1 Atqarıwshılardın' jetekshisine. Tarlı saz a'sbaplarında aytılatug'ın Dawıttın' ayrıqsha jırı
2 Quday, qulaq sal duwama, Jalbarınıwıma itibarsız bolma.
3 Qulaq salıp, tın'la meni, Tınıshsızlanıp, azap shegemen,
4 Dushpanlarımnın' dawısınan, jawızdın' zulımınan. Olar basıma qayg'ı-g'am alıp keledi, G'a'zeplenip, mag'an dushpanlıq qıladı.
5 Ju'regim sızlaydı ishimde, O'lim qorqınıshı tuwdı basıma.
6 Seskeniw ha'm titirew bastı meni, Qa'weter qapladı denemdi.
7 Sonda men: «Qa'nekey, kepterdey qanatlarım bolsa, Ushıp ketip, tınıshlanar edim.
8 Shınında da, alıslarg'a ketip, Elsiz jerde ma'kanlar edim.
9 Ku'shli samal ha'm boranlardan qashıp, O'zime pana tabıwg'a asıg'ar edim», – dedim.
10 İyem, olardı aljastır, Olardın' jobaların buzıp jiber. Qalada zorlıq ha'm ja'njeldi ko'rip turıppan.
11 Olar ku'ni-tu'ni qala diywallarının' u'stinde ızg'ıydı, Jawızlıq ha'm apat qala ishinde ju'z berip atır.
12 Onın' ortasında wayranshılıq bar, Jalg'an ha'm hiylekerlik arımas maydanınan.
13 Eger jawım meni keyise, Bunı ko'tere alar edim, Dushpanım mennen o'zin joqarı qoysa, Onnan jasırıng'an bolar edim.
14 Biraq sen, mag'an ten'les bolg'an adam, Dostım ha'm jaqınım.
15 Bizler sırlas dos edik, Qudaydın' u'yine birge barar edik.
16 O'limge duwshar bolsın dushpanlarım, Tiriley o'liler ma'kanına tu'ssin, Sebebi u'yleri ha'm ju'rekleri jawızlıqqa tolıdur.
17 Al men Qudaydı shaqıraman, Jaratqan İye qutqarar meni.
18 Tu'nde, tan'da ha'm ku'ndiz, Jalbarınıp, dad salaman, Ol esitedi dawısımdı.
19 Mag'an qarsı shıqqanlar ko'p bolsa da, Amanlıq ishinde qutqarar janımdı.
20 A'zelden taxtta otırg'an Quday, Meni esitip, olardı boysındıradı.Olarda o'zgeris joq, Qudaydan qorqpaydı.
21 Joldasım dostına qarsı qol ko'terdi, Du'zgen kelisimimizdi buzdı.
22 Onın' awzınan pal tamadı, Biraq ju'reginde dushpanlıq. So'zleri maydan da jag'ımlı, Biraq bular jalan'ashlang'an qılıshdur.
23 Ju'gin'di Jaratqan İyege tapsır, Ol sag'an su'yenish boladı. Hasla jol qoymas, Haq adamnın' qulawına.
24 Sen, Quday, o'lim shuqırına ılaqtırasan' jawızlardı, O'mirinin' jartısın da ko'rmes qanxor ha'm qıyanetshiler. Al men Sag'an u'mit baylayman.
