1 Abimelextin' aldında o'zin aqılı kemis qılıp ko'rsetip, onın' aldınan quwılg'an waqıtta Dawıttın' aytqan jırı
2 Ha'mme waqıtta Jaratqan İyege alg'ıs aytaman, Alg'ıs-maqtaw tu'speydi awzımnan.
3 Jaratqan İye menen maqtanar janım, Ezilgenler esitip, shad bolsın!
4 Menin' menen birge Jaratqan İyeni ullılan', Atın birgelikte dan'qqa bo'leyik.
5 Jaratqan İyege jalbarındım, Ol juwap berdi mag'an, Meni azat etti barlıq qa'wip-qa'terden.
6 Onnan u'mit qılg'anlardın' ju'zinde nur jarqıraydı, Uyatqa qalıp, ju'zleri qızarmaydı.
7 Men ezilip jalbarındım, Jaratqan İye esitti, Meni barlıq azaplarımnan azat etti.
8 Jaratqan İyeden qorqatug'ınlardın' a'tirapına, Onın' perishteleri orda qurıp, qutqarar olardı.
9 Jaratqan İyenin' jaqsılıg'ın tatın' ha'm ko'rin'. Qanday baxıtlı Onnan pana tapqanlar.
10 Jaratqan İyeden qorqın', ha'y, Onın' muxaddesleri, Onnan qorqqanlardın' bolmas mu'ta'jligi.
11 Ha'tteki, arıslanlar ash ha'm mu'ta'j bolar, Biraq hesh qanday mu'ta'jlik ko'rmes Jaratqan İyege kelgenler.
12 Kelin', ha'y balalar, tın'lan' meni: U'yreteyin sizlerge Jaratqan İyeden qorqıwdı.
13 Kim o'mirden zawıqlanıp, Jaqsı ku'nler keliwin qa'leydi?
14 Onda, tilin'izdi jaman so'zden, Awzın'ızdı o'tirik so'z aytıwdan tıyın'.
15 Jamanlıqtan qashıp, jaqsılıq islen', Tınıshlıqqa umtılıp, sog'an ku'sh salın'.
16 Jaratqan İyenin' ko'zi haq adamlarda, Qulag'ın tu'rer olardın' dadına.
17 Jaratqan İye qarsı jamanlıq qılatug'ınlarg'a, Jer ju'zinen olardın' atların o'shirer.
18 Haq adamlar jalbarınar, Jaratqan İye esiter, Barlıq azaplarınan olardı azat eter.
19 Jaratqan İye kewli qabarg'anlarg'a jaqındur, Ruwxı ezilgenlerdi qutqarar.
20 Haq adamnın' qayg'ıları ko'p bolsa, Jaratqan İye bulardan onı azat qılar,
21 Barlıq su'yeklerin aman saqlar, Sındırılmas onın' bir su'yegi de.
22 Jamanlıq zalımdı o'ltirer, Haq adamnan jerkengen jaza alar.
23 O'z qulların Jaratqan İye qutqarar, Hesh qanday jaza almas Onnan pana tapqanlar.
