1 Dawıttın' yadqa salıw jırı
2 Jaratqan İye, g'a'zeplenip, meni a'shkaralama, Qa'ha'rlenip, meni jazalama!
3 İshime qadaldı oqların', U'stime basıldı qolların'.
4 G'a'zebin'nen denemde qalmadı saw jerim, Gu'nam sebepli sırqıraydı su'yeklerim.
5 Ayıplarım basımnan astı, Olar awır ju'k bolıp, jelkemdi bastı.
6 Aqılsızlıg'ım sebepli, Jaralarım sasıp, irin' basıp ketti.
7 İyilip, eki bu'klenip qaldım, Ku'ni boyı g'am shegip ju'remen.
8 Ot bolıp janar menin' belim, Denemde qalmadı saw jerim.
9 Din'kem qurıp, pu'tkilley ezildim, Ju'regimnin' sızlawınan nala shegemen.
10 İyem, ju'regimdegi barlıq qa'lewlerimdi bilesen', Nalalarım jasırın emes Sennen.
11 Ju'regim titireydi, ku'sh-quwatım ketti, Ko'zlerimnin' nurı pu'tkilley so'ndi.
12 Dos-yaranlarım qashtı jaralarım sebepli, Jaqınlarım qasıma kelmey qoydı.
13 Janıma qas adamlar mag'an duzaq qurar, Niyeti jawızlar mag'an o'lim tiler, Ku'ni boyı mag'an qarsı hiyle oylap ju'rer.
14 Al men geren' sıyaqlı esitpeymen, Tilsiz adamday awzımdı ashpayman.
15 Shınında da, men gu'n'ge uqsayman, Tilinde juwabı joq adamdayman.
16 U'mitim Sende, Jaratqan İye, Sen juwap beresen', Quday İyem!
17 Sag'an duwa etip, bılay dedim: «Jag'dayımdı ko'rip, dushpanlarım ku'lmesin, Ayaqlarım su'rnikkende, o'zlerin mennen u'stin qoymasın!»
18 Jıg'ılayın dep turıppan, Ashshı qayg'ımdı ishime jutıp atırman.
19 Jınayatlarımdı moyınlayman, Gu'nalarım sebepli qayg'ıraman.
20 Al dushpanlarım ku'shli ha'm aman ju'ripti, Sebepsiz meni jek ko'retug'ınlar ko'beyip ketti.
21 Olar jaqsılıg'ıma jamanlıq qaytarar, İygilikli islerim ushın mag'an dushpan bolar.
22 Meni taslap ketpe, Jaratqan İye! Qudayım, mennen uzaq bolma!
23 Mag'an ja'rdem beriwge asıq, Qutqarıwshım, İyem!
