1 Atqarıwshılardın' jetekshisi Edutung'a. Dawıttın' jırı
2 Men o'zime bılay dedim: «Atqan adımıma dıqqat qılayın, Tilimdi gu'nadan tıyıp ju'reyin, Aldımda napa'kler tursa da, Awzıma qum quyıp qoyayın».
3 Tilimdi tıyıp, u'nsizlik saqladım, Ha'tte, jaqsı na'rseni aytıwdan bas tarttım. Artıp ketti menin' da'rtim.
4 Ju'regim ottay bolıp, lawlap ketti, Oylag'an sayın, kewlim o'rtendi, Mına so'zler tilimnen to'gildi:
5 «Bildire go'r aqıbetimdi, Jaratqan İye, Bildir qansha ku'nlerim qalg'anın, Bileyin o'mirimnin' qanshelli qısqa ekenin!
6 Qısqa o'mir bergensen' mag'an, Senin' na'zerin'de hesh na'rsedur o'mirim, Bir demdur ha'r bir adamnın' o'miri.
7 Ha'r bir adamnın' o'miri sayaday o'tip keter, Adamzattın' ha'reketi biyhuda bolar, Mal-du'nya jıynar, Biraq onın' kimge qalatug'ının bilmes.
8 Men endi ne ku'tiwim mu'mkin, Jaratqan İye? Barlıq u'mitim Sennen.
9 Azat qıla go'r barlıq jınayatlarımnan, Aqmaqlardın' u'stimnen ku'liwine jol qoyma.
10 U'nsizlik saqlayman, ashpayman awzımdı, Sebebi Sen isledin' bunı.
11 Judırıg'ın'dı uzaqlastır mennen, Sen bergen soqqılardan tamam boldım.
12 Gu'naları ushın adamzattı, Jazalap, jolg'a salasan'. Ku'ye jegendey, a'ziz na'rselerin joq qılasan', So'zsiz, adamzat bir demde o'tip ketedi.
13 Duwamdı esit, Jaratqan İye, Qulaq sal jalbarınıwıma, Ko'z jaslarıma biypa'rwa bolma! Men bir qonaqpan aldın'da Senin', Ata-babalarım sıyaqlı kelgindimen.
14 Qa'ha'rli na'zerin'di uzaqlastır mennen, Bul du'nyadan o'tip ketpesimnen burın shadlanayın!»
