1 Ha'y, haq adamlar, Jaratqan İye arqalı shadlanıp baqırın'! A'dil adamlarg'a jarasar Og'an alg'ıs-maqtaw aytıw.
2 Lira shertip, Jaratqan İyeni ta'riyiplen', On tarlı arfada Og'an arnap nama shalın'.
3 Og'an arnap taza qosıq aytın', Ba'lent dawıs penen shadlanıp, saz shertin'.
4 Jaratqan İyenin' so'zi haqıyqatdur, Onın' ha'r bir isi isenimlidur.
5 Jaratqan İye haqlıqtı ha'm a'dalatlıqtı su'yer, Jer ju'zi Onın' su'yispenshiligine tolar.
6 Ko'kler Jaratqan İyenin' buyrıg'ı menen, Aspan deneleri awzınan shıqqan so'zi menen jaratılg'an.
7 Ol ten'iz suwların bir jerge jıynar, Tu'psiz suwlardı suw saqlag'ıshlarg'a sıydırar.
8 Pu'tkil du'nya ju'zi Jaratqan İyeden qorqsın, Jer ju'zinde jasap atırg'annın' barlıg'ı Onnan seskensin.
9 Ol so'yledi, aytqanı bar boldı, Buyrıq berdi, ha'mmesi payda boldı.
10 Jaratqan İye milletlerdin' jobaların buzar, Xalıqlardın' niyetlerin bosqa shıg'arar.
11 Biraq Jaratqan İyenin' jobaları ma'n'gi turar, Ju'regindegi niyetleri a'wladtan-a'wladqa dawam eter.
12 Qanday baxıtlı, Qudayı Jaratqan İye bolg'an millet, Qanday baxıtlı, Jaratqan İye tan'lap alg'an xalıq+.
13 Jaratqan İye ko'kten ko'z taslar, Pu'tkil adamzattı ko'rer.
14 Ol taxtta otırg'an jerinen, Gu'zeter jer ju'zinde jasaytug'ınlardın' ha'mmesin.
15 Ol ha'mmenin' ju'regin jaratqan, Olardın' islerinin' ha'mmesin biler.
16 A'skeri ko'p bolg'anı menen, patsha qutqarılmas, Ullı ku'shi menen jawınger jen'e bermes.
17 Jen'is ushın sawash atları bos u'mitdur, Olar qu'diretli ku'shi menen qutqara almas.
18 Jaratqan İyenin' ko'zi O'zinen qorqatug'ınlarda, Onın' su'yispenshiliginen u'mit etetug'ınlarda.
19 Olardın' janın o'limnen qutqarar, Ashlıq da'wirde olardı tiri qaldırar.
20 Janımız Jaratqan İyeden u'mit eter, Ol ja'rdemshimiz ha'm qalqanımız.
21 Ol arqalı ju'regimiz quwanıshqa tolar, Onın' muxaddes atına u'mit baylaymız.
22 Jaratqan İye, mudamı u'mit baylaymız Sag'an, Su'yispenshiligin' bizlerge yar bolsın!
