1 Atqarıwshılardın' jetekshisine. Dawıttın' jırı
2 Sabır etip ku'ttim Jaratqan İyeni, Ol mag'an burılıp, jalbarınıwımdı esitti.
3 Meni o'lim shuqırınan, Batpaqlıqtan shıg'arıp aldı. Ayaqlarımdı tastın' u'stine bastırdı, Qa'demlerimdi bekkemledi.
4 Awzıma jan'a bir qosıq, Qudayımızg'a arnalg'an alg'ıs saldı. Ko'pler bunı ko'rip, qorqar, Jaratqan İyege u'mit baylar.
5 Qanday baxıtlı Jaratqan İyege u'mit baylag'an, Menmen ha'm o'tirikshilerge su'yenbeytug'ın.
6 Jaratqan İye, Qudayım, Bizler ushın a'jayıp islerin' ha'm niyetlerin' ko'pdur, Hesh bir zat Sag'an ten' kele almas, Bulardı tilge alıp, so'yley baslasam, Ko'pliginen sanap tawısa almaspan.
7 Sen qurbanlıq ha'm sadaqalardı qa'lemedin', Jandırılatug'ın ha'm gu'na qurbanlıqların talap qılmadın', Biraq boysınıwım ushın qulaqlarımdı ashtın'.
8 Sonda men bılay dedim: «Mine, men keldim, Orama kitapta men haqqında jazılg'an.
9 Senin' erkin'di orınlawdan ra'ha'tlenemen, Qudayım, Ju'regimnin' to'rindedur Senin' nızamın'».
10 Ullı ja'miyetin'de a'dilligin'di ja'riya qıldım, Jaratqan İye, O'zin' bilesen', Tilimdi hesh tıymadım.
11 A'dilligin'di ishime saqlamadım, İsenimli ekenin'di ha'm qutqarg'anın'dı ja'riyaladım, Miyrim-sha'pa'a'tin'di, sadıqlıg'ın'dı, Ullı ja'miyettin' aldında sır tutpadım.
12 Jaratqan İye, rehimin'di ayama mennen, Su'yispenshiligin' ha'm sadıqlıg'ın' meni ma'n'gi qorg'asın.
13 Sansız apatlar orap aldı a'tirapımdı, Gu'nalarım basıma jetti, ko'zim ko'rmeydi, Bular shashımnan ko'pdur, Endi ju'reksiz bolıp qaldım.
14 Jaratqan İye, mag'an miyrimin' tu'ssin, qutqar meni! Ja'rdemge asıq, Jaratqan İye!
15 Janımdı alıwdı qa'legenler, Shermende bolıp, uyatqa qalsın! Mag'an jawızlıq islewdi qa'lewshiler, Masqara bolıp, keynine qaytsın!
16 «Hay-hay!» dep masqara qılıwshılar, Shermende bolıp, sasqalaqlap qalsın.
17 Seni izlegenlerdin' ha'mmesi, Sen arqalı shadlıq ha'm quwanıshqa tolsın. Senin' qutqarıwın'dı su'ygenler: «Jaratqan İye ullıdur!» dep ba'rqulla aytıp ju'rsin.
18 Men bir biyshara ha'm jarlı adamman, Biraq g'amxorlıq qılar mag'an İyem. Ja'rdemshim ha'm qutqarıwshım O'zin'sen', Keshikpe, Qudayım!
