1 Atqarıwshılardın' jetekshisine. Dawıttın' jırı
2 Jaratqan İye, Seni panalayman, Meni hasla shermende qılma! Sen a'dalatlısan', qutqar meni!
3 Mag'an qulaq sal, da'rhal qutqar meni, Panalaytug'ın jartasım bol, Qutqarılıwım ushın, bekkem qorg'an bol!
4 Shınında da, Sen jartasım ha'm qorg'anımsan', O'z atın' ushın meni jetele, jol ko'rset mag'an.
5 Mag'an qarsı qoyılg'an tordan uzaqlat meni, O'zin'sen' menin' panam.
6 Janımdı qolların'a tapsıraman, Jaratqan İye, sadıq Quday, qutqar meni.
7 Jaramsız butlarg'a tabınıwshılardan jerkenemen, Jaratqan İyege u'mit baylayman.
8 Sadıqlıg'ın' arqalı yoshıp, shad bolayın, Qayg'ılarımdı O'zin' ko'rdin', Shekken azaplarımdı bilesen'.
9 Meni dushpannın' qolına tapsırmadın', Al ayaqlarımdı ken' jerge bastırdın'.
10 Rehim qıl mag'an, Jaratqan İye, qıyınshılıqtaman, Qayg'ıdan ko'zlerimnin' nurı so'ndi, Jan-ta'nim de tamam boldı.
11 O'mirim azap penen, Jıllarım ah urıw menen tawısılar, Gu'nalarım sebepli ku'shim qaytıp, Su'yeklerim quwrap qalar.
12 Dushpanlarım sebepli jek ko'rinshi boldım, A'sirese o'z qon'sılarıma. Doslarım da awhalımdı ko'rip qorqadı, Ko'shede ko'rgenler mennen qashatug'ın boldı.
13 Marhum sıyaqlı umıt boldım men, Sınıp qalg'an ıdısqa uqsayman.
14 Ko'plerdin' o'sek qılıp atırg'anın esitemen, A'tirapımdı qorqınısh orap alg'an. Mag'an qarsı til biriktirgen, Janımdı alıw ushın joba du'zgen.
15 Jaratqan İye, men Sag'an u'mit baylayman, «Qudayım Sensen'!» dep aytaman.
16 Ta'g'dirim Senin' qolın'da, Meni dushpanlarımnın' qolınan, Qutqara go'r izime tu'skenlerden.
17 Senin' ju'zin' qulın'a nurın shashsın, Su'yispenshiligin'di ko'rsetip, qutqar meni!
18 Shermende qılma meni, Jaratqan İye, Ja'rdem sorap, Sag'an jalbarınaman. Jawızlar shermende bolsın, O'liler ma'kanında u'nleri o'shsin.
19 Menmenlik penen, joqarıdan qarap, Haq adamnan jerkenip, onı kemsitip so'ylegennin', O'shsin jalg'an sesleri.
20 İygiligin' sonshelli moldur, Jaratqan İye, Onı O'zin'nen qorqqanlar ushın saqlaysan', Ha'mmenin' ko'z aldında, Sennen pana tapqanlarg'a jaqsı qatnas qılasan'.
21 Adamlardın' jawız jobasınan, Da'rgayın'da pana bolıp, olardı qorg'aysan', Jaman tillerden, O'z panan'da saqlaysan'.
22 Jaratqan İyege alg'ıslar bolsın, Qamaldag'ı qalada qalg'anımda, A'jayıp miyrim-sha'pa'a'tin'di ko'rsettin' mag'an.
23 Qorqınıshqa tu'sip, bılay dedim: «Senin' da'rgayın'nan shıg'arıldım!» Biraq ja'rdemge shaqırg'anımda Seni, Esittin' menin' jalbarınıwımdı.
24 Jaratqan İyeni su'yin', ha'y Onın' sadıq qulları! Jaratqan İye O'zine sadıq bolg'anlardı qorg'aydı, Menmenlerge tolıq jaza beredi.
25 Ha'y, Jaratqan İyege u'mit baylag'anlar, Ku'shli bolın' ha'm ma'rt bolsın ju'regin'iz!
