1 Qosıq. Qorax a'wladının' jırı
2 aratqan İye ullıdur! Qudayımızdın' qalasında, muxaddes tawında, Ol asa maqtawg'a ılayıqlıdur.
3 Biyik ha'm go'zzaldur, Pu'tkil jer ju'zinin' quwanıshı Sion tawı, Muxaddes taw – ullı Patshanın' qalası.
4 Quday onın' bekinisi ishinde otırıp, Onın' O'zi bekkem qorg'an boladı.
5 Mine, patshalar jıynalıp, Birgelikte Sion tawına ju'ris qıldı.
6 Biraq bunı ko'rip, albırap, Qorqınıshqa tu'sip, qashıp ketti.
7 Tolg'aq tutqan hayalday, Sol jerde olardı titirew bastı.
8 U'lken sawda kemelerin qıyratqan shıg'ıs samalı sıyaqlı, Joq ettin' olardı.
9 A'lemnin' Jaratqan İyesinin' qalasında, Qudayımızdın' qalasında, Neni esitken bolsaq, sonı ko'rdik. Quday onın' qa'wipsizligin ma'n'gi bekkemleydi.
10 Quday, Senin' İbadatxanan'da, Su'yispenshiligin' haqqında oylaymız.
11 Atın' sıyaqlı, Quday, Sag'an arnalg'an alg'ıs-maqtaw da, Du'nyanın' to'rt ta'repine jayılg'andur. On' qolın' a'dillikke tolıdur.
12 Senin' hu'kimin'nen quwansın Sion tawı, Shadlansın Yahuda qalaları!
13 Sionnın' do'geregin aylanıp ju'rin', Onın' minaraların sanap shıg'ın'.
14 Keleshektegi a'wladın'ızg'a aytıp beriw ushın, Diywallarına dıqqatın'ızdı qaratın', Qorg'anlarına qaran'.
15 Bul Quday ma'n'gi-baqıy bizlerdin' Qudayımız boladı, Bizlerdi o'mirimizdin' aqırına deyin jeteleydi.
