Dawıttın' jırı
Zabur 36 bob
1 Jamanlıq qılg'anlarg'a ashıwlanba, Nahaqlıq islewshilerge qızıqpa!
2 Olar maysa sho'ptey tez solıp qalar, Ko'k sho'ptey tez quwrap qalar.
3 Sen Jaratqan İyege u'mit baylap, jaqsılıq qıl, Usı elde jasap, sadıqlıqtı saqla.
4 Jaratqan İyeden zawıqlan, Ol ju'regin'degi qa'lewin'e jetkizer.
5 O'mir jolın'dı Jaratqan İyege tapsır, Og'an isen, sonda Ol sen ushın ha'reket eter.
6 Ol senin' a'dilligin'di nur sıyaqlı jarqıratıp, Haqlıg'ın'dı ku'ndizgi quyashtay qılar.
7 Jaratqan İyenin' aldında sabırlı bol, Og'an u'mit bayla, Ha'wes qılma o'z jolında a'wmetli bolıp, Jawız niyetlerin a'melge asırg'anlarg'a.
8 G'a'zebin'di tıyıp, ashıwın'dı bas, Qızba bolma, bul tek zıyan alıp keler.
9 Jawızlıq etiwshiler joq etiler, Jaratqan İyeden u'mit etiwshiler elge iyelik eter.
10 Tez arada napa'ktin' ku'ni pitedi, Qansha izlesen' de, bul jerde taba almaysan' onı.
11 Kishipeyiller bolsa, elge iyelik qılar, Mol baxıtqa erisip, ra'ha't tabar.
12 Napa'k adam pa'k adamg'a qarsı jaman niyet qılar, Og'an qarsı tislerin g'ıshırlatar.
13 Biraq İye napa'kler u'stinen ku'ler, Olardın' ku'ni pitkenin biler.
14 Biyshara ha'm jarlını qulatıp, Tuwrı jolda ju'rgenlerdi o'ltiriw ushın, Napa'kler qılıshın jalan'ashlap, kerdi sadaqların.
15 Biraq qılıshları o'zlerinin' ju'regine sug'ılar, Sadaqları da sınıp keter.
16 Haq adamnın' az zatı, Napa'ktin' baylıg'ınan go're abzaldur.
17 Napa'ktin' ku'shi qırqılar, Haq adamdı bolsa, Jaratqan İye qollap quwatlar.
18 Minsizlerdin' ha'r ku'ni Jaratqan İyege belgili, Ma'n'gi dawam eter olardın' miyrası.
19 Uyatqa qalmas olar jaman ku'nlerde, Qarınları toq bolar ashlıq waqıtta da.
20 Biraq napa'kler so'zsiz qırılıp qalar, Jaratqan İyenin' dushpanları dala gu'lindey solıp, Tu'tin yan'lı tarqalıp, joq bolar.
21 Napa'kler qarız alar, qaytıp bermes, Haq adam bolsa saqıylıq penen berer.
22 Jaratqan İye jarılqag'an adamlar elge iyelik qılar, Al Ol g'arg'ag'an adamlar joq bolıp keter.
23 Adamnın' ju'rgen jolına, Jaratqan İyenin' kewli tolsa, Onın' qa'demlerin bekkemler.
24 Ol su'rnikse de, jıg'ılmas, Jaratqan İye qolınan uslap qalar.
25 Men jas edim, endi qartaydım, Haq adamnın' taslap ketilgenin, Onın' urpag'ının' nan sorag'anın ko'rmedim.
26 Ol ha'mme waqıtta saqıylıq penen qarız berer, Urpag'ı da jarılqaw alıp keler.
27 Jamanlıqtan qashıp, jaqsılıq qıl, Sonda elin'de ma'n'gi jasarsan'.
28 Jaratqan İye haqlıqtı su'yer, Ol sadıq qulların ta'rk etpes. Olardı ma'n'gi qorg'ar, Napa'klerdin' urpag'ı joq bolar.
29 Haq adamlar eldi mu'lik etip alar, Sol elde ma'n'gi jasap qalar.
30 Haqtın' awzınan danalıq shıg'ar, Onın' tili a'dalattı so'yler.
31 Qudayının' nızamı ju'regindedur, Sonın' ushın, qa'deminde adaspas.
32 Napa'k adam haq adamdı an'lıp ju'rer, Onı o'ltiriwdin' jolın izler.
33 Jaratqan İye haq adamdı napa'klerdin' qolına tapsırmas, Hu'kim etilgende, onı ayıplı qılmas.
34 Jaratqan İyege u'mit bayla, Onın' jolınan ju'r, Ol seni ma'rtebeli qılıp, bul eldi mu'lik qılıp berer. Napa'ktin' qırılıp ketkenin ko'rersen'.
35 Ko'rdim napa'k ha'm jawız adamnın', O'z topırag'ında jasıl terektey o'sip-o'ngenin.
36 Biraq uzaq turmay, ol o'tip ketti, joq boldı, Qansha izlesem de, taba almadım onı.
37 Minsizge itibar ber, haq adamg'a qara, Tınıshlıqtı su'yetug'ınlardın' keleshegi bar.
38 Gu'nakarlardın' ha'mmesi qırılıp keter, Napa'ktin' keleshegi joq bolar.
39 Haqlardın' qutqarılıwı Jaratqan İyeden, Apat ku'ninde olarg'a bolar qorg'an.
40 Jaratqan İyeden pana tapqanı ushın, Jaratqan İye olardı qollap quwatlap, qutqarar, Napa'klerdin' qolınan aman saqlap, azat qılar.
