1 Atqarıwshılardın' jetekshisine. Qorax a'wladının' ayrıqsha jırı
2 Quday, qulaqlarımız benen esittik, A'yyemgi zamanda, atababalarımızdın' da'wirinde, Aytıp berdi olar islegen islerin' haqqında.
3 O'z qolın' menen quwıp shıg'ıp basqa milletlerdi, Ata-babalarımızg'a jer berdin', Sol xalıqlardı qırıp tasladın.
4 Shınında, olar jerdi qılısh penen almadı, O'z qolları menen jen'iske erispedi, Al Senin' on' qolın', qu'diretin', Ju'zin'nin' nurı menen jen'iske eristi. Olardan Senin' kewlin' tolg'an edi.
5 Quday, Sen patshamsan', Buyır, Yaqıptın' urpag'ı jen'sin!
6 Senin' sayan'da dushpanımızdı su'zip shıg'aramız, Bizge qarsı bolg'anlardı atın' menen basqılap taslaymız.
7 Men o'z sadag'ıma isenbespen, Qılıshım da jen'is alıp kelmes mag'an.
8 Dushpanlarımızdan qutqarg'an Sensen', Bizlerdi jek ko'retug'ınlardı shermende qıldın'.
9 Ku'ni boyı Qudayımız benen maqtanamız, Ma'n'gi alg'ıslaymız Senin' atın'dı.
10 Biraq Sen bizlerdi taslap ketip, shermende qıldın', A'skerlerimiz benen sawashqa shıqpay qoydın'.
11 Dushpanlarımızdın' aldında shegindirdin', Jek ko'retug'ınlar bizlerdi arqayın tonap ketti.
12 Bizlerdi soyılatug'ın qoyday qıldın', Milletler arasına dag'ıtıp jiberdin'.
13 Xalqın'dı arzan bahag'a sattın', Olardın' bahasın joqarılatpadın'.
14 Qon'sı xalıqlarg'a bizlerdi shermende qıldın', Do'geregimizdegilerge masqara ha'm ku'lki qıldın'.
15 Milletlerge a'psana ettin', Xalıqlar bizge basın shayqar.
16 Ku'ni boyı masqarashılıq menin' aldımda, Shermendelik ju'zimdi qaplag'an.
17 Esitetug'ınımız masqara so'z, ko'retug'ınımız xorlıq, Ko'z aldımızda o'sh alıwshı dushpanlar.
18 Bulardın' barlıg'ı basımızg'a tu'sti, Biraq bizler Seni umıtpadıq, Kelisimin'di buzbadıq.
19 Ju'regimiz Sennen ju'z burmadı, Senin' jolların'nan shetke shıqpadıq.
20 Bizlerdi sag'allar ma'kanında ezip tasladın', U'stimizge tas tu'nek qaran'g'ılıqtı jawdın'.
21 Eger bizler Qudayımızdın' atın umıtqanımızda, Basqa qudaylarg'a qollarımızdı jayg'anımızda,
22 Onda Quday bunı bilmes pe edi? Ol ju'rektegi sırlardı biledi.
23 Sen sebepli ku'ni boyı bizlerdi o'ltiredi, Shalınatug'ın qoy dep, bizlerdi esaplaydı.
24 Tur, İye! Nege uyıqlap atırsan'? Oyan, ma'n'gige bizlerdi taslap ketpe!
25 Ne ushın ju'zin'di jasırıp atırsan'? Qayg'ı ha'm azaplarımızdı ne ushın umıtasan'?
26 Bizler topıraqta jatırmız, Denemiz jerge jabısıp qaldı.
27 Tur, ja'rdem ber bizlerge, Su'yispenshiligin' haqı qutqar bizlerdi!
