnen qorqaman? Jaratqan İye o'mirimnin' qorg'anı, Meni kim qorqıta aladı?
2 Denemdi tilkimlew ushın jawızlar u'stime bastırıp kelgende, Jawlarım ha'm dushpanlarım mag'an qarsı shabıwıl jasag'anda, O'zleri su'rnigip, qulaydı.
3 Bir orda la'shker meni qamal qılsa da, Ju'regim qorqpas, Mag'an qarsı urıs baslansa da, U'mitim u'zilmes.
4 Jaratqan İyeden tilegim, qa'leytug'ınım mınaw: Jaratqan İyenin' u'yinde o'mir boyı jasaw, Onın' go'zzallıg'ın ko'riw, İbadatxanasında sıyınıp, oy juwırtıw.
5 Apatta qalg'an ku'nlerimde, Ol meni O'z panasında aman saqlaydı. Shatırının' ishine jasırıp meni, Ba'lent jartas u'stine alıp shıg'adı.
6 Sonda a'tirapımdag'ı dushpanlarım u'stinen, Basım joqarı ko'teriledi. Jaratqan İyenin' shatırında qurbanlıq beremen, Shadlanıp, alg'ıslaw qurbanlıg'ın beremen, Saz shertip, Onı jırlayman.
7 Jaratqan İye, qulaq sal dawısıma, Sag'an jalbarınaman, Rehim etip, juwap ber mag'an!
8 «Menin' ju'zimdi izle!» degenin'di kewlim esitti, Awa, Jaratqan İye, Senin' ju'zin'di izleymen.
9 Ju'zin'di mennen jasırma, G'a'zeplenip, qulın'nan ju'z burma! Ja'rdemshim Sen boldın', Ju'z burıp, meni ta'rk etpe, Quday, qutqarıwshım menin'!
10 Ata-anam meni taslap ketse de, Jaratqan İye meni qabıl etedi.
11 Jaratqan İye, jolın'dı u'yret mag'an, Buqqıda jatqan dushpanlarıma bola, Tuwrı soqpaqların'nan jetele meni.
12 Jawlarımnın' qolına tapsırma meni, Jalg'an gu'walar, nahaq ayıplawshılar, Mag'an qarsı shıqtı.
13 Biraq mınag'an anıq isenemen: Men tiriler a'leminde ju'rip, Jaratqan İyenin' iygiligin ko'remen.
14 Jaratqan İyege u'mit qıl, Ku'shli ha'm ma'rt bol, Jaratqan İyege u'mit qıl.
