1 Atqarıwshılardın' jetekshisine. Qorax a'wladının' ayrıqsha jırı
2 Suwın ag'ın suwdı qalay an'sasa, Quday, menin' janım da Seni solay an'saydı!
3 Janım Qudayg'a, tiri Qudayg'a sho'lleydi, Qashan baraman Qudaydın' ju'zin ko'riwge?
4 Ha'r ku'ni: «Qudayın' qay jerde?» degeni ushın, Ko'z jaslarım azıg'ım boldı ku'ni-tu'ni.
5 Ju'rer edim alaman arasında, Barar edim Qudaydın' u'yine. Bayramdı belgiler edik ko'pshilik penen, Quwanısh ha'm alg'ıs jan'g'ırıg'ı menen. Usılar tu'sse yadıma, sırqıraydı ju'regim.
6 Ne ushın tu'skinlikke tu'sesen', ha'y janım? Ne ushın tınıshsızlanasan'? Qudayg'a u'mit bayla, Men Og'an ja'ne alg'ıs aytaman, Qutqarıwshım ha'm Qudayıma.
7 Tu'skinlikke tu'sip ketkenmen, Sonın' ushın, Qudayım, Seni İordan boyında, Xermon ha'm Misar tawlarında esleymen.
8 Gu'rkiregen ten'izlerdey, Gu'wildegen bulaqlarday, Senin' jibergen qu'diretli tolqınların', Basıp o'tti u'stimnen menin'.
9 Ku'ndiz Jaratqan İye ko'rseter su'yispenshiligin, Tu'nde Og'an arnap qosıq aytaman. O'mirim bolg'an Qudayg'a duwa etemen.
10 Qorg'awshı jartasım bolg'an Qudayg'a bılay deymen: «Ne ushın meni umıttın'? Dushpanlarımnın' zulımınan, Ne ushın qayg'ı-g'am shegip ju'riwim kerek?»
11 Ku'ni boyı dushpanlarım: «Qay jerde Qudayın'?» dep, Meni kemsitkende, sırqıraydı su'yeklerim.
12 Ne ushın tu'skinlikke tu'sesen', ha'y janım? Ne ushın tınıshsızlanasan'? Qudayg'a u'mit bayla, Men Og'an ja'ne alg'ıs aytaman, Qutqarıwshım ha'm Qudayıma.
