Asaftın' jırı
Zabur 49 bob
1 Qu'diretli bolg'an Quday, Jaratqan İye so'yler, Ku'nshıg'ıstan, batısqa deyin, Pu'tkil jer ju'zin shaqırar.
2 Go'zzallıqta minsiz Sionnan, Quday jarqırap keler.
3 Qudayımız keler, u'nsiz bolmas, Aldındag'ı janıp turg'an ot ha'mmesin jalmaydı, Do'gereginde ku'shli dawıl eser.
4 Xalqın hu'kim qılıw ushın, Jer ha'm aspandı gu'wa qılıp shaqırar:
5 «Jıynan' aldıma sadıq qullarımdı, Qurbanlıq shalıp, Menin' menen kelisim du'zgenlerdi».
6 Ko'kler Onın' a'dilligin ja'riyalar, Hu'kim shıg'arıwshı Qudaydın' O'zidur.
7 «Ha'y, xalqım, tın'lan', Men so'yleymen, Ha'y, İzrail, sag'an qarsı gu'walıq bereyin: Men Qudayman, senin' Qudayın'man!
8 Qurbanlıqların' ushın, Ha'm ku'ndelikli jandırılatug'ın qurbanlıqların' ushın, Dawa qılıp atırg'an joqpan.
9 Qoran'dag'ı bug'ag'a da, Su'riwin'degi tekege de zar emespen.
10 Meniki tog'aydag'ı barlıq janıwarlar, Mın'-mın'lag'an tawlardag'ı haywanlar.
11 Tawlardag'ı barlıq quslardı bilemen, Dalalardag'ı ha'r bir jabayı haywan Meniki.
12 Ash bolsam, soramaspan sennen, Pu'tkil du'nya ha'm onı toltırıp turg'anlar Meniki.
13 Men bug'anın' go'shin jeytug'ın ba edim? Tekenin' qanın ishetug'ın ba edim?
15 Mag'an, Qudayg'a shu'kirlik qurbanlıg'ın usın, Quday Taala aldında ishken antın'dı orınla.
16 Azap-qayg'ı ku'nin'de shaqır Meni, Seni qutqaraman, sen de Meni dan'qqa bo'leysen'».
17 Biraq Quday napa'k adamg'a bılay deydi: «Ne haqın' bar qag'ıydalarım haqqında so'ylewge? Ne haqın' bar kelisimimdi awzın'a alıwg'a?
18 O'zin'e bergen ta'rbiyamdı jek ko'resen', So'zlerimnen ju'z burasan'.
19 Urını ko'rgenin'de, og'an qosılasan', Buzıqlıq qılıp atırg'anlar menen sherik bolasan'.
20 Awzın'dı jawızlıqqa ken' ashasan', Tilin' menen jalg'an so'zler toqıysan'.
21 Otırıp, tuwısqanın'a qarsı so'yleysen', Tuwg'an-tuwısqanın'a da jala jawasan'.
22 Sen usılardı isledin', Men u'ndemedim, Meni de o'zin'dey dep oyladın'. Endi seni a'shkaralap, ayıbın'dı ko'z aldın'a qoyaman.
23 Dıqqat salın', ha'y, Qudaydı umıtqanlar! Bolmasa, sizlerdi tilkimlep taslayman, Qutqaratug'ın hesh kim bolmaydı sizlerdi.
24 Mag'an shu'kir qurbanlıg'ın usıng'anlar, Meni hu'rmet qılg'an boladı. Kim o'z jolın tuwrılap ju'rse, Sog'an O'z qutqarıwımdı ko'rsetemen».
