1 Atqarıwshılardın' jetekshisine. Qorax a'wladının' jırı
2 Tın'lan', ha'y, barlıq xalıqlar! Qulaq salın' ha'mmen'iz, jer ju'zinde jasaytug'ınlar,
3 A'piwayı ha'm aqsu'yekler, bay ha'm jarlılar!
4 Awzımnan shıg'ar danalıq so'zler, Kewlimdegi pikirim tu'sinik berer.
5 Qulaq tu'remen hikmetli so'zlerge, Lira menen ma'nisin ashıp beremen.
6 Ne ushın qorqaman apat ku'nlerde, Niyeti buzıq dushpanlarım meni qorshap alg'anda?
7 Olar o'z mal-du'nyasına isener, Esapsız baylıqları menen maqtanar.
8 Hesh kim birewdin' o'mirinin' to'lemin o'tey almas, Ol ushın Qudayg'a qun to'ley almas.
9 Adam o'mirinin' to'lemi qımbat, Hesh kim hesh qashan o'tey almas.
10 Olay bolmag'anda, ma'n'gi jasar edi adamzat, Ko'rmes edi qa'bir ju'zin.
11 Ha'mme biler danalardın' da o'letug'ının, Aqmaq ha'm biyma'ni adamlardın' joq bolatug'ının. Olardın' baylıg'ın basqalar iyeler.
12 Jerlerine o'z atların qoysa da, Qa'birleri ma'n'gi u'yi bolıp, A'wladtana'wladqa ma'kanı bolar.
13 Abıraylı insan da ma'n'gi turmas, O'lip ketetug'ın haywang'a megzer.
14 O'zine isengenlerdin' aqıbeti, Olardın' so'zin maqullag'anlardın' ta'g'diri mınaday bolar:
15 Su'riw sıyaqlı o'liler ma'kanına aydalar, O'lim olardın' shopanı bolar. Tan'da haq adamlar olarg'a hu'kimdarlıq qılar, Deneleri shirip keter, O'liler ma'kanı olardın' u'yi bolar.
16 Biraq Quday meni o'liler ma'kanının' pa'njesinen qutqarar, Ol meni O'z da'rgayına alar.
17 Qorqpa, eger bir adam bayıp ketse, U'yinin' mal-du'nyası artıp ketse.
18 Ol o'lgende, o'zi menen hesh na'rse alıp kete almas, Baylıg'ı da onın' izinen qa'birge erip ketpes.
19 Tiri waqtında, ol o'zin baxıtlı sanasa da, Tabıslı bolg'anı ushın ko'plerden maqtaw alsa da,
20 Ol da ata-babaları jatqan jerge ketip, Jaqtılıqtı artıq ko'rmes.
21 Abıraylı bolsa da, aqılsız bolg'anlar, O'lip ketetug'ın haywanlarg'a megzer.
